މަދަނީ އިޖުރާއަތުގެ ބިލާއިއެކު ބޭންކުތަކާއި ޝަރީއަތުގެ ނިޒާމުގައި އެޅިފައިވާ ތަޅު ނެއްޓުމަށް ފަސޭހަވެގެންދާނެ: ނަޝީދު
މަދަނީ ދަޢުވާތަކާބެހޭ އުޞޫލުތައް ބިލުގައި ބަޔާންކޮށްފައިވޭ
ރައްޔިތުންގެ މަޖިލިސް
މަދަނީ އިޖުރާއަތުގެ ބިލާއިއެކު ބޭންކުތަކާއި ޝަރީއަތުގެ ނިޒާމުގައި އެޅިފައި އޮތް ތަޅު ނެއްޓުމަށް ފަސޭހަވެގެންދާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ބުދަ ދުވަހުގެ ޖަލްސާގައި މަދަނީ އިޖުރާއަތުގެ ބިލު ހުށަހަޅާފައިވެއެވެ. އެގޮތުން މި ބިލު ހުށަހެޅުއްވީ ކެލާ ދާއިރާގެ މެމްބަރު އިބްރާހިމް ޝަރީފެވެ.
ބިލަށް އަލި އަޅުއްވާލައްވާ ވާހަކަ ދައްކަވަމުން ނަޝީދު ވިދާޅުވީ މަދަނީ އިޖުރާއަތުގެ އެއްވެސް ކަމެއް މިއަދާ ހަމަޔަށް ވެސް ނެތް ކަމަށެވެ. މަދަނީ އިޖުރައަތުގެ ގަވާއިދަކާއި ހަމަތަކާއި ގާނޫނުތައް ބައިނަލްއަގްވާމީ ބެސްޓް ޕްރެކްޓިސްއާއި އެއްހަމައެއްގައި ނެތުމުން ދިވެހި ރާއްޖޭގެ މަދަނީ، ޚާއްސަކޮށް، ވިޔަފާރީގެ މުއާމަލާތްތަކަށް ވަރަށް ބޮޑެތި ހީނަރުކަމެއް ލިބެމުން އަންނަކަން އެމަނިކުފާނު ފާހަގަކުރެއްވިއެވެ. އެގޮތުން ބޭންކުގެ މުއާމަލާތްތަކަށް ވަރަށް ބޮޑެތި ހީނަރުކަމާއި ގެއްލުންތައް ލިބެމުންދާކަމަށް އެމަނިކުފާނު ވިދާޅުވިއެވެ.
ރައީސް ނަޝީދު ވިދާޅުވީ ގިނަ ފަރާތްތަކެއް ދެކޭގޮތުގައި ދިވެހި ރާއްޖޭގެ ތަރައްގީގެ ދުވެލި ހުއްޓިފައިވަނީ ވިޔަފާރީގެ މުއާމަލާތްތައް ހިންގުމުގައި ބޭންކުތަކާއި ޝަރީއަތުގެ ނިޒާމާއި އެޅިފައި އޮތް ތަޅުގެ ސަބަބުންކަމަށެވެ. އެގޮތުން ރާއްޖެ ފަދަ މެދު އާމްދަނީގެ ގައުމުތަކުގައި އުފެއްދުންތެރިކަން އާއްމުކޮށް ހިފެހެއްޓޭ ކަމަށެވެ.
ރައީސް ނަޝީދު ވިދާޅުވީ އެހިސާބަށް ދިވެހިރާއްޖެއަށް ވެސް ދެވިދާނެ ކަމަށް ގަބޫލު ކުރައްވާ ކަމަށެވެ. އެގޮތުން އެޖެންޑާ 19 އާއި ރައިސުލްޖުމްހޫރިއްޔާ އިބްރާހިމް މުހައްމަދު ސޯލިހުގެ ރިޔާސީ ވައުދުތަކުން އެ ހަމަތައް ގަބޫލުކުރާ ކަމަށެވެ. މަދަނީ އިޖުރާއަތުގެ ގާނޫނެއް ތައާރަފުވެ، އެ ގާނޫނަށް އަމަލު ކުރަން ފެށުމާއެކު އެ 'ތަޅުތަކުން' ނެއްޓުމަށް ފަސޭހަވެގެންދާނެ ކަމަށް އެމަނިކުފާނު ވިދާޅުވިއެވެ.
މަދަނީ އިޖުރާއަތުގެ ބިލަކީ މަދަނީ ދަޢުވާތަކާބެހޭ އުޞޫލުތަކާއި، ޝަރީޢަތަށް މައްސަލަ ފޮނުވުމުގެ ކުރިން މައްސަލަ ޙައްލުކުރުމުގައި ޢަމަލުކުރާނެ އުޞޫލުތަކާއި، ޝަރީޢަތަށް ހުށަހެޅޭ މައްސަލަތަކުގެ ޝަރީޢަތް ހިންގުމުގެ އުޞޫލުތަކާއި، ހެއްކާބެހޭ ބައެއް އުޞޫލުތައް ބަޔާން ކުރާ ބިލެކެވެ. މީގެ އިތުރުން ރާއްޖެއިން ބޭރުގެ ކޯޓުތަކުގައި ކޮށްފައިވާ ޙުކުމްތައް ދިވެހިރާއްޖޭގައި ތަންފީޒުކުރުމާގުޅޭ އުޞޫލުތަކާއި، ޙުކުމް ތަންފީޒުކުރުމާގުޅޭ އުޞޫލުތަކާއި، އިސްތިޢުނާފުކުރުމާގުޅޭ އުޞޫލުތަކާއި، އެނޫންވެސް މަދަނީ އިޖުރާޢަތާގުޅޭ ޢާންމު އުޞޫލުތައް ބިލުގައި ވެއެވެ.
