އިނގިރޭސިވިލާތުގެ ގާނޫނު ހަދާ މަޖިލީހުގެ މެމްބަރަކު އިންޑިއާ އިން ޑީޕޯޓްކޮށްފި
18 ފެބުރުއަރީ 2020 | އަންގާރަ 14:37ޑިޕޯޓްކޮށްފައިވަނީ ދިއްލީގެ އެއާޕޯޓުން
އިނިގިރޭސިވިލާތުގެ ގާނޫނު ހަދާ މަޖިލީހުގެ މެމްބަރު ޑެބީ އަބްރަހަމްސް
އިންޑިއާގެ ކަޝްމީރުގައި ހިނގަމުންދާ ކަންތައްތަކާއި ދެކޮޅަށް އަޑު އުފުލި އިނގިރޭސިވިލާތުގެ ގާނޫނު ހަދާ މަޖިލީހުގެ މެމްބަރަކު އިންޑިއާ އަށް ވަޑައިގެންނެވުން އެ ގައުމުން ޑީޕޯޓް ކޮށްލައިފިއެވެ.
ވިސާއާ އެކު ވެރިރަށް ދިއްލީގެ އެއާޕޯޓަށް ފްލައިޓް ޖެއްސުމުން އަނބުރާ ދުބާއީ އަށް ފުރުވާލާފައިވަނީ ޑެބީ އަބްރަހަމަސް އެވެ. ޔޫކޭގެ ލޭބަރ ޕާޓީއަށް ނިސްބަތްވެ ވަަޑައިގަންނަވާ ޑެބީގެ އީ- ވިސާ ކެންސަލް ކޮށްފައިވާ ކަމަށް އިންޑިއާގެ ނޫސްތަކުން ވަނީ ރިޕޯޓް ކޮށްފައެވެ. ޑެބީ, އިންޑިޔާ އަށް ދަތުރުކުރެއްވީ އިންޑިއާ ގައި ތިބި އާއިލާގެ މީހުންގެ އިތުރުން ރަށްޓެހިންނާ ބައްދަލު ކުުރެއްވުމަށެވެ.
އިންޑިއާގެ ހޯމް މިނިސްޓްރީގެ އިސް އޮފިޝަލަކު ވިދާޅުވެފައި ވަނީ ގާނޫނު ހަދާ މަޖިލީހުގެ މެމްބަރުގެ ވިސާ ކެންސަލް ކޮށްފައިވާކަން އޭނާ އަށް އަންގާފައިވާ ކަމަށެވެ. އިންޑިއާގެ ނޫހަށް ދެއްވި އިންޓަވިއުއެއްގައި ޑެބީ ވިދާޅުވެފައިވަނީ ފެބްރުއަރީ މަހުގެ 13 ގެ ކުރިން ވިސާއާ ގުޅޭ ގޮތުން އެއްވެސް ކަހަލަ މެއިލްއެއް ލިބިފައިނުވާ ކަމަށެވެ. ޑެބީ ދަތުރުކުރަން ގައުމަށް ބޭރަށް ވަޑައިގެންނެވީ މި މަހުގެ 13 ވަނަ ދުވަހުއެވެ.
ޑެބީ އަށް ވިސާ ދޫކޮށްފަައިވަނީ މިދިޔަ އަހަރުގެ އޮކްޓޫބަރު މަހުއެވެ. އަދި ވިސާގެ ތާރިހު ހަމަވާން އޮތީ މި އަހަރުގެ އޮކްޓޫބަރު މަހުއެވެ. ޑެބީ ވަނީ އޭނާގެ ކަންބޮޑުުވުންތައް ޓްވިޓާގައި ހިއްސާކުރައްވާފައެވެ.
