ރައްޔިތުންގެ މަޖިލީހުން ގަސްކާނާ އުފައްދާ ދަނޑުވެރިންނަށް ބަހަނީ
މި މެޝިނުގައި ކައިފައި ބާކީ ހުންނަ ތަކެތި 100 ކިލޯ އަށް އެޅުމުން 36 ކިލޯގެ ގަސްކާނާ އުފެއްދޭ
ކުލައިން ހޮޓެލްސްގެ ފަރާތުން މަޖިލީހަށް މެޝިން ހަވާލުކުރުމުގެ ތެރެއިން
މިދިޔަ ބުރާސްފަތި ދުވަހު، ކްލައިން ހޮޓެލްސްގެ ފަރާތުން ރައްޔިތުންގެ މަޖިލީހަށް ހަދިޔާކުރި އިކޮލޮޖިކަލް ފުޑް ރީސައިކްލިންގ މެޝިނުން ގަސްކާނާ އުފެއްދެމުންދާ ކަމަށާއި އެހެންކަމުން މެމްބަރުންގެ ތެރެއިން ދަނޑުވެރިކަން ގިނައިން ކުރާ ދާއިރާތަކަށް ބެލުމެއްގެ ދަށުން ގަސްކާނާ ދޫކުރުމަށް ގަސްތުކުރައްވާކަމަށް ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
މަޖިލީހުން ބާކީވާ ކާނާ ރީސައިކަލް ކުރުމަށް އިކޮލޮޖިކަލް ފުޑް ރީސައިކަލް މެޝިނެއް ވަނީ ހަދިޔާ ކޮށްފަ އެވެ. ރައީސް ނަޝީދު ވިދާޅުވީ މި މެޝިނުގައި ކައިފައި ބާކީ ހުންނަ ތަކެތި 100 ކިލޯ އަށް އެޅުމުން 36 ކިލޯގެ ގަސްކާނާ އުފެއްދޭކަމަށް އިދާރީ މޭޒުން މައުލޫމާތުދޭކަމަށެވެ.
ރައީސް ނަޝީދު ވިދާޅުވީ އެކަމަށް ބޭނުންވެވަޑައިގަންނަވާ ބޭފުޅުން އަމީންޢާއްމު އަރިހުގައި ގަސްކާނާއަށް އެދިވަޑައިގަތުމުން، ގަސްކާނާ ހުރި މިންވަރަކުން ދޫކުރަމުން ގެންދާނެކަމަށެވެ. އެގޮތުން މެންބަރުން އަމީންޢާއްމަށް ޓެކްސްޓު މެސެޖެއް ކޮށްލެއްވުމުން އެކަން ހަމަޖެހިގެންދާނެ ކަަމަށް ރައީސް ނަޝީދު ވިދާޅުވި އެވެ.
މިކަމާއި ގުޅޭގޮތުން ވާހަކަދައްކަވަމުން މާމިގިނލި ދާއިރާގެ މެމްބަރ ގާސިމް އިބްރާހީމް ވިދާޅުވީ އެމަނިކުފާނުގެ ކޮންމެ ރިސޯޓަކަށް އެފަދަ މެޝިނެއް ގަތުމަށް ބޭނުންފުޅުވެ ވަޑައިގަންނަވާކަމަށެވެ.
އިންސިނެރޭޓަރު ހަދިޔާކުރުމަށް ރައްޔިތުންގެ މަޖިލީހުގެ އިދާރާގައި ބޭއްވި ރަސްމިއްޔާތުގައި މަޖިލީހުގެ ފަރާތުން އިންސިނެރޭޓަރާ ހަވާލުވެވަޑައިގަތީ މަޖިލީހުގެ ރައީސް، ރައީސް މުހައްމަދު ނަޝީދެވެ. އެމިޝަނާއި ހަވާލުވެވަޑައިގަތުމަށްފަހު ވާހަކަ ދައްކަވަމުން ރައީސް ނަޝީދު ވިދާޅުވެފައިވަނީ އެމިޝަނަކީ މަޖިލީހަށް މުހިންމު މެޝިނެއްކަމަށެވެ.
