މަސްވެރިކަމާއި ގުޅުންހުރި ގަވާއިދުތައް ނުހެދި ލަސްވާތީ މެމްބަރުންގެ ކަންބޮޑުވުން
10 ފެބުރުއަރީ 2020 | ހޯމަ 10:35މަސްވެރިކަމުގެ ޤާނޫނުގެ ދަށުން ފިޝަރީޒް މިނިސްޓްރީން 18 ގަވައިދެއް އެކުލަވާލަންޖެހޭ
ފިޝަރީޒް މިނިސްޓަރ ޒަހާ ވަހީދު
މިދިޔަ އަހަރުގެ ސެޕްޓެމްބަރ މަހު ތަސްދީޤުކުރި މަސްވެރިކަމާއި ބެހޭ ޤާނޫނުގެ ދަށުން ފިޝަރީޒް މިނިސްޓްރީން ހަދަންޖެހޭ ގަވާއިދުތައް ނުހެދި ލަސްވަމުންދާތީ މެމްބަރުން ކަންބޮޑުވުން ފާޅުކުރައްވައިފި އެވެ.
ރައްޔިތުންގެ މަޖިލީހުގެ ހޯމަ ދުވަހުގެ ޖަލްސާގައި މެމްބަރުން ތަކުރާރުކޮށް މިނިސްޓަރާއި ކުރެއްވި އެއް ސުވާލަކީ މަޖިލީހުން ބޮޑެތި އިސްލާހުތަކަކާއެކު ފާސްކޮށްފައިވާ މަސްވެރިކަމާއި ބެހޭ ޤާނޫނުގެ ނަތީޖާ ފެންނަވަރު ވާނީ ކޮންއިރަކުންތޯ އާއި އޭގައި ހުރި ގަވާއިދުތައް ހެދުމުގެ މަސައްކަތްތައް ގޮސްފައިވާ ހިސާބާ ގުޅޭގޮތުންނެވެ. އެސުވާލުތަކަށް ޖަވާބު ދެއްވަމުން މިނިސްޓާރ ވިދާޅުވީ މަސްވެރިކަމުގެ ޤާނޫނުގެ ދަށުން ފިޝަރީޒް މިނިސްޓްރީން 18 ގަވައިދެއް އެކުލަވާލަންޖެހޭ ކަމަށެވެ.
މިހުރިހާ ގަވާއިދެއް ހެދުމުގެ މަސައްކަތް މިނިސްޓްރީން މިހާރު ފަށާފައިވާކަމަށް މިނިސްޓާރ ވިދާޅުވި އެވެ. އަދި މިވަގުތަށް މަސްވެރިކަމުގެ މެނޭޖްމެންޓް ފްރޭމް ވޯރކް ފުރިހަމައަށް ހިންގުމަށް 4 ގަވާއިދެއް ހަދަންޖެހޭ ކަމަށް މިނިސްޓަރ ވިދާޅުވި އެވެ. އެ ގަވާއިދު ތަކަކީ ލައިސަންސް ދިނުމާއި ބެހޭ ގަވާއިދު ، ގަވައިދާ ޚިލާފުވާ ފަރާތްތަކާމެދު ޖޫރިމަނާކުރުމާއި ފިޔަވަޅު އެޅުމާއި ބެހޭ ގަވާއިދު، ޕޯޓް ސްޓޭޓް މެޝަރމެންޓް ގަވާއިދު އަދި މަސްވެރިކަމުގެ އާންމު ގަވާއިދެވެ.
މެނޭޖްމެންޓް ޕްލޭންގެ ތެރެއިން މަސްވެރިކަމުގެ ޤާނޫނު ގެ ދަށުން 12 މެނޭޖްމެންޓް ޕްލޭނެއް މިނިސްޓްރީގެ ފަރާތުން ތައްޔާރުކޮށް 12 މަސްދުވަސްތެރޭގައި އާންމުކުރަންޖެހޭ ކަމަށް މިނިސްޓަރ ވިދާޅުވި އެވެ. 12 މަސް ދުވަސްތެރޭގައި ފުރިހަމަ ދިރާސާގެ މައްޗަށް އެކުލެވޭ 12 މެނޭޖްމެންޓް ޕްލޭން ތައްޔާރުކުރުމަށް އެކަށީގެންވާ މިންވަރެއް އެކަމުގެ ތަޖުރިބާ އާއި ތަމްރީނު ތިބި މުވައްޒަފުން މިނިސްޓްރީގައި ނެތްކަމަށް މިނިސްޓާރ ވިދާޅުވި އެވެ.
މިނިސްޓަރ މިގަވާއިދުތަކުގެ ތަފްސީލު ދެއްވުމުން މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވީ ސެޕްޓެމްބަރ މަހު ޤާނޫނު ތަންފީޒުކުރެވިފައިވާކަމަށާއި 3 މަސް ތެރޭގައި ގަވައިދު ހަދަންޖެހޭ ކަމަށެވެ. ފެންނަ ގޮތުގައި މިއަދު އެގަވާއިދު އިއުލާން ކުރައްވަންވާނެ ކަަމަށް ނަޝީދު ވިދާޅުވި އެވެ.
މީގެއިތުރުން ރައީސް ނަޝީދު ވިދާޅުވީ ގަވާއިދު ކޮމިޓީގެ ބައްދަލުވުމެއް ބޭއްވުމަށް އެދިވަޑައިގަންފައިވާ ކަމަށެވެ. މަސްވެރިކަމުގެ ޤާނޫނުގައި ހުރި ގަވާއިދުތައް ހެދުމުގެ މުއްދަތުތައް އެބަހުރިކަމަށާއި އެގަވާއިދުތައް މިނިސްޓްރީން އެކުލަވާލެއްވުމުގެ ޒިންމާ މަތިކޮށްފައިވަނީ ގަވާއިދު ކޮމިޓީއަށް ކަމަށެވެ.
މިގަވާއިދުތައް ނުހެދި މަސްވެރިންނަށް މި ޤާނޫނުން ލިބެންޖެހޭ ފައިދާތައް ނުލިބި ލަސްވެގެންދާތީ މެމްބަރުން ވަނީ އެކަމުގެ ކަންބޮޑުވުން ފާޅުކުރައްވާފަ އެވެ.
