ރައްޔިތުންގެ މަޖިލީހުގެ މައިނޯރިޓީ ލީޑަރުގެ ގޮތުގައި އޭދަފުށީ ދާއިރާގެ މެމްބަރު އަހުމަދު ސަލީމް (ރެޑްވޭވް ސަލީމް) ކަނޑައަޅައިފިއެވެ.

މިކަން އާދީއްތަ ދުވަހުގެ މަޖިލީހުގެ ޖަލްސާގައި އިއުލާނު ކުރެއްވީ ރައްޔިތުންގެ މަޖިލީހުގެ ރައީސް މުހައްމަދު ނަޝީދެވެ. މައިނޯރިޓީ ލީޑަރަކަށް ރެޑްވޭވް ސަލީމް ވެވަޑައިގެންނެވީ އިދިކޮޅު ޕީޕީއެމްއަކީ މިހާރު ރައްޔިތުންގެ މަޖިލީހުގައި ދެވަނަ އެންމެ ގިނަ ގޮނޑި ތަމްސީލްކުރާ ޕާޓީކަމަށް ވުމުންނެވެ.

ކުރިން ފަސް މެމްބަރުން ތިއްބެވި ޕީޕީއެމް ތަމްސީލްކުރާ މެމްބަރުންގެ އަދަދު ހަޔަކަށް އިތުރުވީ، ފަރެސްމާތޮޑާ ދާއިރާގެ މެމްބަރު ހުސައިން މުހައްމަދު ލަތީފް އެޕާޓީއާ ގުޅިވަޑައިގެންނެވެމުންނެވެ. އޭނާ ޕީޕީއެމްއާ ގުޅިވަޑައިގެންނެވީ ނޮވެމްބަރު މަހުގެ ތެރޭގައި ޕީޕީއެމްއިން "ހިބަރު ވަދު" ގެ ނަމުގައި ބޭއްވި ޖަލްސާގައެވެ.

މިހާރު ރައްޔިތުންގެ މަޖިލީހުގައި ތިއްބަވަނީ، ސަރުކާރު ކޯލިޝަންގައި ހިމެނޭ މައި ޕާޓީ އެމްޑީޕީގެ 65 މެމްބަރުން، ކޯލިޝަން ޕާޓްނަރު ޖުމްހޫރީ ޕާޓީގެ މެމްބަރުން، އިދިކޮޅު ޕްރޮގްރެސިވް ކޮންގްރެސް ކޯލިޝަންގައި ހިމެނޭ ޕީއެންސީގެ 3 މެމްބަރުން، އެމްޑީއޭގެ 2 މެމްބަރުން އަދި މިނިވަން 6 މެމްބަރުންނެވެ.