ހުޅުމާލެ އަކީ ކުރީގެ ރައީސް އަބްދުﷲ ޔާމީންގެ ސިޓީއެއް ކަމަށް ރައްޔިތުންގެ މަޖިލީހުގެ ނައިފަރު ދާއިރާގެ މެމްބަރު އަދި ޕީޕީއެމްގެ ނައިބު ރައީސް އަހުމަދު ޝިޔާމް ވިދާޅުވުމާ ގުޅިގެން އާޓްސް، ކަލްޗަރ އެންޑް ހެރިޓޭޖް މިނިސްޓަރު ޔުމްނާ މައުމޫން ރައްދުދެއްވައިފިއެވެ.

ހުކުރު ދުވަހުގެ ރޭ އިދިކޮޅު ޕީޕީއެމް-ޕީއެންސީ ކޯލިޝަނުން ބޭއްވި ޖަލްސާއެއްގައި ޝިޔާމް ވިދާޅުވީ ހުޅުމާލެއަށް އެހެން ކުލަކުލައިގެ ކެންޑިޑޭޓުން ކުރިމަތިލައްވަން ކަމުނުދާނެ ކަމަށެވެ.

ޝިޔާމުގެ ވާހަކަތަކަށް ރައްދު ދެއްވަމުން ޔުމްނާ ކުރެއްވި ޓްވީޓެއްގައި ވިދާޅުވީ ހުޅުމާލެ އަކީ ކުރީގެ ރައީސް އަދި އެކަމަނާގެ ބައްޕާފުޅު މައުމޫން އަބްދުލްގައްޔޫމްގެ ވިސްނުންފުޅެއް ކަމާއި އަދި އެމަސައްކަތް ކުރެއްވީވެސް ރައީސް މައުމޫންކަން އެންމެނަށްވެސް އެނގޭނެ ކަމަށެވެ. އަދި އެކަން ދިވެހި ރައްޔިތުންނަށް އޮޅުވައެއް ނުލެވޭނެ ކަމަށްވެސް ޔުމްނާ ވިދާޅުވިއެވެ.

މީގެ އިތުރުން ޝިޔާމު ވިދާޅުވެފައިވަނީ، މާލޭ ސިޓީ ކައުންސިލަށް ކުރިމަތިލައްވަން އެމްޑީޕީގެ ކެންޑިޑޭޓުން ލަދުގަންނަން ޖެހޭނެ ކަމަށެވެ.

އެގޮތުން އެމްޑީޕީގެ މެޖޯރިޓީ އޮތް މާލޭ ސިޓީ ކައުންސިލްގެ މިދިޔަ ދެ ދައުރުގައި ވެސް މާލޭގެ ރައްޔިތުންނަށް އެއްވެސް ކަމެއް ކޮށްދީފައިނުވާ ކަމަށްވެސް ޝިޔާމް ވިދާޅުވިއެވެ. އަދި މާލޭގެ ކަންކަން ހަމައަކަށް ނޭޅުވުމަކީ ލަދުގަންނަންޖެހޭ ކަމެއް ކަމަށާއި ލޯކަލް ކައުންސިލްތަކުގެ އިންތިޚާބުގައި އެމްޑީޕީގެ މެމްބަރުން މާލޭ ސިޓީ ކައުންސިލަށް ކުރިމަތިލާން ވެސް ލަދުގަންނަން ޖެހޭ ކަމަށްވެސް ޝިޔާމް ވިދާޅުވިއެވެ.

ޝިޔާމް އެގޮތަށް ވިދާޅުވިއިރު، ޕީޕީއެމަކީ ލާމަރުކަޒީ އުސޫލުން ރާއްޖެ ހިންގުމަށް ބޭނުންވާ ސިޔާސަތެއް އޮތް ބައެއް ނޫންކަން މިދިޔަ ރިޔާސީ އިންތިހާބުގެ ކެމްޕެއިން ތެރޭގައި ރައީސް ޔާމީން ވަނީ ވިދާޅުވެފަ އެވެ. އަދި އެމަނިކުފާނުގެ ވެރިކަމުގައި، ލާމަރުކާޒީ ގާނޫނަށް ބޮޑެތި ބަދަލުތަކެއް ގެނެސް، ސިޓީ ކައުންސިލްތަކާއި އަތޮޅު އަދި ރަށު ކައުންސިލްތަކުގެ ބާރުތައް ނަގައި ކަމާ ގުޅުންހުރި ކަންކަން މިނިސްޓްރީތަކުގެ މެންޑޭޓްގެ ތެރޭގައި ހިމަނާފައި ވެއެވެ. އެގޮތުން މާލެ ސިޓީ ކައުންސިލްގެ ހުރިހާ ބާރުތަކެއް ހައުންސިން މިނިސްޓްރީއާއި ގުޅުންހުރި މިނިސްޓަރީތަކަށް ނަގާފައިވާއިރު، ކައުންސިލްތަކުގެ މުސާރަތައް ވެސް ވަނީ ކުޑަކޮށްފަ އެވެ.

މީގެއިތުރުން ގިނަ ކައުންސިލްތަކަކާއި ކައުންސިލަރުންތަކެއް ސަސްޕެންޑްކޮށް، އެކިއެކި ފިޔަވަޅުތައް އަޅާފައިވެ އެވެ.

ނަމަވެސް ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހުގެ ރިޔާސާ ވައުދުފުޅާއި އަދި މިހާރު ހިނގަމުންދާ 19 ވަނަ ރައްޔިތުންގެ މަޖިލީހުގެ ކެމްޕެއިންގައި އެމްޑީޕީން ވެފައިވާ އެޕާޓީގެ "އެޖެންޑާ 19"ގެ ވައުދާ އެއްގޮތަށް ލާމަރުކަޒީ ގާނޫނު މިހާރު ވަނީ ބޮޑެތި ބަދަލުތަކެއް ގެނެސް، އިސްލާހުކޮށް، އަމަލު ކުރަންފަށާފަ އެވެ. އެގޮތުން މިހާރު އެގާނޫނުގެ ދަށުން ކައުންސިލްތަކުގެ އިހުތިޞާސް ހިނގާ ބިންތަކާއި އިގްތިޞާދީ ހަރަކާތްތަކާއި އިޖުތިމާއި އަދި ތަރައްގީގެ މަޝްރޫއުތައް ހިންގުމުގެ ބާރު ކައުންސިލްތަކަށް ލިބިފައިވާއިރު، ދައުލަތުގެ ބަޖެޓުން ބޮޑުބައެއް ކައުންސިލްތަކަށް ލިބިދޭގޮތަށް އަދި އިތުރު މާލީ ބާރުވެރިކަންވެސް ވަނީ ގާނޫނުން ދީފަ އެވެ.