މިހާރު ދުނިޔޭގެ އެކި ގައުމުތަކުގައި ފެތުރެމުންދާ ނޮވެލް ކޮރޯނާވައިރަސް އާއި ގުޅިގެން ރާއްޖޭގެ އިގްތިސާދަށް ވެސް އަސަރު ކުރާނެ ކަމަށާއި އެކަމުގެ ގެއްލުންތައް ފެންނަން ފަށާނީ ދެތިން މަސް ފަހުން ކަމަށް ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެ އެވެ.

ރައްޔިތުންގެ މަޖިލީހުގެ ޖަލްސާގައި ހޯރަފުށި ދާއިރާގެ މެމްބަރު އަހުމަދު ސަލީމް ކުރެއްވި ސުވާލަށް ޖަވާބުދެއްވަމުން އަމީރު ވިދާޅުވީ ނޮވެލް ކޮރޯނާވައިރަސްއާއި ގުޅިގެން ރާއްޖެއާއި މުޅި ދުނިޔޭގެ ގައުމުތަކަށް އިގްތިސާދީ ގޮތުން އަސަރުކުރާނެ ކަމަށެވެ. އެގޮތުން މި ވައިރަސްގެ ސަބަބުން އިގްތިސާދީ ގޮތުން ގޮންޖެހުންތަކާއި ކުރިމަތިވާނެ ކަމަށް އިގްތިސާދީ މާހިރުން ލަފާ ކޮށްފައިވާކަމަށެވެ. މިނިސްޓަރ ވިދާޅުވީ ރިސެޝަނަކަށް ނުދިޔަސް ކޮންމެސް ވަރެއްގެ ލޮޅުމެއް އެކި ގައުމުތަކަށް އަންނާނެ ކަމަށް ކަމުގެ މާހިރުން ލަފާކުރައްވާކަމަށެވެ.

ރާއްޖޭގެ އިގްތިސާދަށް އަސަރު ކުރާނެ ކަން ފާހަގަކުރައްވާ މިނިސްޓަރ ވިދާޅުވީ އާމްދަނީ ދަށްވެގެންދާނެ ކަމަށް ލަފާ ކުރެވޭ ކަމަށެވެ. އަދި އެކަން އެނގޭނީ ދެތިން ހަތަރުމަސްފަހުން ކަމަށެވެ.

ނަމަވެސް މިއަހަރަށް ރޭވިފައި ހުރި އެއްވެސް ޕަބްލިކް ސެކްޓަރ މަޝްރޫއުއެއް ހުއްޓާލުމަށް ނިންމާފައިނުވާކަމަށާއި ބަޖެޓުގައި ރޭވިފައި ހުރި ގޮތަށް މަޝްރޫއުތައް ކުރިއަށްދާނެ ކަމަށެވެ.

ޗައިނާ އަކީ ދުނިޔޭގެ އެންމެ ބޮޑު އެއް އިގްތިސާދުކަން ފާހަގަކުރައްވާ މިނިސްޓަރ ވިދާޅުވީ ޗައިނާގެ އިގްތިސާދަށް އަންނާނެ ލޮޅުމަކީ ދުނިޔޭގެ ހުރިހާ ގައުމުތަކުގެ އިގްތިސާދަށް އަންނާނެ ލޮޅުމެއް ކަމަށެވެ. ރާއްޖޭގެ އިގްތިސާދަށްވެސް މީގެ ސަބަބުން ލޮޅުންތަކެއް އަރާނެކަމަށް ލަފާ ކުރެވޭތީ ފިނޭންސް މިނިސްޓްރީގެ ފަރާތުން ދައުލަތުގެ ޚަރަދު ކުޑަ ކުރުމަށް އަންގާފައިވާނެ ކަމަށާއި އެގޮތުން ޚަރަދު ކުޑަ ކުރުމަށްޓަކައި ޓާގެޓް ކުރަން ބޭނުންވަނީ ވީހާވެސް ބޮޑަށް ރިކަރަންޓް ހަރަދުތައް މަދުކުރުމަށް ކަމަށް މިނިސްޓަރ ވިދާޅުވިއެވެ.