ދުނިޔޭގެ ސުލްހަމަސަލަސްކަމާއި ގުޅޭ ސަމިޓްގައި ރާއްޖެއިން ބައިވެރިވެއްޖެ
މި ސަމިޓުގައި 170 ގައުމަކުން 5000 އަށްވުރެ ގިނަ ބައިވެރިން ބައިވެރިވޭ
ރާއްޖޭގެ ވަފްދުގެ ބޭފުޅުން
ބައިނަލްއަގްވާމީ ސުލްހަ މަސަލަސްކަމާއި ގުޅޭ ސަމިޓެއްކަމަށްވާ ޔުނިވަރސަލް ޕީސް ފެޑެރޭޝަން ވޯލްޑް ސަމިޓްގައި ރާއްޖޭގެ ވަފުދެއް ބައިވެރިވެވަޑައިގެންފިއެވެ.
ދެކުނު ކޮރެއާގެ ވެރިރަށް ސޯލްގައި ކުރިޔަށްދާ މި ސަމިޓްގައި ރާއްޖޭގެ ފަރާތުން ބައިވެރިވި ވަފުދުގައި ހިމެނިވަޑައިގަންނަވަނީ ސަރުކާރުގެ އިސް މަގާމުތަކެއް އަދާ ކުރައްވައިފައިވާ އިބްރާހީމް ޝަހީދު ޒަކީ އާއި ރައްޔިތުންގެ މަޖިލީހުގެ ކެންދޫ ދާއިރާގެ މެމްބަރު އަލީ ހުސެއިންގެ އިތުރުން ހޯމް މިނިސްޓްރީގެ ސީނިއަރ އެގްޒެކެޓިވް ޑިރެކްޓަރ އަރުޝަދު އަޝްރަފް އެވެ.
ރާއްޖޭގެ ވަފްދުގެ ހެޑް އޮފް ޑެލިގޭޓްސް ޝަހީދު ޒަކީ ރާއްޖެ.އެމްވީ އަށް ވިދާޅުވީ، ދުނިޔޭގެ އެކި ކަންކޮޅުތަކުން ތަފާތު ސަގާފަތްތަކާ ތަފާތު ދީންތަކުގެ މީހުން އެއްކުރުވާ އެކަކު އަނެކަކަށް، ވަރަށް ގާތުން ތައާރުފުވެ ދެނެގަތުމުގެ ފުރުސަތު މި ކޮންފަރެންސު މެދުވެރިކުރުވި ކަމަށާއި އަދި އެކަކު އަނެކަކުގެ ޚިޔާލާތުތަކާއި ފިކުރުތައް، ރައުޔުތަކާ ދެކޭ ގޮތްތައް އަޑުއަހައި ވިސްނާނެ ފުރުސަތު ލިބިގެންދިޔަ ކަމަށަވެ.
އޭނާ ވިދާޅުވީ މި ކޮންފަރެންސް ނިމިގެންދާނީ ވަރަށް ވެސް އީޖާބީ ނަތީޖާއެއް ނެރެދީފައި ކަމަށާއި ރާއްޖެއާއި ބީރައްޓެހި ސަގާފަތްތަކުން ކޮންމެ ވެސް އެއްޗެއް ދަސްކޮށްދީ އެ ބީރައްޓެހިކަމަށް ކޮންމެވެސް ވަރެއްގެ ރައްޓެހިކަމެއް ގެނެސްދޭނެ ކަމަށެވެ.
މި މަހުގެ ތިނަކުން އަށެއްގެ ނިޔަލަށް ކުރިޔަށްދާ މި ކޮންފަރެންސްގައި ބައިވެރިވާ މެމްބަރުން އެ މެމްބަރުންގެ ގައުމަތަކަށް ގޮސް ތަފާތު ފިކުރުތަކުގެ މީސްތަކުންގެ މެދުގައި އެކުވެރިކަން ގާއިމުކުރުމާ ސުލްހައިގެ މެސެޖް ފޯރުކޮށްދޭނޭ ސަފީރުންކަމުގައި ވެގެންދާނެ ކަމަށް ގަބޫލުކުރައްވާ ކަމަށް ޝަހީދު ޒަކީ ވިދާޅުވިއެވެ.
މި ސަމިޓުގައި 170 ގައުމަކުން 5000 އަށްވުރެ ގިނަ ބައިވެރިން ބައިވެރިވެއެވެ. މި ސަމިޓް ހުޅުއްވައިދެއްވީ ޔުނިވަރސަލް ޕީސް ފެޑެރޭޝަނުގެ ކޯ ފައުންޑަރ ޑރ. ނޮޗް ޔޭސް ހޭ އެވެ. މި ސަމިޓް ހުޅުވައިދެއްވުމުގެ ރަސްމިއްޔާތުގައި ޔުނައިޓެޑް ނޭޝަންސްގެ (ޔޫއެން) ގެ ސެކެޓްރީ ޖެނެރަލް ބަންކީ މޫން ވެސް ތަގުރީރު ކުރެއްވިއެވެ. މީގެ އިތުރުން ގައުމުތަކުގެ ކުރީގެ ރައީސުންނާއި، ބޮޑު ވަޒީރުންގެ އިތުރުން މަޖިލީހުގެ ރައީސުންވެސް ވަނީ ތަގުރީރު ކުރައްވައިފައެވެ.
