ގައުމީ ޓީމުން ރިޓަޔާކުރާ ކުޅުންތެރިންނަށް ދޭން މަސައްކަތްކުރަމުން އަންނަ އިންޝުއަރެންސް ސްކީމަކީ ޒުވާން އެތުލީޓުންނަށް ލިބިގެންދާނެ އިތުރު ހިތްވަރެއް ކަމަށް ގައުމީ ޓީމުގެ ކުރީގެ ގޯލްކީޕަރު އިމްރާން މުހައްމަދު ބުނެފި އެވެ.

މިއަހަރަށް ރައްޔިތުންގެ މަޖިލިސް ހުޅުއްވައިދެއްވާ ރިޔާސީ ބަޔާން އިއްވަވަމުން ރައީސުލްޖުމްހޫރިއްޔާ އިބްރާހީމް މުހައްމަދު ސޯލިހު ވިދާޅުވީ ގައުމީ ޓީމަކަށް މަދުވެގެން 5 އަހަރު ކުޅެފައިވާ ކުޅުންތެރިން ރިޓަޔާކުރުމުން، ދިރިއުޅުމަށްޓަކައި އެހެން މަސައްކަތެއް ފެށުމަށް އެހީތެރިވެދިނުމުގެ ގޮތުން، މިއަހަރުގެ ތެރޭގައި ލޯން ސްކީމެއް ތައާރަފުކުރުމަށް މަސައްކަތްކުރައްވަމުން ގެންދަވާ ކަމަށެވެ.

ރައީސްގެ މި ނިންމެވުމަށް މީގެ ކުރިން ގައުމީ ޓީމުތަކުން ފެނިގެންދިޔަ ކުޅުންތެރިންނާއި މިހާރުވެސް ގައުމީ ޓީމަތަކަށް ކުޅެމުން އަންނަ ގިނަ ކުޅުންތެރިން ވަނީ މަރުހަބާ ކިޔާފައެވެ.

ރާއްޖޭގައި އުފެދުނު އެންމެ މޮޅު އެއް ގޯލްކީޕަރު ކަމަށްވާ އިމްރާން މުހައްމަދު ބުނީ ރާއްޖޭގެ ހުރިހާ އެތްލީޓުންގެ ނަމުގައި ރައީސް އިބްރާހިމް މުހައްމަދު ސާލިހަށް ޝުކުރުދަންނަވާ ކަމަށާއި، މިއީ ކުޅިވަރުގައި ގައުމީ ފެންވަރުގައި ކުރިއަށްދާން ޒުވާން އެތުލީޓުންނަށް ލިބިގެންދާނެ އިތުރު ހިތްވަރެއް ކަމަށެވެ.

ދިވެހިރާއްޖޭގައި އުފެދުނު އެންމެ މޮޅު ގޯލްކީޕަރު އިމްރާން މުހައްމަދު 20 އަހަރުވީ ކުލަގަދަ، ކާމިޔާބު ކެރިއަރަކަށް ފަހު ފުޓްބޯޅަ ކުޅުން ހުއްޓާލީ މިދިޔަ އަހަރުއެވެ. އަދި ގައުމީ ފުޓްބޯޅަ ޓީމަށް 17 އަހަރު ކުޅެދިނުމަށް ފަހު ގައުމީ ޓީމުން ރިޓަޔާކުރީ 2016 ވަނަ އަހަރު އެވެ. އަދި އިމްރާން ވަނީ މިދިޔަ އަހަރު ކުޅިވަރުގެ ދާއިރާއިން، ކުޅިވަރު ކުޅުމާއި މީހުން ތަމްރީނު ކުރުމުގެ ރޮނގުން ހިތްވަރު ދިނުމުގެ ގައުމީ އިނާމުވެސް ހާސިލުކޮށްފައެވެ.