ދިއްދޫއިން ހައުސިންގ ޔުނިޓް ލިބޭ މީހުންނާއި ނުލިބޭ މީހުންގެ ލިސްޓް އާންމުކޮށްފި

ހއ ދިއްދޫގައި ޢިމާރާތްކުރެވިފައިވާ ހައުސިންގ ޔުނިޓް ލިބުނު މީހުންނާއި ނުލިބޭ މީހުންގެ ލިސްޓް ޢާންމުކޮށްފިއެވެ.

ދިއްދޫ ކައުންސިލުން ބުނީ ދިއްދޫގައި ޢިމާރާތްކުރެވިފައިވާ ހައުސިންގ ޔުނިޓްގެ ތެރެއިން 110 ހައުސިންގ ޔުނިޓް ލިބޭ ފަރާތްތަކުގެ ދާއިމީ ލިސްޓާއި އަދި އެކިއެކި ސަބަބުތަކާއިހުރެ ހައުސިން ޔުނިޓް ނުލިބޭ ފަރާތްތަކުގެ ލިސްޓް މިހާރު ޢާންމުކޮށްފައިވާނެ ކަމަށެވެ.

އަދި އެކިއެކި ސަބަބުތަކާއި ހެދި ހައުސިން ޔުނިޓް ނުލިބޭ ފަރާތްތަކުން މި ލިސްޓާ މެދު އެއްވެސް ޝަކުވާއެއް އޮތް ނަމަ، މިމަހުގެ 16 ވާ އާދީއްތަ ދުވަހުގެ މެންދުރު 1:00 ގެ ކުރިން އެ ކަމަށް ޚާއްޞަކުރެވިފައިވާ ފޯމުން އެ ޝަކުވާއެއް ކައުންސިލަށް ހުށަހެޅުއްވުމަށް ވަނީ އެދިފައެވެ.

އަދި މި ފޯމު ބުދަ ދުވަހުން ފެށިގެން ކައުންސިލްގެ އިދާރާއިން ލިބެން ހުންނާނެ ކަމަށްވެސް ދިއްދޫ ކައުންސިލުން ބުނެއެވެ. އެކިއެކި ސަބަބުތަކާއިހުރެ ހައުސިން ޔުނިޓް ނުލިބޭ ފަރާތްތަކުގެ ލިސްޓާ ގުޅިގެން އެ ކައުންސިލަށް އެއްވެސް ޝަކުވާއެއް ހުށަހެޅިއްޖެނަމަ، އެ ޝަކުވާއަކަށް ކައުންސިލުން ޖަވާބު ދޭނެކަމަށް ވެސް ދިއްދޫ ކައުންސިލުން ބުނެއެވެ.

ހައުސިން ޔުނިޓް 110 ފަރާތަކަށް ލިބިފައިވާ އިރު، ހައުސިން ޔުނިޓް ނުލިބެނީ 45 ފަރާތަކަށެވެ.