އެޓޯލްސް ކޮމިއުނިކޭޝަންގައި ޝައުނާގެ ހިއްސާއެއް ނެތް: އިކޮނޮމިކް މިނިސްޓްރީ
ޝައުނާއަށް ވަނީ އާއްމުންގެ ފާޑުކިޔުންތަކެއް އަމާޒުވެފައި
ރައީސް އޮފީހުގެ ޕޮލިސީ ސެކެރެޓަރީ އައިމިނަތު ޝައުނާ
ޓްރާންސް މޯލްޑިވިއަން އެއަވޭސް (ޓީއެމްއޭ) އަށް މީޑިއާ ކަންކަމުގައި ލަފާދޭ އެޓޯލް ކޮމިއުނިކޭޝަންސް ކުންފުނީގައި ރައީސް އޮފީހުގެ ޕޮލިސީ ސެކްރެޓަރީ އައިމިނަތު ޝައުނާގެ ހިއްސާ ނޯއްނާނެ ކަމަށް އިކޮނޮމިކް މިނިސްޓްރީން ބުނެފިއެވެ.
އެޓޯލްސް ކޮމިއުނިކޭޝަންސް އަކީ ކުރީގެ ރައީސް މުހައްމަދު ނަޝީދުގެ ވެރިކަމުގައި ރައީސް އޮފީހުގެ ކޮމިއުނިޓީ ސްޓްރެޓެޖިސްޓެއްގެ ގޮތުގައި މަސައްކަތް ކުރެއްވި ޕޯލް ރޮބާޓްސް އިސްވެ ހުންނަވައި އުފެއްދި ކުންފުންޏެއްކަން ވަނީ ހާމަވެފައެވެ. އަދި ކުންފުނީގެ ހިއްސާދާރުންގެ ގޮތުގައި ޝައުނާގެ ފިިރިކަލުން މުހައްމަދު ތޯރިގު ހަމީދު ހިމެނިވަޑައިގަންނަވައެވެ.
އެކުންފުނީގައި ޝައުނާގެ ހިއްސާ އޮންނަ ކަމަށްބުނާ އަޑުތައް ވަނީ ޝޯޝަލް މީޑިއާގައި ގަދަވެފައެވެ. ޝޯޝަލް މީޑިއާގައި ދައުރުވާ ރިޕޯޓްތައް ބުނާ ގޮތުން އެ ކުންފުންޏަކީ ޓީއެމްއޭއަށް އެކި ކަންތައްތަކުގައު ލަފާދޭ ކުންފުންޏެއް ކަމަށް މީޑިއާތަކުގައި ވަނީ ރިޕޯޓްކޮށްފައެވެ. އެކަމަކު ކުންފުނީގެ ވެބްސައިޓް ޝައުނާގެ ހިއްސާއެއް އޮންނަ ކަމަކަށް ނުވެއެވެ. އެކަމާއި ގުޅިގެން އޭނާއަށް ފާޑުކިޔުންތައް ވަނީ އަމާޒުވެފައެވެ.
އެކަމާއި ގުޅިގެން ޝައުނާ ވަނީ ޓްވީޓްތަކެއް ކުރައްވައި ދެކެވެމުންދާ ވާހަކަތައް ދޮގުކުރައްވާފައެވެ. އޭނާ ވިދާޅުވީ، އެ ކުންފުނީގައި އޭނާގެ ހިއްސާ އެއް ނުވަތަ އެއްވެސް ދައުރެއް ނޯއްނާނެ ކަމަށެވެ. އަދި އޮޅިގެންވެސް އޭނާގެ ނަން އޮތްނަމަ އެކަން އިސްލާހު ކުރުމަށް ޝައުނާ ވަނީ އިކޮނޮމިކް މިނިސްޓްރީގެ ޓްވިޓަރ އެކައުންޓް ޓެގްކޮށް ޓްވީޓް ކުރައްވާފައެވެ.
ޝައުނާގެ ޓްވީޓަށް ޖަވާބުދެމުން އިކޮނޮމިކް މިނިސްޓްރީން ކޮށްފައިވާ ޓްވީޓެއްގައި ބުނީ، ހުސްވި އަހަރުގެ ފެބްރުއަރީ މަހުގެ 20 ގައި ޝައުނާގެ ހިއްސާ ދޫކޮށްލާފައިވާ ކަމަށެވެ. އެހެންވުމާއި އެކު ޝައުނާ އަކީ މިހާރު އެޓޯލްސްގެ މެނޭޖިން ޕާޓްނާއެއް ނޫން ކަމަށެވެ. އަދި މިހާރު ކުންފުނީގެ ރަޖިސްޓްރީ އިސްލާހު ކޮށްފައިވާނެ ކަމަށެވެ.
ޝައުނާގެ ހިއްސާ ކުންފުނީގައި ނެތަސް އެ ކުުންފުނީގައި އޭނާގެ ފިރިކަލުންގެ ހިއްސާ އޮންނާތީވެ ފާޑުކިޔާ ފަރާތްތަކުން އަންނަނި މެދުކެޑުމެއްނެތި ފާޑު ކިޔަމުންނެވެ.
ރާއްޖެ.އެމްވީއާ ވާހަކަ ދައްކަމުން ތޯރިގު ވިދާޅުވީ، ''ޝައުނާ އެންޑް ރޮބަޓްސް'' ގެ ނަމުގައި އޭނާގެ އަންހެނުން ޕީއާރް ފާމެއް ހިންގި ކަމަށެވެ. އެކަމަކު ރައީސް އޮފީހުގެ ޕޮލިސީ ސެކެރެޓަރީގެ މަގާމާއި ހަވާލުވެވަޑައިގެންނެވި ފަހުން ކުންފުނީގެ ނަން ''އެޓޯލްސް ކޮމިއުނިކޭޝަން'' ގެ ނަމަށް ބަދަލުކޮށްފައިވާ ކަމަށެވެ. އަދި ޝައުނާގެ އެއްވެސް ކަހަލަ މަސްލަހަތެއް ކުންފުނީގައި ނުވާނެ ކަމަށް އޭނާ ވިދާޅުވިއެވެ.
