ކުރިން ވިސާ ނެގުމަކާނުލާ އުމްރާ އަށް ދެވޭގޮތަށް ހަމަޖެހިއްޖެ
12 ފެބުރުއަރީ 2020 | ބުދަ 09:58މިކަމަށްޓަކައި ކުރަންޖެހޭ އިދާރީ މަސައްކަތްތައް ސައުދީ ސަރުކާރުން މިހާރު ކުރަމުން އަންނަކަމަށްވެސް މިނިސްޓަރ ވިދާޅުވި
ފޮރިން މިނިސްޓަރ އަބްދުﷲ ޝާހިދު
އުމްރާ އަށް ދާ ދިވެހިންނަށް ކުރިން ވިސާ ހޯދަމަކާނުލާ އޮންއެރައިވަލް ވިސާ ހަމަޖެހިފައިވާކަމަށް ފޮރިން މިނިސްޓަރ އަބްދުﷲ ޝާހިދު ވިދާޅުވެއްޖެ އެވެ.
މިކަން އިއުލާންކުރުމަށް ފޮރިން މިނިސްޓްރީގައި ބޭއްވި ނޫސްވެރިންގެ ބައްދަލުވުމުގައި ފޮރިން މިނިސްޓަރ އަބްދުﷲ ޝާހިދު ވިދާޅުވީ އޮން އެރައިވަލް ވިސާ ލިބޭނެކަމުގެ ޔަގީންކަން ސައުދީ ސަރުކާރުން ދީފައިވާކަމަށެވެ. އަދި މިވިސާ ލިބޭނީ ހަމައެކަނި އުމްރާގެ އަޅުކަމަށް ދާ ފަރާތްތަކާއި ފަތުރުވެރިއެއްގެ ގޮތުގައި ސައުދީއަށް ދާ ފަރާތްތަކަށް އެކަނިކަމަށް މިނިސްޓަރ ވިދާޅުވި އެވެ. މިކަމަށްޓަކައި ކުރަންޖެހޭ އިދާރީ މަސައްކަތްތައް ސައުދީ ސަރުކާރުން މިހާރު ކުރަމުން އަންނަކަމަށްވެސް މިނިސްޓަރ ވިދާޅުވި އެވެ.
ކިޔެވުމަށާއި އެނޫންކަންކަމަށް ސައުދީއަށްދާ ފަރާތްތަކަށް އޮންއެރައިވަލް ވިސާ ނުލިބޭނެކަމަށާއި ހައްޖަށްދާ ފަރާތްތަކުންވެސް ކުރިއެކޭ އެއްގޮތަށް ވިސާއަށް އެދެންޖެހޭނެކަމަށް ޝާހިދު ވިދާޅުވި އެވެ. އޮން އެރައިވަލް ވިސާއަށް އެދެވޭނެ ތާރީޚެއް ރަސްމީކޮށް ލަހެއްނުވެ އިއުލާން ކުރެވޭނެކަމަށް އަންގަވާފައިވާކަމަށް ޝާހިދު ވިދާޅުވި އެވެ.
މިކަމަކީ ރައީސުލްޖުމްހޫރިއްޔާ އިބްރާހީމް މުހައްމަދު ޞާލިހާއި ސައުދީ ރަސްގެފާނު އަދި ވަލީއަހުދާ އޮތް އެކުވެރިކަމުގެ ގުޅުން ދައްކުވައިދޭކަމެއް ކަމަށްވެސް މިނިސްޓަރ ވިދާޅުވި އެވެ.
އީ-ވިސާއަށް އެދޭ ފަރާތްތަކަށް، ވިސާއަށް އެދި ހުށަހަޅާތާ 30 މިނެޓުގެ ތެރޭގައި ވިސާ ލިބޭނެއެވެ. އޮން އެރައިވަލް ވިސާއަށް އެދޭ ފަރާތްތަކަށް، އިލެކްޓްރޯނިކް ކިއޮސްކް ނުވަތަ އިމިގްރޭޝަން ކައުންޓަރުން ވަޤުތުން އޮން އެރައިވަލް ވިސާ ލިބޭނެއެވެ. އަދި ކޮންސިއުލޭޓް ވިސާއަށް އެދި ހުށަހަޅާފަރާތްތަކަށް، ވިސާއަށް އެދިހުށަޅާތާ އެއް ދުވަހާއި ދެ ދުވަހާ ދޭތެރޭގައި ރަސްމީދުވަހުގެ ތެރޭގައި ވިސާ ލިބޭނެއެވެ.
ފޮރިން މިނިސްޓްރީން ބުނީ ސަޢޫދީ ޢަރަބިއްޔާގެ ވިސާގެ އަގަކީ 440.00 ސަޢޫދީ ރިޔާލް ކަމަށެވެ. މި ޢަދަދުގެ އިތުރުން ވީ.އޭ.ޓީ އަދި ޕްރޮސެސިންގ ފީ ދައްކަންޖެހޭނެއެވެ. ވިސާ ފީގެ 440.00 ސަޢޫދީ ރިޔާލްގައި ހިމެނެނީ ވިސާ ބޭސް ފީ 300.00 ސަޢޫދީ ރިޔާލް އަދި ހެލްތު އިންޝުއަރެންސް ދީ 140.00 ސަޢޫދީ ރިޔާލް އެވެ.
އީ-ވިސާ ނުވަތަ ވިސާ އޮން އެރައިވަލްގެ ވިސާ ފީ ދައްކަން ޖެހޭނީ ކްރެޑިޓް ކާޑު މެދުވެރިކޮށް ސަޢޫދީ ރިޔާޟުން ކަމަށް ފޮރިން މިނިސްޓްރީން މައުލޫމާތުދެ އެވެ.
މީގެއިތުރުން ޝާހިދު ވިދާޅުވީ ދިވެހިރާއްޖެއަކީ އޮންއެރައިވަލް ވިސާ ސައުދީން ލިބޭ ހަމައެކަނި ދެކުނު އޭޝިޔާގެ ގައުމުކަމަށެވެ. މިހާރު ކުރިން ވިސާ ނެގުމަކާނުލާ 84 ގައުމަކަށް ދިވެހިންނަށް ދަތުރުކުރެވޭނެ އިންތިޒާމު ވަނީ ހަމަޖެހިފަ އެވެ.
