ރައީސް ޔާމީން ޖަލަށްލާފައިވާ މައްސަލަ އީޔޫ އާ ހަމައަށް
9 ފެބުރުއަރީ 2020 | އާދީއްތަ 14:29އާދަމް ޝަރީފް ވިދާޅުވީ ރައީސް ޔާމީން ނުހައްޤުން ޖަލަށްލާފައިވާ މައްސަލައިގައި އެކަންބޮޑުވުން ހިއްސާކުރެއްވި ކަމަށް
އީޔޫގެ ވަފުދާ އާދަމް ޝަރީފް ވަނީ ބައްދަލުކުރައްވާފައި
ކުރީގެ ރައީސް ޢަބްދުﷲ ޔާމީން އަބްދުލްޤައްޔޫމް ޖަލަށްލާފައިވާތީ އެކަމުގެ ކަންބޮޑުވުން މިހާރު ރާއްޖެ އައިސްއުޅޭ ޔޫރަޕިއަން ޔޫނިއަން (އީޔޫ)ގެ ވަފުދާ އިދިކޮޅު ފަރާތްތަކުން ހިއްސާކޮށްފި އެވެ.
އިދިކޮޅު ޕީއެންސީގެ ނައިބު ރައީސް އަދި ރައްޔިތުންގެ މަޖިލީހުގެ މަޑުއްވަރީ ދާއިރާގެ މެންބަރ އާދަމް ޝަރީފް، އީޔޫގެ ވަފްދާ އެކަން ހިއްސާކުރެއްވީ އެ ވަފްދުގެ ބޭފުޅުންނާ އެކު ބޭއްވި ބައްދަލުވުމެއްގަ އެވެ.
ޔާމީން ޖަލަށް ލާފައިވާ މައްސަލަ، އާދަމް ޝަރީފް ހިއްސާ ކުރެއްވީ އީޔޫގެ ވަފްދުގެ އިސްވެރިއަކަށް ވަޑައިގެން އުޅުއްވާ، އެކްސްޓަރނަލް އެކްޝަން ސަރވިސް ފޮރ އޭޝިއާ އެންޑް ޕެސިފިކްގެ ޑެޕިއުޓީ މެނޭޖިން ޑައިރެކްޓަރު ޕައުލާ ޕަންޕަލޯނީއާ އެވެ.
މިބައްދަލުކުރެއްވުމުގެ ތަފުސީލު "ރާއްޖެ އެމްވީ" އަށް ދެއްވަމުން އާދަމް ޝަރީފް ވިދާޅުވީ ރައީސް ޔާމީން ނުޙައްޤުން ޖަލަށްލާފައިވާ މައްސަލައިގައި އެކަންބޮޑުވުން ހިއްސާކުރެއްވި ކަމަށެވެ.
އާދަމް ޝަރީފް އިތުރަށް ވިދާޅުވީ ރައީސް ޔާމީނުގެ މައްސަލާގައި ލާއިންސާނީ އެއްވެސް ކަމެއް ނުވަތަ އިންސާނީ ހައްޤުތައް ހުރުމަތްތެރިކޮށް ނުހިތޭނެ އެއްވެސްކަމެއް ވެގެންނުވާނެ ކަމަށް ޕައުލާ ޕަންޕަލޯނީއާ ވިދާޅުވެފައިވާ ކަމަށެވެ. އަދި އެމައްސަލަ އީޔޫގެ ހެޑްއޮފީހަށް ހުށަހަޅާނެކަމަށް ވިދާޅުވެފައިވާކަމަށް އާދަމް ޝަރީފް ވިދާޅުވި އެވެ.
އާދަމް ޝަރީފް އިތުރަށް ވިދާޅުވީ މިހާރުގެ ސަރުކާރުން ދޯދިޔާކޮށް ކުރަމުންދާ ކަންކަމުގެ ވާހަކަތައްވެސް އީޔޫއާ ހިއްސާކުރެއްވި ކަމަށެވެ. އެގޮތުން ކަންކަމުގައި ސަރުކާރުގެ އެކިފަރާތްތަކުން އެކިގޮތްގޮތަށް އިރުޝާދު ދެމުންގެންދާ މައްސަލަ ފާހަގަކުރެއްވި ކަމަށް އާދަމް ޝަރީފް ވިދާޅުވި އެވެ.
މިސާލެއްގެ ގޮތުން އާދަމް ޝަރީފް ފާހަގަކުރެއްވީ މާފުށީގައި ހިނގާދިޔަ ކަންކަމުގައި ސަރުކާރުގެ އެކި ފަރާތްތަކުން އެކި ގޮތްގޮތަށް ވާހަކަ ދައްކާފައިވާކަމަށެވެ.
ޔާމީނަށް މިދިޔަ އަހަރުގެ ޑިސެންބަރު މަހު 28 ގައި ފަސް އަހަރުގެ ޖަލު ހުކުމެއް ކްރިމިނަލް ކޯޓުން އިއްވީ މަނީލޯންޑަރިންގެ މައްސަލަ ސާބިތުވުމުންނެވެ. ޔާމީނަށް ހުކުމް އިއްވި ޝަރީޢަތް ކުރިއަށް ގެންގޮސްފައި ވަނީ އިންސާފުން ނޫން ކަމަށް އިދިކޮޅުން އަންނަނީ ތަކުރާރުކޮށް ބުނަމުންނެވެ. އެ ޙުކުމް ޔާމީނުގެ ފަރާތްޕުޅުން ހައި ކޯޓުގައި އިސްތިޢުނާފުކުރުމުން އެ މައްސަލައިގެ ޝަރީޢަތް އެ ކޯޓުގައި މިހާރު ވަނީ ފަށާފައެވެ.
ޔާމީން، ކަފާލާތުގެ ދަށުން މިނިވަން ކުރަން ވެސް އެމަނިކުފާނުގެ ވަކީލުން ހައި ކޯޓުގައި އެދުނެވެ. އެހެންނަމަވެސް މިދިޔަ ބުރާސްފަތި ދުވަހު ބޭއްވި އަޑުއެހުމުގައި ހައި ކޯޓުން ނިންމީ ޔާމީނަށް ކަފާލާތު ދެވެން ނެތް ކަމަށެވެ.
