ލޯކަލް ކައުންސިލްތަކުގެ އިންތިހާބާއެކު ބާއްވާ އަންހެނުންގެ ތަރައްގީއަށް މަސައްކަތްކުރާ ކޮމެޓީ (ޑަބްލިއުޑީސީ)ގެ އިންތިހާބުގައި އެމްޑީޕީން ވާދަކުރާނެ ކެނޑިޑޭޓުން ކަނޑައެޅުމަށްޓަކައި ބާއްވާ ޕްރައިމަރީ ފަށައިފިއެވެ.

ކައުންސިލް އިންތިހާބުގައި މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ ކެމްޕެއިންގެ ސްޕޯކްސްޕާސަން އަކަށް އަފްޝަން ލަތީފް ވިދާޅުވީ، އަންހެނުންގެ ތަރައްގީއަށް މަސައްކަތްކުރާ ކޮމެޓީގެ ޕްރައިމަރީ، ހޯމަ ދުވަހުގެ މެންދުރުފަހު 2:30 އިން ފެށިގެން ރޭގަނޑު 9:00 އަށް ކުރިއަށް ދާނެ ކަމަށެވެ.

މި އިންތިހާބުގައި ވަރަށް ގިނަ އަންހެން ބޭފުޅުން ކުރިމަތިލެއްވިކަން ފާހަގަކުރައްވާ އަފްޝަން ވިދާޅުވީ މުޅި ރާއްޖޭގައިވެސް މި އިންތިހާބުގެ ވޯޓު ލުން ކުރިއަށް ދާނެ ކަމަށެވެ.

އަފްޝަން ވިދާޅުވީ މާލޭގައި ޑަބްލިއުޑީސީ ޕްރައިމަރީގެ ވޯޓުލުން ކުރިއަށް ދާނީ އެމްޑީޕީގެ ހަރުގޭގައާއި އެމްޑީޕީގެ ކެމްޕެއިން މައި އޮފީހުގައި ކަމަށެވެ. އެގޮތުން ހަރުގޭގައި ވޯޓުލުން އޮންނާނީ ގއ، ގދ އަތޮޅުގެ މީހުންނަށް ކަމަށާއި ކެމްޕެއިން މައި އޮފީހުގައި އޮންނާނީ ހއ. ހދ، ކުޅުދުއްފުށި ސިޓީ، ށ، ނ، ރ، ބ، ޅ، ކ، އއ، ވ، ތ، ލ އައްޑޫ ސިޓީ އަދި މާލެ ސިޓީގެ މީހުންގެ ވޯޓުލުން ކަމަށެވެ.

ލާމަރުކަޒީ ގާނޫނަށް ބޮޑެތި އިސްލާހުތަކެއް ގެނައުމަށް ފަހު ބާއްވަ ފުރަތަމަ ލޯކަލް ކައުންސިލް އިންތިހާބާއި، އަންހެނުންގެ ތަރައްގީ ކުރިއަރުވާ ކޮމިޓީގެ އިންތިހާބު ބޭއްވުމަށް އީސީން ކަނޑައަޅާފައިވާ ތާރީހަކި އޭޕްރީލް މަހުގެ ހަތަރު ވަނަ ދުވަހުއެވެ.