ޔުނިސެފުން ރާއްޖެއަށް 200،000 އެމްއާރު ވެކްސިން ހަދިޔާކޮށްފި

ހެލްތު މިނިސްޓްރީން ކުރިއަށްގެންދާ ހިމަބިހި ކެމްޕޭނަށް ޔުނިސެފުން 200،000 (ދެ ލައްކަ) ވެކްސިން ހަދިޔާކޮށްފިއެވެ.

ޔުނިސެފުން ހިލޭއެހީގެ ދަށުން ހަދިޔާކުރި ވެކްސިންއާއި ރާއްޖޭގެ ފަރާތުން ހަވާލުވީ ހެލްތު މިނިސްޓަރު ޢަބްދުﷲ އަމީނެވެ.

ހެލްތު މިނިސްޓްރީން ބުނީ ދިވެހިރާއްޖެއިން ހިމަބިހި (މީސްލްސް) ފެނުމާއިގުޅިގެން އިތުރަށް މިބަލި ފެތުރުނަ ނުދިނުމަށް ސަރުކާރުން ކުރަމުން އަންނަ މަސައްކަތްތަކުގެތެރެއިން، މިހާރު ފަށާފައިވާ ސަޕްލިމެންޓަރީ ވެކްސިން ދިނުމުގެ ޕްރޮގުރާމަށް ބޭނުންވާ ވެކްސިންއާއި ކޮންސިއުމަބަލްސް ހޯދުމުގައި ޔުނިސެފުން އެހީތެރިކަން ފޯރުކޮށްދީފައިވާ ކަމަށެވެ.

މިކަން ފާހަގަކުރުމުގެ ގޮތުން ހެލްތު މިނިސްޓްރީގައި މިއަދު ބޭއްވި ރަސްމިއްޔާތުގައި ޔުނިސެފްއިން ވަރަށް އަވަސް މުއްދަތެއްގައި ފޯރުކޮށްދިން އެހީތެރިކަން ފާހަގަކުރައްވާ ހެލްތު މިނިސްޓަރ ޢަބްދުﷲ އަމީން ވަނީ ޔުނިސެފަށް ޝުކުރުއަދާކުރައްވާފައެވެ. ޔުނިސެފްގެ ފަރާތުން ރާއްޖޭގެ ވެކްސިން ޕްރޮގްރާމަށް ލިބެމުންދާ ފަންނީ އެހީތެރިކަން ފާހަގަކޮށް ޔުނިސެފަށް ޝުކުރުއަދާކުރެއްވިއެވެ. މި ރަސްމިއްޔާތުގައި ޔުނިސެފްގެ ފަރާތުން ލިބިގެންދިޔަ އެހީތެރިކަން ފާހަގަކޮށް ޚާއްޞަ ހަނދާނީ ލިޔުމެއް މިނިސްޓްރީ އޮފް ހެލްތުގެ ފަރާތުން ޔުނިސެފަށް ވަނީ ދީފައެވެ.

ހެލްތު މިނިސްޓްރީން ބުނީ ޔުނިސެފްގެ އެހީގައި ހޯދާފައިވާ ވެކްސިންއާއެކު ދަތިކަމެއް ނެތި ފަންނީ ލަފާގެމަތިން އިސްކަންދެވޭ ފަރާތްތަކަށް ވެކްސިން ދިނުމާއި، މިހާރު ކުރިއަށް ގެންދާ ސަޕްލިމެންޓަރީ ވެކްސިން ދިނުމުގެ ކަންކަން ކުރިއަށްގެންދެވޭނެކަމަށެވެ.

މި ރަސްމިއްޔާތުގައި ވާހަކަދައްކަވަމުން މިނިސްޓަރު އަމީން ވިދާޅުވި ދިވެހިރާއްޖެއިން ހިމަބިހި ފެނުމާއިގުޅިގެން މިހާރު ކުރިއަށްގެންދެވޭ މަސައްކަތްތަކުގެތެރޭގައި، ހިމަބިއްސަށް ޕޮޒިޓިވް ވި ފަރާތްތަކުގެ ފަރާތުން ބަލި އަރާފާނެ ފަރާތްތައް ދެނެގަނެ، މަޢުލޫމާތު ދިނުމާއި، ވެކްސިން ފުރިހަމަނުވާ ފަރާތްތަކަށް ވެކްސިން ދިނުމާއި 18 އަހަރުން ދަށުގެ ކުދިންގެ ތެރެއިން މާލެއާއި އަތޮޅުތެރޭގައި މީސްލްސް ވެކްސިން ޑޯޒްތައް ހަމަނުވާ ކުދިންނަށް ވެކްސިން ދީ ހަމަކުރެވޭނެ ކަމަށެވެ.

އަދި އުމުރުން 6 މަހާއި 18 މަހާއި ދެމެދުގެ ތުއްތުކުދިންނަށް އެމްއާރު ވެކްސިންގެ އިތުރު ޑޯޒެއް ދިނުމާއި ވެކްސިންދިނުމުގެ މުހިންމުކަމާގުޅޭ މަޢުލޫމާތުދިނުމުގެ ކޮމިއުނިކޭޝަން ކެމްޕޭނެއް މި މަހުގެތެރޭގައި ފެށުމާއި އަދި މުޅި އާބާދީއަށް އަމާޒުކޮށް، ބިދޭސީން ހިމެނޭގޮތަށް އެމްއާރު ވެކްސިން ދިނުމުގެ ކެމްޕޭނެއް ހިންގުން ހިމެނޭ ކަމަށް މިނިސްޓަރު ވިދާޅުވިއެވެ.

އެޗްޕީއޭގެ ތަފާސް ހިސާބުތަކަށް ބަލާއިރު، މިދިޔަ މަހުގެ 28 ވަނަ ދުވަހުގެ ފަހުން ހިމަބިއްސައް އެއްވެސް މީހަކު ޕޮޒިޓިވްވެފައި ނުވެއެވެ. އަދި މިހާތަނަށް 6000 މީހުންނަށް ވެކްސިން ދީފައިވާ އިރު، ސްކޫލް ދަރިވަރުންނާއި، ޢާންމުން އަދި ޞިއްޙީ ޚިދުމަތްދޭ ފަރާތްތައް މީގެ ތެރޭގައި ހިމެނެއެވެ.

ހެލްތު މިނިސްޓްރީން ބުނެފައިވަނީ ވެކްސިން ޑާޓާ ބޭސްގެ މަސައްކަތް މިހާރު ނިމިފައިވާ ކަމަށެވެ. އަދި ސަޕްލިމެންޓަރީ ވެކްސިން ދިނުމުގެ ޕްރޮގުރާމަކީ 3 މަސްދުވަހުގެ މުއްދަތަކަށް ކުރިއަށް ގެންދާ ޕްރޮގުރާމެއް ކަމަށް މިނިސްޓްރީން ބުނެއެވެ.