ވެލެންސިއާ އަދި އެތްލެޓިކޯގެ ކުރިމަތުލުން ހަމަހަމަ ވެގެން ނިމިއްޖެ

ސްޕެނިޝް ލަލީގާގައި ވެލެންސިއާ އަދި އެތްލެޓިކޯ ބައްދަލުކުރި މެޗު އެއްވަރު ވެގެން ނިމިއްޖެއެވެ.

ވެލެންސިއާ ދަނޑުގައި ކުޅުނު މި މެޗު ނިމިގެންދިޔައީ 2-2 ގެ ނަތީޖާއަކުންނެވެ.

މެޗުގެ ވަރަށް ކުރީކޮޅު އެތްލެޓިކޯއިން ލަނޑު ޖަހާ ވަނީ ލީޑު ނަގައިފައެވެ. މި ލަނޑު މެޗުގެ 15 ވަނަ މިނެޓުގައި އެޓީމަށް ކާމިޔާބުކޮށްދިނީ ލޮރެންޓޭ އެވެ. މި ލަނޑަށްފަހު ވެލެންސިއާއިން އެޓީމުގެ ކުޅުން ރަނގަޅުކުރިއިރު އެޓީމުން ވަނީ ގިނަ ހަމަލާތަކެއް އެތްލެޓިކޯގެ ގޯލަށް ފޮނުވައިލައިފައެވެ. މެޗުގެ 40 ވަނަ މިނެޓުގައި ވެލެންސިއާއިން ވަނީ ލަނޑުޖަހާ ނަތީޖާ ހަމަހަމަ ކޮށްފައެވެ. މި ލަނޑު ޖަހައިދިނީ ގެބްރިއަލް ޕައުލީސްޓާ އެވެ. ނަމަވެސް އޭގެ ތިން މިނެޓު ފަހުން އެތްލެޓިކޯއިން ވަނީ އިތުރު ލަނޑެއް ޖަހާ ލީޑު ދެވަނަ ފަހަރަށް ނަގައިފައެވެ. މިލަނޑު އެޓީމަށް ކާމިޔާބުކޮށްދިނީ ޓީ. ޕާޓޭ އެވެ.

މެޗުގެ ފުރަތަމަ ހާފު ނިމިގެންދިޔައީ 2-1 ގެ ނަތީޖާ އަކުން އެތްލެޓިކޯ ކުރީގައި އޮވެގެންނެވެ.

ދެވަނަ ހާފު ފަށައިގެން ވެލެންސިއާއިން އެޓީމުގެ އެޓޭކްތައް ރަނގަޅުކުރިއިރު މެޗުގެ 59 ވަނަ މިނެޓުގައި އެޓީމުން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ކޮންޑޯގްބިއާ އެވެ. މި ލަނޑަށްފަހު ވެސް ދެ ޓީމުގެ ކުޅުންތެރިންނަށް ލަނޑު ޖަހަން ވަނީ ފުރުސަތުތަކެއްލިބި ބޭކާރުވެފައެވެ.

މި ނަތީޖާއާއިއެކު އެތްލެޓިކޯއަށް ވަނީ ތާވަލުގެ ތިންވަނައަށް އަރަން ލިބުނު ފުރުސަތު ގެއްލިފައެވެ. އެތްލެޓިކޯއިން ތާވަލުގެ ހަތަރު ވަނައިގައި އޮތީ ކުޅުނު 24 މެޗުން ލިބުނު 40 ޕޮއިންޓާއިއެކުގައެވެ. ތާވަލުގެ އެއްވަނައިގައި އޮތް ރެއާލް މެޑްރިޑަށް ކުޅުނު 23 މެޗުން 52 ޕޮއިންޓް ލިބިފައިވާއިރު، ދެވަނައިގައި އޮތް ބާސެލޯނާއަށް ކުޅުނު 23 މެޗުން ލިބިފައިވަނީ 49 ޕޮއިންޓެވެ.