ވުހާންއިން ދިއްލީއަށް ގެންދިޔަ ދިވެހިން ބުނަނީ އެމީހުންގެ ހާލު ރަނގަޅުކަމަށް
އިންޑިޔާގައި ތިބި ދިވެހިންނާ ނޫސްވެރިއަކު ވަނީ ވާހަކަ ދައްކާފައި
ވުހާންގައި ތިބި ދިވެހިން އިންޑިޔާއަށް ގެންދަނީ
ޗައިނާއިން ފެތުރެން ފެށި ނުރައްކާތެރި ކޮނޯރާ ވައިރަހާއި ގުޅިގެން އެ ގައުމުގައި ތިބި ދިވެހިންގެ ތެރެއިން އިންޑިއާއަށް ގެނައި ހަތް ދިވެހިން ކަރަންޓީނުކޮށްފައި ތިބި އިރު އެމީހުން މިވަނީ ފުރަތަމަ ފަހަރަށް މީޑިޔާއާ ވާހަކަ ދައްކާފަ އެވެ.
އެގޮތުން އިންޑިޔާގެ ވިއޮން ނިއުސް އެޖެންސީގެ ނޫސްވެރިއަކު ވަނީ އިންޑިޔާގެ ދިއްލީގެ މަނޭސާރުގައި ގާއިމު ކުރެވިފައިވާ ޚާއްސަ ކަރަންޓީން ފެސިޓީޒްގައި ދިވެހިން ތިބޭ ތަނަށް ޒިޔާރަތްކޮށް އެމީހުންނާ ވާހަކަ ދައްކާފަ އެވެ.
އެ ނޫސްވެރިޔާ އާ ވާހަކަދެއްކި ދިވެހި މީހާ ބުނެފައިވަނީ އެތަނުން ލިބޭ ޚިދުމަތްތަކާމެދު ހިތްހަމަޖެހޭ ކަމަށެވެ.
ވުހާން ގައި ތިބި ހަތް ދިވެހިން އިންޑިއާއަށް އައިސްފައިވަނީ އެއާ އިންޑިއާގެގެ ހާއްސަ ފްލައިޓެއްގައި މިމަހުގެ ދެވަނަ ދުވަހުއެވެ. މިއީ ޗައިނާގެ ވުހާންގައި ތިބި އިންޑިއާގެ ރައްޔިތުން އެ ގައުމަށް ގެނައުމަށް އިންޑިއާ ސަރުކާރުން ފޮނުވި ފްލައިޓެކެވެ.
މިމީހުން މިކަރަންޓީނު ފެސިލިޓީ ދޫކޮށްދިޔުމަށް ހަމަޖެހިފައިވަނީ މިމަހުގެ 17 ވާ ހޯމަދުވަހުގެ ހެނދުނުގެ ވަގުތެއްގައެވެ.
ޗައިނާގައި ޖުމްލަ 69 ދިވެހިން އަންނަނީ ދިރިއުޅެމުންނެވެ. އޭގެ ތެރެއިން ޗައިނާގެ ވޫހާން ސިޓީގައި ދިރިއުޅެމުން ދަނީ 9 ދިވެހިންނެވެ. އަދި އެމީހުންގެ ތެރެއިން ރާއްޖެ އަންނަން ބޭނުންވަނީ 7 ދިވެހިން ކަމަށްވެސް ފޮރިން މިނިސްޓްރީން ވަނީ މީގެ ކުރިން ބުނެފައެވެ.
ދިވެހި ސަަރުކާރުން ދަނީ ޗައިނާގައި ދިރއުޅޭ ދިވެހިންނަަށް އެކި ގޮތްގޮތުން އެހީތެރިކަން ފޯރުކޮށްދެމުންނެވެ.
