ރަމްޟާން މަހު ރާއްޖޭގެ ރައްޔިތުންނަށް ބެހުމަށް ސައުދީ ސަރުކާރުންނާއި ޔުނައިޓެޑް އަރަބް އެމެރޭޓްސްގެ ސަރުކާރުން އިސްލާމިކް މިނިސްޓްރީއާ ހަވާލު ކޮށްފައިވާ ކަދުރު ކޮންމެ ގޭބިސީއަކަށް އެއް ޕެކެޓް ދިނުމަށް އިސްލާމިކް މިނިސްޓްރީން ނިންމައިފިއެވެ.

އިސްލާމިކް މިނިސްޓްރީން ބުރާސްފަތި ދުވަހު ނެރުނު އިއުލާނެއްގައި ބުނެފައިވާ ގޮތުގައި މާލޭ ސިޓީ އާއި، އައްޑޫ ސިޓީ އާއި، ފުވައްމުލަކު ސިޓީގެ އިތުރުން އަތޮޅުތަކުގެ ރަށްތަކަށް ކަދަރު ބަހާނީ ކޮންމެ ގޭބިސީއަކަށް އެއް ޕެކެޓް ކަދުރު ދޭ އުސޫލުންނެވެ.

އިއުލާނުގައި ބުނެފައިވާ ގޮތުގައި ކަދަރު ބަހާނީ އެ ގޭބިސީއެއްގެ ސައްހަކަން އަންގައިދޭ ލިޔުމެއް ގެނައުމުން އެ ލިޔުމުގެ ސައްހަކަން ބެލުމަށް ފަހު ސައްހަ ލިޔުމަކަށް އެއް ޕެކެޓް ކަދުރެވެ.

އިސްލާމިކް މިނިސްޓްރީގެ އިއުލާނުގައި ބުނެފައިވާ ގޮތުގައި ގޭބިސީގެ ސައްހަކަން ކަނޑައަޅާ ލިޔުމަކީ ކުއްޔަށް ހިފައިގެން ދިރިއުޅޭ ތަނުގެ ދެފަރާތުން ސޮއިކޮށްފައިވާ އަސްލު ނުވަތަ އެގޭބިސީއެއް ނިސްބަތްވާ އިމާރާތުގެ ގޯތީގެ ތަޖިސްޓްރީގެ އަސްލު ނުވަތަ ގޭގެ އިމާރާތުގެ ގޯތީގެ ރަޖިސްޓްރީގެ އަސްލެވެ.

ކަދުރު ބެހުމާ ބެހޭ އިއުލާނުގައި ބުނެފައިވާ ގޮތުގައި މާލެ އާއި ވިލިމާލޭގައި ދިރިއުޅޭ ތައްޔިތުންނަށް ކަދުރު ބަހާނީ ހައުސިން މިނިސްޓްރީންނެވެ. އަދި ހުޅުމާލޭގައި ދިރިއުޅޭ ރައްޔިތުންނަށް ކަދފުރު ބަހާނީ އެޗްޑީސީ ކަމަށް އިއުލާނުގައި ބުނެފައި ވެއެވެ. އަދި އަތޮޅުތަކުގަ އާއި ރަށްރަށުގައި ކަދަރު ބެހުމުގެ ކަންތައްތައް ކުރިއަށް ގެންދާނީ އަތޮޅު ކައުންސިލްތަކާއި ރަށު ކައުންސިލްތަކުން ކަމަށް އިއުލާނުގައި ބުނެފައި ވެއެވެ.

މީގެ އިތުރުން ކަދަރު ބަލާ އަންނަ މީހެއްގެ ދިވެހިރައްޔިތެއްކަން އަންގައިދޭ ކަޑު ގެންނަން ޖެހޭނެ ކަމަށް މިނިސްޓްރީގެ އިއުލާނުގައި ބުނެފައި ވެއެވެ. އަދި ކަދުރު ބަހަން ފެށުމަށް ހަމަޖެހިފައި ވަނީ މި މަހުގެ 25 ވަނަ ދުވަހުން ފެށިގެން ކަމަށް އިއުލާނުގައި ބުނެފައި ވެއެވެ. 

މިދިޔަ އަހަރުގެ ރަމަޟާން މަހާ ދިމާކޮށް ސައުދީން ރާއްޖެ އަށް ހަދިޔާކުރި ކަދުރުގެ އެއް ބައި ރައީސް އަބްދުﷲ ޔާމީންގެ އަނބިކަނބަލުން ފާތިމަތު އިބްރާހީމް ހިންގަވާ ސަދަގާތު ފައުންޑޭޝަން މެދުވެރިކޮށް ބެހުމާ ގުޅިގެން ގިނަ ބައެއްގެ ފާޑުކިޔުންތައް އަމާޒުވިއެވެ. އަދި އެންޓި ކޮރަޕްޝަން ކޮމިޝަނުން ވެސް އެ މައްސަލަ ބެލި އެވެ. އެ މައްސަލަ ބެލުމަށް ފަހު އޭސީސީން ބުނެފައި ވަނީ އެކަމުގައި ކޮރަޕްޝަން އެކުލެވިގެން ނުވާ ކަމަށާއި ސަދަގާތު ފައުންޑޭޝަނުން މަސައްކަތްކުރީ ރައްޔިތުންނަށް ކަދުރު ފޯރުކޮށްދިނުމުގައި އެހީތެރިކަން ކަމަށެވެ. ނަމަވެސް އެކަން ކުރުމުގައި އަމިއްލަ ޖަމާއަތްތައް ހަމަހަމަ ގޮތެއްގައި ބައިވެރިކުރުމަށް ވަނީ އިލްތިމާސްކޮށްފައެވެ.