ސީޕްލޭން ޓަރމިނަލް ދޫކުރުމުގެ ކަންކަން ކުރީ އެމްޑީ އާދިލްގެ އިރުޝާދުގެ ދަށުން: ފަޒީލް

އައު ސީ ޕްލޭން ޓަރމިނަލް ޓީއެމްއޭ އަށް ކުށްޔައް ދިނުމުގެ ހުރިހާ ކަމެއް ގެންގޮސްފައިވަނީ، އެމްއޭސީއެލްގެ ކުރީގެ މެނޭޖިންގ ޑިރެކްޓަރ އާދިލް މޫސާގެ ލަފަޔާ އިރުޝާދުގެ ދަށުން ކަމަށް އެމްއޭސީއެލްގެ ނޮން އެއިރޯ ކޮމާޝަލް ޑިޕާޓްމަންޓްގެ، ޖެނަރަލް މެނޭޖަރ ކޮމާޝަލް، ހުސައިން ފަޒީލް ވިދާޅުވެއްޖެ އެވެ.

ޓީއެމްއޭއަށް ސީ ޕްލޭން ޓަރމިނަލް ނުއަގުގައި ދިނުމަށް އެމްއޭސީއެލުން ވެފައިވާ އެއްބަސްވުމާ ގުޅިގެން މާލިއްޔަތު ކޮމެޓީން ބުދަ ދުވަހު ވަނީ ފަޒީލުއާ ބައްދަލުކޮށް މައުލޫމާތު އޮޅުން ފިލުވާފަ އެވެ. ފަޒީލް ވިދާޅުވީ، އޭނާއަކީ ސީދާ މަތިންދާ ބޯޓާ ގުޅުންހުރި ހިދްމަތްތައް ފިޔަވާ، އެއަރޕޯޓްގައި ގާއިމުކުރެވޭ ވިޔަފާރި އުސޫލުން ހިންގޭ ތަންތަނުގެ މުއާމަލާތްތައް ކުރުމަށް އުފައްދާފައިވާ ކޮމާޝަލް ސެކްޝަންގެ ޖެނެރަލް މެނޭޖަރު ކަމަށްވާތީ، އައު ސީ ޕްލޭން ޓަރމިނަލްގެ ކުއްޔަން ދިނުމުގައި ޓީއެމްއޭއާއެކު ހިންގާފައިވާ މުއާމަލާތްތައް ހިންގާފައިވަނީ އޭނާ ކަމަށެވެ.

Advertisement

ނަމަވެސް ފަޒީލް ވިދާޅުވީ، އައު ސީ ޕްލޭން ޓަރމިނަލް ޓީއެމްއޭއާއެކު ކުރެވިފައިވާ މަަޝްވަރާތަކާއި އެއްބަސްވުންތަކަކީ ކުންފުނީގެ ސީނިއަރ މެނޭޖްމަންޓް، ހާއްސަކޮށް އޭރުގެ އެމްޑީ އާދިލްގެ މަޝްވަރާގެ މަތިން ކުރައްވާފައިވާ ކަންތައްތަކެއް ކަމަށެވެ. އެގޮތުން ޓީއެމްއޭއަށް ސީ ޕްލޭން ޓަރމިނަލް ކުށްޔަން ދިނުމުގެ ޕްރޮޕޯޝަލްގައި ސޮއިކުރައްވާފައިވަނީ ވެސް އޭނާ ކަމަށް ފަޒީލް ވިދާޅުވި އެވެ. އަދި ސީ ޕްލޭން ކުއްޔަށް ދިނުމަށް ހަދަފައިވާ ޕްރޮޕޯޝަލަކީ އެމްއޭސީއެލްގެ ބޯޑުން ނިންމާފައިވާ ނިންމުމެއްކަން ލިޔުމުން ފެންނަން ނެތަސް، ސީ ޕްލޭން ޓަރމިނަލް ކުށްޔަށް ދޫކުރުުގެ ޕްރޮޕޯޝަލްތަކާއި އަދި ޓީއެމްއޭއަށް ކުއްޔަށް ދޭން ނިންމާފައިވާ ނިންމުންތައް އެމްއޭސީއެލްގެ ބޯޑަށް އެނގޭނެކަމަށް ގަބޫކު ކުރައްވާ ކަމަށާއި އެއީ ކުންފުނީގެ އެމްޑީ އާއި ކުންފުނީގެ ސެކެރެޓަރީ އަށް މިކަމުގެ މައުލޫމާތު ވަރަށް ރަނގަޅަށް އެނގިލައްވާނެ ކަމަށެވެ. އަދި ކޮންމެ ކަމެއް ނިންމާފައިވާނީ އެމްޑީ އާދިލްގެ ލަފަޔާއާއި އިރުޝާދުގެ ދަށުން ކަމަށާއި، ޓީއެމްއާއެކު އެންމެފަހުން ބައްދަލުވުމެއް ބާއްވާފައިވަނީ މިދިޔަ ނޮވެމްބަރު މަހުގެ ފުރަތަމަ ހަފްތާގައި ކަމަށާއި އެ ބައްދަލުވުމުގައި ޓީއެމްއޭއަށް ކުޔަށްދޭން ނިންމާފައިވާ އެއްބަސްވުމުގައި ސޮއިކޮށް، އަވަހަށް ކުށްޔަން ދިނުމަށް ބޭނުންވާ ކަމަށް އާދިމް ވިދާޅުވެފައިވާ ކަމަށްވެސް ފަޒީލް ވިދާޅުވި އެވެ.

ފަޒީލް ވިދާޅުވީ، ސީ ޕްލޭން ޓަރމިނަލް ކުއްޔަށް ދިނުމުގެ ޕްރޮޕޯޝަލެއްގެ ޕްރެޒެންޓޭޝަނެއް ކުންފުނީގެ ބޯޑަށް ހުށަހެޅުއްވި ކަމަށެވެ. އަދި ކުންފުނީގެ މެނޭޖްމަންޓުން ދެކޭގޮތުގެ، ރެންޓަލް ރޭޓް ނެގޭނެ ފަސް ސިނޭރިއޯއެއް އެ ޕްރެޒެންޓޭޝަނުގައި ހިމެނޭނެ ކަމަށް ވެސް ފަޒީލް ވިދާޅުވި އެވެ.

ފަޒީލް ވިދާޅުވީ، ޓީއެމްއޭއަށް ސީ ޕްލޭން ޓަރމިނަލް ކުށްޔަށް ދިނުމަށް ވެފައިވާ އެއްބަސްވުމަކީ އެމްއޭސީއެލަށް އެންމެ ފައިދާވާގޮތަށް އޮތް އެއްބަސްވުމެއް ނޫން ކަމަށް އޭނާވެސް ގަބޫލު ކުރައްވާ ކަމަށެވެ. ނަމަވެސް އޭނާ އެއެއްބަސްވުމުގައި ސޮއި ކުރީ ކުންފުނީގެ އިންވެރިނާއެކު ކުރެވިފައިވާ މަޝްވަރާތަކުގެ ދަށުން ކަމަށެވެ. އަދި އެ އެއްބަސްވުމުގެ ސަބަބުން އެމްއޭސީއެލަށް އެއްވެސް ގެއްލުމެއް ނުލިބޭނެ ކަމަށާއި ވަނީ ފައިދާ ކަމަށް ފަޒީލް ވިދާޅުވި އެވެ. ނަމަވެސް އެއީ އެމްއޭސީއެލަށް އެންމެ ރަނގަޅު އެއްބަސްވުން ނޫންކަމަށްވެސް ފަޒީލް ވިދާޅުވި އެވެ.

މާލިއްޔަތު ކޮމެޓީންގެ މެމްބަރުން ވިދާޅުވީ އެމްއޭސީއެލްގެ ބޯޑު މެމްބަރުން ކޮމެޓީއަށް ވަޑައިގެން ދެއްވި މައުލޫމާތުތަކުގައި އައު ސީ ޕްލޭން ޓަރމިނަލް ކުށްޔަށް ދޫކުރުމުގައި އެބޯޑުގެ އެއްވެސް ނިންމުމެއް ނޯންނާނެ ކަމަށާއި އެކަން ހިނގާދިޔަގޮތް ކުންފުނީ ބޯޑަށް ނޭނގޭ ކަމަށް ބޯޑު މެމްބަރުން ވިދާޅުވެފައިވާ ކަމަށެވެ.

ނަމަވެސް ފަޒީލް ވިދާޅުވީ، ސީ ޕްލޭން ކުށްޔަން ދިނުމުގެ ހުރިހާ ކަމެއް ކޮށްފައިވާނީ ކުންފުނީގެ ކުރީގެ އެމްޑީ އާދިލްގެ އިރުޝާދުގެ ދަށުން ކަމަށާއި އަދި ކުންފުނީގެ ސެކެރެޓަރީއަށް ވެސް އެކަމުގެ މައުލޫމާތު ހިއްސާކޮށްފައިވާނެ ކަމަށެވެ.