ރޯދައަށް ކަދުރު ކިލޯއެއް ގަތުމެކޭ، ސައިކަލެއް ގަތުމެކޭ އެއްވަރު: ރައީސް ނަޝީދު
5 ފެބުރުއަރީ 2020 | ބުދަ 18:04އެއްގަމު ދަތުރުފަތުރުގެ ގާނޫނަށް އިސްލާހު ގެނައުމުގެ ބިލަކީ ރަށްރަށުގެ މުސްތަގްބަލާ ގުޅިފައިވާ ބިލެއް: ރައީސް ނަޝީދު
ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު
ރޯދައަށް ކަދުރު ކިލޯއެއް ގަތުމެކޭ، ސައިކަލެއް ގަތުމެކޭ، އެއްވަރުވެފައިވާކަަމަށް، ރައްޔިތުންގެ މަޖިލީހުގެ ރައީސް، ރައީސް މުހައްމަދު ނަޝީދު ވިދާޅުވެއްޖެ އެވެ.
ރައްޔިތުންގެ މަޖިލީހުގެ އަންގާރަ ދުވަހުގެ ޖަލްސާގައި، ސަރުކާރުގެ ފަރާތުން، ކުޅުދުއްފުށި އުތުރު ދާއިރާގެ މެންބަރު ޔާސިރު ޢަބްދުއްލަޠީފް ހުށަހަޅުއްވާފައިވާ، އެއްގަމު ދަތުރުފަތުރުގެ ޤާނޫނަށް އިޞްލާޙު ގެނައުމުގެ ބިލަށް މެމްބަރުންނަށް ބަހުސްކުރުމުގެ ފުރުސަތު ހުޅުވާލައްވަމުން ރައީސް ނަޝީދު ވިދާޅުވީ، މި ބިލާމެދު މެމްބަރުން ވަރަށް ރަނގަޅަށް ވިސްނަވާ، ދިރާސާ ކުރުމުގެ ކަންކަން ކުރިއަށް ގެންދިއުމަކީ ވަރަށް ބޭނުންތެރިކަމެއް ކަމަށެވެ. އަދި މިއީ ދިވެހި ރައްޔިތުންނާ ވަރަށް ބޮޑަށް ގުޅިފައިވާ އަދި ރަށްރަށުގެ މުސްތަގުބަލާ ގުޅޭ ބިލެއް ކަމަށް އެމަނިކުފާނު ވިދާޅުވި އެވެ.
ރާއްޖޭގައި ސައިކަލް ވިއްކާ ފަރާތްތަކުން މިހާރަކަށް އައިސް ވަރަށް ކުޑަ އިންސްޓޯލްމަންޓެއް ދައްކައިގެން ސައިކަލް ވިއްކަމުންދެ އެވެ. އަދި އެ ސައިކަލް ގަތް އެގްރީމެންޓް މުއްދަތުނިމޭއިރު، މަހުން މަހަށް ދައްކާ ފީގެ ޖުމްލަ އަދަދު އެ ސައިކަލް އެއްފަހަރާ ފައިސާ ދައްކައިގެން ގަންނަން ލިބޭ އަގުގެ ދެބައިކުޅަ އެއްބަޔަށްވުރެ ބޮޑު އެއްޗެއް އަރައެވެ. ނަމަވެސް އިންސްޓޯލްމަންޓަށް 5000ރ ދައްކާލައިގެން، ދެން ކޮންމެ މަހަކު 2000ރ ނުވަތަ 4000ރ ދައްކާލައިގެން ސައިކަލް ގަންނަ މީހުން ވަރަށް ގިނަ އެވެ.
މާލެއަށް އެކަށީގެން ނުވާވަރަށް ސައިކަލާއި ވެހިކަލްތައް ގިނަ ކަމަށް ބައެއް ފަރާތްތަކުން ބުނަމުންދާއިރު، މާލޭގައި ސައިކަލްތަކާއި ވެހިކަލްތައް ޕާކު ކުރެވޭނެ ތަނެއް ނެތެވެ. އަދި މާލޭގައި ޓްރެފިކް މައްސަލަތައް ވަރަށް ބޮޑަށް އިތުރުވެފައިވާއިރު، ގަވާއިދާ ހިފާލަށް ޕާކު ކުރުމާއި ގުޅިގެން ސްޓީކާ ޖަހަމުންދާ މައްސަލާގައި ރައްޔިތުންގެ ކަންބޮޑުވުންތައް އިންތިހާއަށް ވަނީ ގޮސްފަ އެވެ. ބައެއް ފަރާތްތަކުން ބުނަމުންދަނީ ޕާކްކުރާނެ ތަނެއް ނުދައްކާ، ސްޓިކާ ޖެހުމަކީ އެއީ ގާބޫލު ކުރެވޭނެ ކަމެއް ނޫންކަމަށެވެ.
ރައީސް ނަޝީދު ވިދާޅުވީ، ގާނޫނާއި ގަވާއިދުތަކަށް އަމަލު ކުރާނަމަ، އެއްވެސް ކާރެއް މާލޭގެ މަގުމަތީގައި ޕާކް ކޮށްފައި އޮންނަން ނުޖެހޭނެ ކަމަށެވެ. ރާއްޖޭއަށް ކާރު އެތެރެކުރެވެނީ ގަރާޖެއް ދައްކައިގެން ކަމަށްވާއިރު، އެކާރު ޕާކް ކޮށްފައި އޮންނަޖެހޭނީ ގަރާޖުގައި ކަމަށް ރައީސް ނަޝީދު ވިދާޅުވި އެވެ.
