ކުރިއަށް އޮތް ފުޓްބޯލް އެސޯސިއޭޝަން އޮފް މޯލްޑިވްސް (އެފްއޭއެމް) ގެ އިންތިޚާބުގައި މިހާރުވެސް އެ އިދާރާގެ ރައީސް ބައްސާމް އަދީލް ޖަލީލަށް ތާޢީދުކުރުމަށް ދަ ގްރާންޑޭ ސްޕޯޓްސް ކުލަބާއި ޔުނައިޓެޑް ވިކްޓަރީ (ޔޫވީ) އިންވެސް ނިންމައިފިއެވެ.

މީގެކުރިން އެފްއޭއެމްގެ ރައީސް ބައްސާމް ވަނީ އެ އިދާރާގެ އިންތިޚާބު އަވަސް ކުރުމަށް އެފްއޭއެމްގެ ހިންގާ ކޮމެޓީއަށް ހުށަހަޅުއްވައި، އެކަމަށް ހިންގާ ކޮމެޓީން އެއްބަސްވެފައިވާކަން އިޢުލާނުކުރައްވާފައެވެ. އެހެންކަމުން މާޗު މަހުގެ ތެރޭގައި އެފްއޭއެމްގެ އިންތިޚާބު ބާއްވަން ހިންގާ ކޮމެޓީން ނިންމާފައިވާ ކަމަށް ބައްސާމް ވިދާޅުވި އެވެ.

ބައްސާމްގެ އެ ޓްވީޓާއެކު މިހާރު ފުރަތަމަ ޑިވިޝަނުގެ ފަސް ކުލަބަކުން ވަނީ އޭނާއަށް ތާޢީދުކުރާނެކަން ހާމަކޮށްފައެވެ. އެއީ ދަ ގްރާންޑޭ އާއި، ޔޫވީގެ އިތުރުން ޓީސީ ސްޕޯޓްސް ކްލަބާއި، ކްލަބު ގްރީން ސްޓްރީޓްސްގެ އިތުރުން މާޒިޔާ ސްޕޯޓްސް އެންޑް ރެކްރިއޭޝަނެވެ.

އެ ހުރިހާ ކުލަބުތަކަކުންވެސް ބުނީ އެފްއޭއެމްގެ ރައީސްގެ މަޤާމު އެންމެ ހައްގުވާ ބޭފުޅަކީ ބައްސާމް ކަމަށާއި، ދެވަނަ ދައުރަކަށް ބައްސާމް އިންތިޚާބުކުރަން ޖެހޭ ކަމަށެވެ.

ފުރަތަމަ ޑިވިޝަނުގެ ފަސް ކުލަބުގެ އިތުރުން ދެވަނަ ޑިވިޝަނުގެ ކުލަބު ޕީކޭ އިންވެސް ވަނީ ބައްސާމަށް ތާޢީދުކުރާނެކަން ހާމަކޮށްފައެވެ.

އެފްއޭއެމްގެ ރައީސް ބައްސާމުގެ ފުރަތަމަ ދައުރު ހަމަވާނީ މިއަހަރުގެ ނޮވެންބަރު މަހުގެ 20 ވަނަ ދުވަހު އެވެ. އެފްއޭއެމްގެ އިންތިޚާބު ނޮވެންބަރު 20 ގެ ކުރިން ބާއްވަން އެއެސޯސިއޭޝަންގެ ހިންގާ ޤަވާއިދުގައި ބުނެއެވެ.

އެފްއޭއެމްގެ ރައީސްގެ މަޤާމުން ބައްސާމް ވަކިކުރުމަށް ނިމިދިޔަ އަހަރު ބައެއް ކުލަބުތަކުން މަސައްކަތް ކޮށްފައިވާއިރު، އޭގެ ތެރޭގައި ރާއްޖޭގެ އެންމެ ބޮޑު ދެ ކުލަބު ކަމަށްވާ ނިއުރޭޑިއަންޓް ސްޕޯޓްސް ކްލަބާއި، ވިކްޓަރީ ސްޕޯޓްސް ކްލަބު ހިމެނެއެވެ. އެކަމަކު އެ ދެ ކުލަބު މިހާރު ވަނީ ފުޓްބޯޅައިގެ ހުރިހާ ޙަރަކާތްތަކުން ސަސްޕެންޑް ކޮށްފައެވެ.