މޫނުބުރުގާ އެޅުން މަނާކުރުމާ ދެކޮޅަށް ޖަރުމަނުގެ ކޯޓަކުން ހުކުމްކޮށްފި
ސިޔާސީ ޕާޓީ ތަކުގެ ހިޔާލުތައް ވަނީ ތަފާތުވެފައި
މޫނު ބުރުގާ އަޅާފައި ތިބި ބައެއް
މޫނުބުރުގާ އެޅުން މަނާކުރުމާ ދެކޮޅަށް ޖަރުމަނުގެ ކޯޓަކުން ހުކުމްކޮށްފިއެވެ.
ޖަރުމަނުވިލާތުގެ ސްކޫލަށް ކިޔަވަންދާ ދަރިވަރަކު މޫނު ބުރުގާ އަޅައިގެން ސްކޫލަށް ކިޔަވަން ނުދެވޭނެ ކަމަށް ސްކޫލުން ބުނުމުން ކޯޓުން އެ ސްކޫލާ ދެކޮޅަށް ވަނީ މައްސަލަ ނިންމައިފިއެވެ.
އިސްތިއުނާފު ނުކުރެވޭނެ ކަމަށް ބުނެ ކޯޓުން އެ މައްސަލަ ނިންމި ގޮތާއި ގުޅޭ ގޮތުން ސްކޫލުތަކުގައި މޫނު ބުރުގާ އެޅުން ހުއްދަކުރަން ޖެހޭ ކަމާއި މެދު ވަނީ ބަހުސް ކުރެވެން ފަށާފައެވެ.
ހަމްބަރގް ގައި ހުންނަ އެ ކުއްޖާ ކިޔަވަންދާ ސްކޫލުގެ އިސްވެރިން ވަނީ މޫނު ފޮރުވައިގެން ނާދެވޭނެ ކަމަށް އެ ކުއްޖާގެ މަންމައަށް އަންގާފައެވެ.
އެކަމަކު ކޯޓުން ބުނެފައިވަނީ އެފަދަ ކަމެއް މަނާ ކުރުމުގެ ހުއްދައެއް އެއްވެސް ފަރާތަކަށް ލިބިފައިނުވާ ކަމަށެވެ. ހަމްބަރގްގެ ސޯޝަލް ޑިމޮކްރެޓިކް އެޑިއުކޭޝަން ސެނެޓަރ ރަބޭ ވަނީ، ވީހާވެސް އަވަހަށް ގާނޫނުތައް ބަަދަލު ކުރުމަށް މަސައްކަތް ކުރައްވާނެ ކަމަށް ވިދާޅުވެފައެވެ.
ޖަރުމަނުގެ ތައުލީމާބެހޭ ގާނޫނުތައް ހަދަނީ މައި ސަރުކާރުގެ ބަދަލުގައި އެ ސަރަހައްދެއްގެ ސްޓޭޓުންނެވެ. ޖަރުމަނުގެ ސިޔާސީ ޕާޓީތަކުން ވަނީ މީގެ ކުރިން މޫނު ބުރުގާ އެޅުމާއި ދެކޮޅަށް އަޑު އުފުލާފައެވެ. އެކަމަކު މި މައްސަލާގައި ބައެއް ފަރާތްތަކުގެ ހިޔާލުތައް ވަނީ ތަފާތުވެފައެވެ.
