އައްޑޫ އެއާރޕޯޓްގެ ހާލަތު ބެލުމަށް އެސްއޯއީ ކޮމެޓީގެ މެންބަރުން އައްޑޫއަށް ވަޑައިގަންނަވަނީ!
11 ފެބުރުއަރީ 2020 | އަންގާރަ 17:27މައްސަލަ ހުށަހެޅުއްވޯ ފޭދޫ ދާއިރާގެ މެމްބަރު މުހައްމަދު ނިހާދު
ާއައްޑޫ ސިޓީ އެއަރޕޯޓް
އައްޑޫ އިންޓަނޭޝަނަލް އެއަރޕޯޓުގެ ޙާލަތު ބެލުމަށް ރައްޔިތުންގެ މަޖިލީހުގެ ސްޓޭޓް އޯންޑް އެންޓަރޕްރައިސަސް (އެސްއޯއީ) ކޮމެޓީގެ މެންބަރުންގެ ޓީމެއް އައްޑޫ ސިޓީއަށް ވަޑައިގެންނެވުމަށް ނިންމައިފި އެވެ.
އަންގާރަ ދުވަހު ބޭއްވި އެސްއޯއީ ކޮމެޓީގެ ބައްދަލުމުގައި އެކޮމެޓީން ނިންމާފައިވަނީ އެމައްސަލަ ހުށަހެޅުއްވި އައްޑޫ ސިޓީ ފޭދޫ ދާއިރާގެ މެންބަރު މުޙައްމަދު ނިހާދާއި، އެސްއޯއީ ކޮމެޓީގެ މުޤައްރިރު އިލްޔާސް ލަބީބް ހިމެނިވަޑައިގަންވާ ގޮތަށް، އަދި އެކޮމެޓީގައި ހިމެނޭ އެހެން ސިޔާސީ ޕާޓީތަކުގެ މެންބަރުންގެ ތެރެއިން އައްޑޫ ސިޓީއަށް ވަޑައިގެންނެވެން ތިއްބެވި މެންބަރުންނާއެކު އައްޑޫ އިންޓަރނޭޝަނަލް އެއަރޕޯޓްގެ ޙާލަތު ބެލުމަށް ވަޑައިގެންނެވުމަށެވެ.
އިލްޔާސް ލަބީބް ވިދާޅުވީ، މިހަފުތާގެ ބުރާސްފަތި ދުވަހު، އައްޑޫ އިންޓަރނޭޝަނަލް އެއަރޕޯޓް ޕްރައިވެޓް ލިމިޓެޑްގެ ވެރިން އައްޑޫ ސިޓީގައި އުޅުއްވާނެ ކަމަށް ވިދާޅުވެފައިވާތީ، އެދުވަހާ ދިމާކޮށް، ކޮމެޓީގެ ޓީމެއް އައްޑޫ ސިޓީއަށް ވަޑައިގެންނެވޭގޮތް ވެއްޖެނަމަ، އައްޑޫ އިންޓަރނޭޝަނަލް އެއަރޕޯޓުގެ ޙާލަތާއި އަދި ހިންގުން ހަރުދަނާ ކުރުމަށް ކުރެވިދާނެ ކަންކަމާމެދު މަޝްވަރާ ކުރުމުގެ ފުރުޞަތު ފުޅާދާއިރާއެއްގައި ލިބިގެންދާނެ ކަމަށް ބެލެވޭ ކަމަށެވެ.
ނަމަވެސް ބުރާސްފަތި ދުވަހު އެހެން ސިޔާސީ ޕާޓީތަކަށް ނިޞްބަތްވާ ބައެއް މެންބަރުންގެ މަޖިލީހުގެ މަސައްކަތްތަކުގައްޔާއި އަދި އެހެންނިހެންކަންކަން ރޭވިފައިވާ ގޮތުން، ބުރާސްފަތި ދުވަހު އައްޑޫއަށް ވަޑައިގެންނެވުމަށް ދަތިތަކެއް ހުރިކަމަށް ބައެއް މެންބަރުން ވަނީ ވިދާޅުވެފަ އެވެ.
އެހެންކަމުން ކޮމެޓީން ނިންމާފައިވަނީ، އަންނަ ހަފުތާގައިނަމަވެސް ޓިކެޓު ހަމަޖެހޭ ދުވަހެއް ބެލުމަށްފަހު، އަދި ކޮމެޓީގެ މެންބަރުންގެ ޓީމެއް އައްޑޫއަށް ވަޑައިގެންނެވުމަށެވެ.
