ޖަނަވަރީ ޓްރާންސްފަރ މާކެޓްގައި ޓޮޓެންހަމުން އިންޓަ މިލާން އަށް ބަދަލުވި ޑެންމާކްގެ މިޑްފިލްޑަރ ކްރިސްޓަން އެރިކްސަން އޭނާ އާއި މެދު ޓޮޓެންހަމުން އަމަލުކުރި ގޮތާއި މެދު ހިތްހަމަ ނުޖެހުން ފާޅުކޮށްފިއެވެ.

27 އަހަރުގެ އެރިކްސަން އިންޓައަށް ބަދަލުވީ 16.9 މިލިއަން ޕައުންޑަށެވެ.

އެރިކްސަން ބުނީ ޓޮޓެންހަމުގައި އޭނާ ހޭދަކުރި ދުވަސްވަރު އޭނާ އާއި މެދު ޓޮޓެންހަމުން އަމަލުކުރީ "ކަޅު ކަންބަޅި" އެއްހެން ކަމަށާއި އޭނާ އަކީ އެޓީމުގައި އަބަދުވެސް ގޯސް ހަދާ މީހާ ކަމަށް މެނޭޖްމެންޓުން ނިންމާ ކަމަށެވެ.

އެރިކްސަން އިތުރަށް ބުނީ އޭނާ ކްލަބް ދޫކޮށްލާނެކަން އިއުލާން ކުރި ހިސާބުން ސަޕޯޓަރުންގެ އިތުރުން މެނޭޖްމެންޓްގެ ބައެއް ސްޓާފުންގެ ފަރާތުން ފުރައްސާރަކުރުން އޭނާ އަށް އަމާޒުވި ކަމަށާއި، ސަޕޯޓަރުން އިންތިޒާރު ކުރަމުން ދިޔައީ އޭނާ ޓީމުން ބަދަލުވާނެ ދުވަހަކަށް ކަމަށެވެ.

އެރިކްސަން ބުނީ އިންޓަ އާއިއެކު ކާމިޔާބު ހޯދަން ކެތްމަދުވެފައި ހުރިކަމަށާއި މިއީ ހަޔާތުގެ އާ ސޮފްހާއަކަށް ވާނެ ކަމަށާއި، އިޓަލީއަށް ހޭނެން ކުޑަ ދުވަސް ކޮޅެއް ނެގި ކަމުގައި ވިޔަސް އިންޓައާއި އެކު މި ސީޒަނުގައި މޮޅު ކުޅުމެއް ދެއްކޭނެ ކަމުގެ އުންމީދު އެބައޮތް ކަމަށެވެ.

އިނގިރޭސި ކްލަބްތަކަށް ފާޑު ކިޔަމުން އެރިކްސަން ބުނީ އިނގިރޭސި ކްލަބްތަކުގެ މެނޭޖްމެންތުން ދެކޭ ގޮތުގައި ކުޅުންތެރިންގެ އުމުރުން 30 އަށް ކައިރިވީމަ އެކުޅުންތެރިންގެ ޕާފޯމެންސްއަށް ބަދަލު އަންނާނެ ކަމަށް ކަމުގައާއި އެހިސާބުން ޓީމުތަކުން އެ ކުޅުންތެރިންނާއި މެދު އަމަލު ކުރަމުން ގެންދަނީ ވަރަށް ދެރަވަރުކޮށް ކަމަށް އެރިކްސަން ބުންޏެވެ.

އަޔެކްސް އިން 2009 ވަނަ އަހަރު ކެރިޔަރު ފެށި އެރިކްސަން ޓޮޓެންހަމް އަށް ބަދަލުވީ 2013 ވަނަ އަހަރެވެ. އޭނާ ވަނީ މިހާތަނަށް އެޓީމަށް ކުޅުނު 291 މެޗުގައި 68 ލަނޑު ކާމިޔާބު ކޮށްފައެވެ.

ޓޮޓެންހަމްއާ އެކު ލީގް ކަޕްގެ ދެވަނަ 2014 ވަނަ އަހަރުގެ ސީޒަނުގައި ހޯދި އެރިކްސަން ވަނީ ޓޮޓެންހަމްގެ މޮޅު ކުޅުންތެރިޔާގެ މަގާމު ދެ ފަހަރެއްގެ މަތިން ހޯދާފައެވެ.

މީގެ އިތުރުން ހަތަރު ފަހަރު ޑެންމާރކުގެ އެންމެ މޮޅު ކުޅުންތެރިޔާގެ މަގާމު ހޯދާފައިވާ އެރިކްސަން ވަނީ ގައުމީ ޓީމަށް ކުޅުނު 95 މެޗުގައި 31 ލަނޑު ކާމިޔާބު ކޮށްފައެވެ.