އިބްތިޙާލުގެ މަރުގެ މައްސަލައިގެ ޝަރީއަތުގެ އަޑުއެހުމެއް މާދަމާ

ވ. ރަކީދޫގައި އަނިޔާކޮށް މަރާލި މުޙައްމަދު އިބްތިޙާލްގެ މަރުގެ މައްސަލާގައި އޭނާގެ މަންމަގެ މައްޗަށް ކުރާ ދަޢުވާގެ ޝަރީޢަތުގެ އަޑުއެހުމެއް ހޯމަ ދުވަހު ކްރިމިނަލް ކޯޓުގައި ތާވަލުކޮށްފިއެވެ.

ރަކީދޫގައި 2015 ވަނަ އަހަރުގެ ޖެނުއަރީ މަހު އިބްތިހާލް މަރާލި މައްސަލައާ ގުޅިގެން އޭނާގެ މަންމަ، އާފިޔާ މުހައްމަދު މަނިކު (ލައިޓްހައުސް، ވ.ރަކީދޫ) ގެ މައްޗަށް ދައުލަތުން ކޮށްފައިވާ ދަޢުވާއަކީ ޤަސްދުގައި ކުއްޖަކު މެރުމުގެ ކުށުގެ ދައުވާއެވެ. އާފިޔާ ވަނީ އެ ކުށަށް އިޢުތިރާފުވެސް ވެފައެވެ.

Advertisement

އޭގެ އިތުރުން، މި މައްސަލައިގައި އަމުރަށް ނުކިޔަމަންތެރިވުމުގެ ދަޢުވާ ވެސް އާފިޔާގެ މައްޗަށް ވަނީ އުފުލާފައެވެ.

އުމުރުން ތިން އަހަރުގެ އިބްތިހާލް މަރާލި މައްސަލާގައި އާފިޔާގެ މައްޗަށް ހިންގާ ޝަރީޢަތުގައި ދައުލަތުން ހުށަހެޅި ހެކިން ތިބީ ރަކީދޫގައި ކަމަށްވާތީ ހެކިބަސް ދިނުމަށް މާލެއަށް އަންނަން ހެކިންނަށް ދަތިވާތީ ވީޑިއޯ ކޮންފަރެންސްގެ ޒަރީއާއިން އެމީހުންގެ ހެކިބަސް ނެގުމަށް ކުރިން އޮތީ ހަމަޖައްސާފައެވެ.

މިމައްސަލާގައި މީގެކުރިން ވަނީ ބައެއް ހެކިންގެ ހެކިބަސްވެ ނަގާފައެވެ. އެގޮތުން އިބްތިޙާލްގެ ހަށިގަނޑު މާލޭގައި ބެއްލެވި ޑޮކްޓަރުންނާއި، އޭނާގެ ހަށިގަނޑު ހޮސްޕިޓަލްގައި އޮތްއިރު އެތަނަށް ދިޔަ ފުލުހުންގެ ހެކިބަސް ވެސް ނަގާފައިވެއެވެ. އެ ކުއްޖާ މަރުވާން މެދުވެރިވި ސަބަބެއް ކަމަށް ބެލެވެނީ އޭނާގެ ކަރުގައި ހިފުމުން ނޭވާ ހާސްވެގެން ނުވަތަ އޭނާގެ ބަނޑަށް ގިނަ ޢަދަދަކަށް ލޭ ޖަމާވެފައި ހުރުމުގެ ސަބަބުން ކަމަށް ބެލެވޭކަމަށް ޑޮކްޓަރުންވަނީ ޝަރީޢަތުގައި ހެކިބަސްދީފަ އެވެ. ނަމަވެސް އިބްތިހާލުގެ ޕޯސްޓްމޯޓަމް ހަދާފައިނުވާތީ އެ ކުއްޖާ މަރުވި އަޞްލު ސަބަބު (ކޯޒް އޮފް ޑެތް) ޔަޤީން ކަމާއެކު ބުނަން ދަތި ކަމަށް ބައެއް ޑޮކްޓަރުން ބުނެފައިވެ އެވެ.

އާފިޔާ ތަޙުޤީޤަށް ދީފައިވާ ބަޔާނުގައި ބުނެފައިވަނީ އޭނާގެ ދަރިފުޅު، އިބްތިހާލް ނިދާފައި އޮއްވައި ގޮސް އެ ކުއްޖާގެ ކަރުގައި އާފިޔާ ހިފި ކަމަށާއި ކަރުގައި ހިފުމުން އިބްތިހާލްގެ އަނގައިން ލެއާއި ފޮނުތަކެއް އައި ކަމަށެވެ. އޭގެ އިތުރުން އިބްތިހާލްގެ މޭމަތީގައި ތިން ފަހަރު ފައިން ޖެހި ކަމަށާއި، ގޮއް މުށްކަވާފައި އެ ކުއްޖާގެ ދަތްދޮޅީގައި ވެސް ޖެހުމުގެ އިތުރުން ވެސް ފައިން އިބްތިހާލްގެ ގައިގައި ތެޅި ކަމަށް، އާފިޔާ ދިން ބަޔާނުގައި ބުނެފައިވެއެވެ.