ސްޕެނިޝް ލަލީގާގައި ރެއާލް މެޑްރިޑް އަދި ބާސެލޯނާ ކުޅުނު މެޗުތަކުން ފަހަތުން އަރާ މޮޅުވެއްޖެއެވެ.

ތާވަލުގެ އެއްވަނައިގައި އޮތް ރެއާލް މެޑްރިޑް އޮސަސޫނާ އަތުން މޮޅުވީ 4-1 ގެ ތަފާތު ބޮޑު ނަތީޖާއަކުންނެވެ.

އޮސަސޫނާގެ ދަނޑުގައި ކުޅުނު މި މެޗުގައި ފުރަތަމަ ލަނޑު ޖަހާ ލީޑު ނެގީ އޮސަސޫނާއިންނެވެ. މި ލަނޑު މެޗުގެ 14 ވަނަ މިނެޓުގައި އެޓީމަށް ކާމިޔާބުކޮށްދިނީ ގާސިއާ އެވެ. މި ލަނޑާއިއެކު ރެއާލުން އެޓީމުގެ ކުޅުން ރަނގަޅުކޮށް މެޗުގެ ކޮންޓްރޯލް ހޯދާ ގިނަ ހަމަލާތަކެއް އޮސަސޫނާގެ ގޯލަށް ވަނީ ފޮނުވައިލައިފައެވެ. މެޗުގެ 33 ވަނަ މިނެޓުގައި ރެއާލުން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ މިޑްފިލްޑަރ އިސްކޯ އެވެ. އޭގެ ފަސް މިނެޓުފަހުން ރެއާލުން ވަނީ އިތުރު ލަނޑެއް ކާމިޔާބުކޮށް ލީޑު ނަގައިފައެވެ. މި ލަނޑު ލިބުނު ކޯނަރެއްގެ އެހީގައި އެޓީމަށް ކާމިޔާބުކޮށްދިނީ ކެޕްޓަން ސާޖިއޯ ރާމޮސް އެވެ.

ދެވަނަ ހާފު ފަށައިގެން ރެއާލުން އެޓީމުގެ ކުޅުން އިތުރަށް ރަނގަޅުކުރިއިރު، މެޗުގެ 84 ވަނަ މިނެޓުގައި އެޓީމުން ވަނީ ލަނޑު ޖަހާ ލީޑު ފުޅާ ކޮށްފައެވެ. މި ލަނޑު ކަރިމް ބެންޒެމާގެ އެހީތެރިކަމާއިއެކު އެޓީމަށް ކާމިޔާބުކޮށްދިނީ ލޫކަސް ވަޒްކުއޭޒް އެވެ. މެޗުން ރެއާލް މޮޅުކޮށްދިން ލަނޑު މެޗުގެ އެންމެ ފަހު މިނެޓުގައި އެޓީމަށް ކާމިޔާބުކޮށްދިނީ ވެސް ކެޕްޓަން ސާޖިއޯ ރާމޮސް އެވެ.

ބާސެލޯނާ އަދި ރެއާލް ބެޓިސް ބައްދަލުކުރި މެޗު ބާސާއިން ކާމިޔާބުކުރީ ފަހަތުން އަރާ 3-2 ގެ ނަތީޖާ އަކުންނެވެ.

ފޯރިގަދަ ކުޅުމެއް ފެނިގެންދިޔަ މި މެޗުގެ ފަހު ހާފުގެ ބޮޑު ބައެއް ދެ ޓީމުން ވެސް ކުޅެމުންދިޔައީ އެއް ކުޅުންތެރިޔަކު މަދުކޮށެވެ.

މި މެޗު ފަށައިގެން ވަރަށް ކުރީކޮޅު ރެއާލް ބެޓިސް އިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ ކެނަލިސް އެވެ. އޭނާ މި ލަނޑު ކާމިޔާބުކުރީ އޭރިޔާ ތެރެއިން ބާސާގެ ޑިފެންޑަރ ޕީކޭ އަތުގައި ބޯޅަ ޖެހުމުން ލިބުނު ޕެނަލްޓީގެ އެހީގައެވެ. އޭގެ ތިން މިނެޓު ފަހުން ބާސާގެ ޑި ޔޮންގް ގެ ހިތްގައިމު ލަނޑުން ބާސާއިން ނަތީޖާ ހަމަހަމަ ކުރިއިރު، މެޗުގެ 26 ވަނަ މިނެޓުގައި ބެޓިސްގެ ފެކިއަރ ވަނީ ލަނޑު ޖަހާ ދެވަނަ ފަހަރަށް ލީޑު ނަގައިދީފައެވެ. ނަމަވެސް މެޗުގެ ފުރަތަމަ ހާފު ނިމުމުގެ ކުރިން ބާސާގެ ސާޖިއޯ ބުސްކުއެޓްސް ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ.

ދެވަނަ ހާފު ފަށައިގެން ބާސާއިން ފުލުފުލުގައި ބެޓިސްގެ ގޯލަށް ހަމަލާތައް ފޮނުވައިލިއިރު މެޗުގެ ލީޑު ބާސާއިން ނެގީ 72 ވަނަ މިނެޓުގައި ލެންގްލެޓް ކާމިޔާބުކޮށްދިން ލަނޑުންނެވެ.

މި ނަތީޖާ އާއިއެކު ބާސާއިން ތާވަލުގެ އެއްވަނައިގައި އޮތް ރެއާލް މެޑްރިޑާއި ދެމެދު އޮތް ފަރަގު ތިން ޕޮއިންޓަށް ވަނީ ކުޑަވެފައެވެ. ތާވަލުގެ އެއްވަނައިގައި ރެއާލުން އޮތީ ކުޅުނު 23 މެޗުން ލިބުނު 52 ޕޮއިންޓާއިއެކުގައެވެ. ދެވަނައިގައި އޮތް ބާސާއަށް ކުޅުނު 23 މެޗުން ލިބިފައިވަނީ 49 ޕޮއިންޓެވެ.