ކޮރޯނާވައިރަހުން ރައްކާތެރިވުމަށް ޢާންމުން ހޭލުންތެރިކުރުމުގެ ޚާއްޞަ ޕްރޮގުރާމުތަކެއް ފަށައިފި

ދުނިޔޭގެ އެކި ކަންކޮޅުތަކުގައި މިހާރު ފެތުރެމުން އަންނަ ކޮރޯނާވައިރަހުން ސަލާމަތްވުމަށް ރާއްޖެއިން އަޅަމުންގެންދާ ފިޔަވަޅުތަކުގެތެރެއިން ޢާންމުން ހޭލުންތެރިކުރުމުގެ ޚާއްޞަ ޕްރޮގުރާމުތަކެއް ފަށައިފިއެވެ.

ހެލްތު މިނިސްޓްރީން ބުނީ އަތޮޅުތެރެއަށް ޢަމާޒުކޮށްގެން ކުރިއަށްގެންދާ މިޕްރޮގުރާމުތަކުގައި ރާއްޖެގެ ހުރިހާ އަތޮޅެއް ކަވަރކުރުމަށް ވަނީ ހަމަޖެހިފައިވާ ކަމަށެވެ.

ރަށްރަށުގައި ކުރިއަށްގެންދާ މިޕްރޮގުރާމުގެ ތެރެއިން ދޮރުން ދޮރަށް (ޑޯ-ޓު-ޑޯ/ ހޯމް ވިސިޓް)ކޮށް މަޢުލޫމާތު ދިނުމާއި ސްކޫލްތަކުގައި ތަޢުލީމު ޙާޞިލުކުރަމުން އަންނަ ކުދިންނަށާއި އޮފީސްތަކާއި އެކި މުއައްސަސާތަކުގައި ސެޝަންތައް ކުރިއަށް ގެންދާނެ ކަމަށް މިނިސްޓްރީން މަޢުލޫމާތުދެއެވެ.

މީގެ އިތުރުން ހެލްތު މިނިސްޓްރީން ބުނީ މިޙަރަކާތުގެ ތެރެއިން ދުނިޔޭގައި މިހާރު ފެތުރެމުން އަންނަ ކޮރޯނާވައިރަހާއި ގުޅޭ މަޢުލޫމާތާއި އެވައިރަސް ފެތުރޭ ގޮތާއި އޭގެއިން ރައްކާތެރިވުމަށް ފަރުދީގޮތުންނާއި މުޖުތަމަޢު ގުޅިގެން ކުރަންޖެހޭ މަސައްކަތްތަކުގެ މަޢުލޫމާތުތައް ދެވިފައިވާ ކަމަށެވެ.

ކޮރޯނާވައިރަހުން ރައްކާތެރިވުމަށް ރާއްޖޭގެ މީހުން ދިރިއުޅޭ ހުރިހައި ރަށްރަށުގައި ހުރި ހޮސްޕިޓަލް، ޞިއްޙީ މަރުކަޒު އަދި ޞިއްޙީ އިދާރާތަކާއި މިކަމާ ބެހޭ އެހެނިހެން ފަރާތްތައް ގުޅިގެން އަންނަނީ މަސައްކަތްކުރަމުންނެވެ. މިވައިރަހުން ރައްކާތެރިވުމަށް ރާއްޖޭގެ ފަތުރުވެރިންނަށް ޚިދުމަތްދޭ ރިސޯޓުތަކުގައި ވެސް އަންނަނީ މަސައްކަތްކުރަމުންނެވެ.