ކުޑަކުދިންނަށް ކުރާ ޖިންސީ ގޯނާއާ ގުޅޭ ބައެއް މައްސަލަތައް ނިންމާލަނީ ނަސޭހަތަކުން!
އެ ފަދަ މައްސަލަތައް އެކަށީގެންވާ މިންވަރަށް ފުލުހުންނަށް ތަހުގީގު ކުރެވިފައެއް ނުވޭ: ރިޕޯޓު
ޖިންސީ ގޯނާ ރައްޒުކޮށްދޭ މަންޒަރެއް
ކުޑަކުދިންނަށް ކުރާ ޖިންސީ ގޯނާގެ މައްސަލަތަކުގައި ތުހުމަތުކުރެވޭ ބައެއް ފަރާތްތަކަށް ނަސޭހަތްދީ، މޯލްޑިވްސް ޕޮލިސް ސަރވިސްގައި އެފަރާތްތަކުގެ މައްސަލަތައް ފައިލްކުރެވޭކަން ހާމަވެއްޖެއެވެ.
މިކަން ހާމަވެފައިވަނީ ކުޑަކުދިންނަށް ޖިންސީ އަނިޔާ ކުރުމާއި ގުޅޭ މައްސަލަތަކުގެ މައްޗަށް ތައްޔާރުކުރި ޕާލިމެންޓްރީ އިންކުއަރީ ރިޕޯޓުންނެވެ. އެގޮތުން ކުޑަކުދިންނަށް ކުރާ ޖިންސީ ގޯނާގެ މައްސަލަތަކުގައި ތުހުމަތުކުރެވޭ ބައެއް ފަރާތްތަކަށް ނަސޭހަތްދީ، މޯލްޑިވްސް ޕޮލިސް ސަރވިސްގައި އެފަރާތްތަކުގެ މައްސަލަތައް ފައިލްކުރެވޭކަން ކޮމިޓީގެ ހޯދުންތަކުގައިވެއެވެ.
އޭގެ ސަބަބުން މުޖުތަމަޢުގައި ކުޑަކުދިންނަށް ކަށަވަރުކޮށްދޭންޖެހޭ ރައްކާތެރިކަން ކަށަވަރުކޮށްދިނުމަށް ހުރަސް އެޅޭ ކަމަށާއި، އެއީ އިތުރު ކުޑަކުދިންތަކެއް ޖިންސީ ގޯނާގެ ޝިކާރައަކަށްވުމަށް ދެވޭ ފުރުޞަތެއްކަމަށް ރިޕޯޓުގައިވެއެވެ. އަދި މިއީ ކަންބޮޑުވާންޖެހޭ ކަމެއްކަމަށް ރިޕޯޓުގައިވެއެވެ.
ރައްޔިތުންގެ މަޖިލީހުގެ ހިއުމަން ރައިޓްސް އެންޑް ޖެންޑަރ ކޮމިޓީން އެކުލަވާލި ރިޕޯޓުގައި ވާގޮތުން ކުޑަކުދިންގެ މިފަދަ މައްސަލަތަކެއް މޯލްޑިވްސް ޕޮލިސް ސަރވިސްއަށް އެކަށީގެންވާ ގޮތެއްގައި ތަޙްޤީޤުކުރެވިފައިއެއް ނުވެއެވެ. އަދި ފުލުހުންނަށް ހުށަހަޅާފައިވާ ގިނަ މައްސަލަތައް ތަޙްޤީޤުކުރުމަށް ދިގު މުއްދަތެއް ހޭދަވެފައިވާކަން ރިޕޯޓުގައި ފާހަގަކޮށްފައިވެއެވެ.
އެގޮތުން ފުލުހުންނަށް ވޭތުވެދިޔަ 15 އަހަރު ހުށަހަޅާފައިވާ މައްސަލަތަކުގެ ތެރެއިން 70.46 އިންސައްތަ މައްސަލައިގެ ތަޙްޤީޤު ނިންމުމަށް 1 އަހަރަށްވުރެ ދިގު މުއްދަތެއް ހޭދަވެފައިވާކަން ރިޕޯޓުން ވަނީ ހާމަވެފައެވެ. އަދި ފުލުހުން ތަޙްޤީޤުކޮށް ދަޢުވާކުރުމަށް ޕްރޮސިކިއުޓަރ ޖެނެރަލް (ޕީޖީ)ގެ އޮފީހަށް ފޮނުވާފައިވާ މައްސަލަތަކުގެ ތެރެއިން 31.64 އިންސައްތަ މައްސަލަ، މައްސަލައިގެ ތަޙްޤީޤު ފުރިހަމަވެފައި ނުވާތީ އެއޮފީހުން އަނބުރާ ފުލުހުންނަށް ފޮނުވާފައިވާ ކަމަށް ޕީޖީ އޮފީހުން ކޮމިޓީއާއި ހިއްސާ ކުރި ކަމަށް ރިޕޯޓުގައިވެއެވެ. އަދި މައްސަލައިގައި ސާބިތުކުރެވޭ މިންވަރަށް ހެކި ނެތުމުން އެ މައްސަލަތައް ޕީޖީ އޮފީހުން އަނބުރާ ފޮނުވާ ކަމަށެވެ.
ރިޕޯޓުގައިވާ ގޮތުން، މޯލްޑިވްސް ޕޮލިސް ސަރވިސްއިން އެފަދަ މައްސަލަތައް އެކަށީގެންވާ އަވަސް މުއްދަތެއްގެ ތެރޭގައި، ހަރުދަނާ ތަޙްޤީޤީ ނިޒާމެއްގެ ތެރެއިން ތަޙްޤީޤްކޮށްފައި ނުވުމުގެ ސަބަބުން މިފަދަ މައްސަލަތަކުގައި ދަޢުވާކުރުމަށް އިތުރު މުއްދަތެއް ހޭދަވާކަމަށާއި އަދި އެއީ ޖިންސީ ގޯނާގެ ޝިކާރައަކަށްވާ ކުޑަކުދިންނަށް އިންސާފު ލިބުމަށް އެޅިގެންދާ ހުރަހެއްކަމަށެވެ.
ރިޕޯޓުގައި އިތުރަށް ފާހަގަކޮށްފައިވާ ކަންކަމަށް ބަލާލާއިރު ކުޑަކުދިންނަށް ކުރާ ޖިންސީ ގޯނާތަކުގެ މައްސަލަތައް މޯލްޑިވްސް ޗައިލްޑް ޕްރޮޓެކްޝަން ޑޭޓާބޭސްގައިކަމާގުޅޭ މުއައްސަސާތަކުން ހިމަނާފައެއް ނުވެއެވެ. އެކަމުގެ ސަބަބުން އެފަދަ މައްސަލަތައް ރަނގަޅަށް މޮނިޓަރނުކުރެވޭކަމަށް ރިޕޯޓުގައި ވެއެވެ.
މީގެއިތުރުން ކުޑަކުދިންނަށް ކުރާ ޖިންސީ ގޯނާތަކުގެ މައްސަލަތަކުގެ މަޢުލޫމާތު ކަމާގުޅޭ މުއައްސަސާތަކުން އަޕްޑޭޓްކުރަމުން ނުދާކަމަށާއި އެކަމުގެ ސަބަބުން ނުރައްކަލަށް ހުށަހެޅިފައިވާ ކުދިންނާއި ޢާއިލާތަކާއި، މިފަދަ ކުށްތައް ތަކުރާރުކޮށް ކުރާ މީހުންގެ މަޢުލޫމާތާއި، އެއް ކުއްޖެއްގެ ނުވަތަ އެއް ޢާއިލާގެ ކުދިންގެ މައްސަލަތައް، ތަކުރާރުވި ނަމަވެސް، މުއައްސަސާތަކަށް އެކަން ދެނެގަނެ، މޮނިޓަރކުރެވޭނެ ނިޒާމެއް ނެތުމުން ނުރައްކަލަށް ހުށަހެޅިފައިވާ ކުދިންނަށް ރައްކާތެރިކަން ކަށަވަރުކޮށްނުދެވޭނެކަމަށް ވެސް ރިޕޯޓުގައިވެއެވެ.
