2 އަހަރަށް ފަހު ޢާއިލާގެ ފަރާތުން ޤައިދީންނަށް އަންނައުނު ފޮނުވޭ ގޮތް ހަމަޖައްސައިފި
9 ފެބުރުއަރީ 2020 | އާދީއްތަ 13:31ބަންދު މީހުންނަށްވެސް މި އުސޫލުގެ ދަށުން އަންނައުނު ފޯރުކޮށްދެވޭ
އަންނައުނު ބަލައިގަންނާނީ މާލެ ޖަލުގެ ރިސެޕްޝަނުން ކޮންމެ ހޮނިހިރު ދުވަހެއްގެ 9:00 އިން 14:00 އަށް
ދެ އަހަރަށް ފަހު ޢާއިލާގެ ފަރާތުން ޤައިދީންނާއި، ބަންދު މީހުންނަށް އަންނައުނު ފޮނުވޭނެ އިންތިޒާމު މޯލްޑިވްސް ކަރެކްޝަނަލް ސަރވިސަސް އިން ހަމަޖައްސައިފިއެވެ.
އެކަމާ ގުޅޭގޮތުން މޯލްޑިވްސް ކަރެކްޝަނަލް ސަރވިސަސް އިން ބުނީ، ކަރެކްޝަނަލް ސަރވިސްގެ ބެލުމުގެ ދަށުގައި ތިބޭ ޤައިދީންނާއި، ބަންދު މީހުންނަށް ޢާއިލާގެ ފަރާތުން ފޯރުކޮށްދޭން ބޭނުންވާ އަންނައުނު ފޮނުވުން މެދުކަނޑާލި އުޞޫލަށް ބަދަލު ގެނެސް އާދިއްތަ ދުވަހުން ފެށިގެން އެ ފަރާތްތަކަށް އަންނައުނު ފޯރުކޮށްދެވޭނެ ގޮތް އަލުން ހަމަޖައްސަވާފައިވާ ކަމަށެވެ.
އެގޮތުން ޖަލުތަކުގައި ތިބޭ ޤައިދީންނާއި، ބަންދު މީހުންނަށް ބޭނުންވާ އަންނައުނު ޢާއިލާގެ ފަރާތުން ފޯރުކޮށްދިނުމާބެހޭ ޢާންމު އުޞޫލު ކަރެކްޝަންސްގެ ވެބްސައިޓުގައިވެސް މިހާރު ވަނީ ޝާއިޢުކޮށްފައެވެ.
ކަރެކްޝަންސް އިން ބުނީ، މި ބަދަލަކީ “ދިވެހިރާއްޖޭގެ ޖަލުތަކުގެ އޮޑިޓް ރިޕޯޓް 2019”ގައި ވެސް ކަރެކްޝަނަލް ސަރވިސްއަށް އިޞްލާޙުކުރުމަށް ހުށަހަޅާފައިވާ ހުށަހެޅުމެއް ކަމަށެވެ. އެގޮތުން ޢާއިލާއިން ގެންނަ އަންނައުނު ބަލައިގަންނާނީ މާލެ ޖަލުގެ ރިސެޕްޝަނުން ކޮންމެ ހޮނިހިރު ދުވަހެއްގެ 9:00 އިން 14:00 އަށް ކަމަށް ކަރެކްޝަނުން ބުނެއެވެ.
ޢާއިލާގެ ފަރާތުން ޤައިދީންނާއި ބަންދު މީހުންނަށް އަންނައުނު ފޮނުވުން މޯލްޑިވްސް ކަރެކްޝަނަލް ސަރވިސަސް އިން މެދުކަނޑާލާފައިވަނީ 15 އޮކްޓޯބަރ 2017 ގައެވެ. އެގޮތުން އޭރު އެގޮތަށް ނިންމީ އަންނައުނު މެދުވެރިކޮށް މަސްތުވާތަކެތި ޖަލަށް ވެއްދުމަށް މަސައްކަތްކުރުމުގެ ޙާދިސާތައް ގިނަވަމުން ދިއުމުގެ ސަބަބުން ކަމަށާއި، އަލަށް އެކުލަވާލެވުނު އުޞޫލުގައިވެސް އަންނައުނު މެދުވެރިކޮށް ޖަލަށް ވެއްދުން މަނާތަކެތި ވައްދަން މައްސަކަތްކުރާކަމަށް ފާހަގަ ކުރެވިއްޖެނަމަ، ފުލުހުންނަށް ރިޕޯޓުކޮށް އެ ފަރާތްތަކަށް ޤާނޫނުގައިވާ ގޮތުގެ މަތިން ފިޔަވަޅު އަޅާނެކަމަށް ބަޔާން ކޮށްފައިވެއެވެ.
