ސައިކަލެއް ވަގަށް ނެގި މީހަކު އެއް އަހަރަށް ޖަލަށް!

ސައިކަލެއް ވަގަށް ނެގި މީޙަކު އެއް އަހަރު ދުވަހަށް ޖަލަށް ލުމަށް ކްރިމިނަލް ކޯޓުން ހުކުމް ކޮށްފި އެވެ.

ޖަލަށް ލުމަށް ހުކުމް ކޮށްފައިވަނީ މއ. ހިންނަވަރުހުޅަނގުބައި އަނަސް މުހައްމަދު އެވެ. އޭނާގެ މައްޗަށް ދައުލަތުން ކޮށްފައި ވަނީ އެހެން މީހެއްގެ މުދަލެއްގެ މައްޗަށް ހުއްދަނޫން ގޮތުގައި ބާރު ހިންގުމުގެ ކުށުގެ ދައުވާ އެވެ.

އޭނާގެ މައްޗަށް އެ ދައުވާ ކުރީ 2015 ވަނަ އަހަރުގެ އޮކްޓޯބަރު 20 ވަނަ ދުވަހުގެ ރޭ ގެއްލިގެން ފުލުހުންނަށް ރިޕޯޓްކޮށްފައިވާ ސައިކަލެއް، އެ އަހަރުގެ ނޮވެމްބަރު 11 ވަނަ ދުވަހު އޭނާ ދުއްވާފައިދަނިކޮށް އަތުލައިގަތް މައްސަލައިގަ އެވެ. ފުލުހުން ސުވާލުކުރުމުން އޭނާ ބުނެފައިވާ ގޮތުގައި އެ ސައިކަލު އޭނާއަށް ދިނީ ރައްޓެއްސެކެވެ.

ނަމަވެސް، އެކަން އޭނާއަށް ސާބިތުކޮށްނުދެވުމުން ދައުވާކޮށް ޝަރީއަތް ހިންގަން ފެށުމާ އެކު އޭނާ ވަނީ ކޯޓުގައި ކުށަށް އިއުތިރާފްވެފަ އެވެ.

ގާނޫނުލް އުގޫބާތުގެ 211 ވަނަ މާއްދާގެ (ހ) ގެ ދަށުން ކުރި އެ ދައުވާ އޭނާގެ މައްޗަށް ސާބިތުވާ ކަމަށް ކަނޑައަޅައި ހުކުމް ކޮށްފައި ވަނީ އެއް އަހަރާއި 12 ދުވަހަށް ޖަލަށް ލުމަށެވެ.