ޕީއެސްޖީ އަށް ވެސް އަދަބުދޭން ލަލީގާގެ ރައީސް ގޮވާލައިފި

މެންޗެސްޓަރ ސިޓީއަށް އަދަބު ދިން ގޮތަށް ފްރާންސްގެ ޗެމްޕިއަން ޕެރިސް ސެއިންޓް ޖާމަން (ޕީއެސްޖީ) އަށް ވެސް އަދަބު ދިނުމަށް ލަލީގާގެ ރައީސް ހަވިއޭ ޓެބާސް ޔޫއެފާއަށް ގޮވާލައިފިއެވެ.

ފައިނޭންޝިއަލް ފެއަރޕްލޭ (އެފްއެފްޕީ) ގެ އުސޫލުތަކާއި ހިލާފުވެފައިވާތީ ޔޫއެފާއިން ވަނީ ހުކުރު ދުވަހު ފިޔަވަޅު އަޅާފައެވެ. މި ފިޔަވަޅާއެކު ސިޓީއަށް ކުރިޔަށް އޮތް ދެ ސީޒަނަށް ޔޫއެފާ އެއްވެސް މުބާރާތެއްގައި ނުކުޅެވޭނެއެވެ. މީގެއިތުރުން ޔޫއެފާއިން ވަނީ ސިޓީ 30 މިލިއަން ޔޫރޯއިން ޖޫރިމަނާވެސް ކޮށްފައެވެ.

ލަލީގާގެ ރައީސް ޓެބާސް ވިދާޅުވީ ޔޫއެފާއިން އެޅި ފިޔަވަޅަކީ ފުޓުބޯޅަ ރަނގަޅު ގޮތުގައި ކުރިޔަށް ގެންދަން ލިބުނު ފަސޭހައެއް ކަމަށާއި ފެއަރޕްލޭ އުސޫލުން ފުޓުބޯޅަ ހިނގާނީ ގޯސް ހަދާ މީހުންނާއި ދެކޮޅަށް ފިޔަވަޅު އަޅައިގެން ކަމަށާއި، އެހެން ކަމުން ޔޫއެފާގެ ނިންމުމަށް އުފާ ކުރާ ކަމަށެވެ. މީގެ އިތުރުން ޓެބާސް ވިދާޅުވީ މި ފިޔަވަޅު ފްރާންސްގެ ޗެމްޕިއަން ޕީއެސްޖީއަށް ވެސް އަޅަން ޖެހޭ ކަމަށެވެ.

މިއީ ސިޓީއަށް އެފްއެފްޕީއާ ޚިލާފުވެގެން އަދަބުދިން ދެވަނަ ފަހަރެވެ. މިފަހަރު ސިޓީއަށް އަދަބު ދިނީ އެފްއެފްޕީ ގަވައިދާ ޚިލާފަށް ސްޕޮންސަރުން މެދުވެރިކޮށް ކްލަބަށް ފައިސާ ވައްދާ އެކަމަށް މަކަރު ހެދުމާއި ގުޅިގެންނެވެ.

ލަލީގާގެ ރައީސް ޓެބާސް ވަނީ މީގެ ކުރިން ވެސް ސިޓީ އާއި ޕީއެސްޖީއަށް ވަރަށް ބޮޑަށް ފާޑު ކިޔާފައެވެ. އަދި މީގެ ކުރިން ސްޕެނިޝް މީޑިއާއަށް ދިން އިންޓަރވިއުއެއްގައި ޓެބާސް ވިދާޅުވީ ފުޓުބޯޅައަށް އޮތް އެންމެ ބޮޑު ބިރަކީ ޕީއެސްޖީއާއި ސިޓީ ފަދަ އުސޫލުން ބޭރުން އަމަލުކުރާ ކްލަބްތަކުގެ ނުރަނގަޅު ނުފޫޒު ކަމުގައި ސިފަ ކުރައްވާފައެވެ.

ސިޓީއަށް ދިން އަދަބު ސިޓީން ވަނީ ކޯޓް އޮފް އާބިޓްރޭޝަން ފޮރ ސްޕޯޓްސްގައި އެޕީލް ކުރަން ނިންމާފައެވެ. އަދި މި މައްސަލަ އިނގިރޭސި އެފްއޭއެއިން ވެސް ބަލަމުންދާ ކަމަށް އެ އިދާރާއިން ބުނެއެވެ.