ސިޔާސަތުތައް ތަންފީޒު ކުރުމަށް ވާގިވެރިވުމާއި އެކު މަޖިލީހުން ސަރުކާރަށް ފާރަވެރިވެސް ވާނެ: ނަޝީދު
މަޖިލިސް މަސައްކަތް ކުރާނީ ރައްޔިތުންގެ ލާބައާއި މަންފާއަށް
ރައްޔިތުންގެ މަޖިލީހުގެ ރައީސް މުހައްމަދު ނަޝީދު
ސަރުކާރުގެ ސިޔާސަތުތައް ތަންފީޒުކުރުމުގައި ސަރުކާރަށް އެހީތެރިވާނެ ކަމަށާއި ރައްޔިތުންގެ މަޖިލީހުން ގެންދާނީ އެ ސިޔާސަތުތައް ތަންފީޒު ކުރަމުންދާއިރު ސަރުކާރަށް ވާގިވެރިވެ ފާރަވެރިވެސް ވާނެ ކަމަށް ރައްޔިތުންގެ މަޖިލީހުގެ ރައީސް މުހައްމަދު ނަޝީދު ވިދާޅުވެއްޖެއެވެ.
ރިޔާސީ ބަޔާން ދެއްވި ރައްޔިތުންގެ މަޖިލީހުގެ މިއަހަރުގެ ފުރަތަމަ ދައުރުގެ ފުރަތަމަ ޖަލްސާގައި ވާހަކަދައްކަވަމުން ރައީސް ނަޝީދު ވިދާޅުވީ ދިވެހި ރާއްޖޭގެ ރައްޔިތުންގެ ކުރިއެރުމާއި ލާބައާއި ތަރައްގީއަށްޓަކައި ސަރުކާރުން ކުރައްވަން ހުރި އެންމެހާ ކަންކަމުގައި ފަސްޖެހުމެއްނެތި ރައްޔިތުންގެ މަޖިލީހުގެ ފުރިހަމަ އެއްބާރުލުން ލިބޭނެ ކަމުގެ ޔަގީން ކަން އަރުވާ ކަމަށެވެ.
ރައީސް ނަޝީދު ވިދާޅުވީ ދައުލަތުގެ ތިންބާރުގެ ތެރެއިން އެއްބާރުގެ ގޮތުގައި އޮވެ، ސަރުކާރުން ކުރާ ކަންތައްތަކަށް ފާރަވެރިވެ، ސަރުކާރު ޖަވާބުދާރީ ކުރުވުމުގެ ބޮޑު ޒިންމާ ގާނޫނު އަސާސީން މަޖިލީހަށް މަތިކޮށްފައިވާ ކަމަށެވެ. މަޖިލީހުގެ 75% އަކީ ރައީސް ސޯލިހު ނިސްބަތްވެވަޑައިގަންނަވާ މޯލްޑިވިއަން ޑިމޮކްރެޓިކް ޕާޓީ (އެމްޑީޕީ)ގެ މެމްބަރުން ކަން ފާހަގަ ކުރައްވާ އެ ޕާޓީގެ ރައީސް ވިދާޅުވީ ރައްޔިތުންގެ މަޖިލީހުން ސަރުކާރު ޖަވާބުދާރީ ކުރުވަން ވާނެކަމާއި މަޖިލީހުން ސަރުކާރު ޖަވާބުދާރީ ކުރުވުމުގެ މަސައްކަތް ވަރަށް ފުރިހަމައަށް ކުރާ ކަމުގައި ވަރަށް ގިނައިން ރައީސް ސޯލިހު ވިދާޅުވާ ކަމީ އުފާކުރައްވާ ކަމެއް ކަމަށެވެ.
އަދި މި ފެށޭ އަހަރުގައި މަޖިލީހުގެ މަސައްކަތްތައް ބައްޓަން ވެގެންދާނީ ދިވެހި ރާއްޖޭގެޖުމްހޫރިއްޔާގެ ގާނޫނު އަސާސީގެ ބާރު ރައްކާތެރިކުރުމުގެ މައްޗަށް ކަމަށެވެ. އަދި ރާއްޖޭގެ ރައްޔިތުންގެ ކުރިއެރުމާއި ތަރައްގީއަށްޓަކައި ސަރުކާރަށް ވާގިވެރިވަމުން ސަރުކާރު ޖަވާބުދާރީ ކުރުވުމަށް ވެސް މަސައްކަތް ކުރައްވާނެ ކަމަށެވެ. ރައީސް ނަޝީދު ވިދާޅުވީ ސަރުކާރުގެ ސިޔާސަތުތައް ތަންފީޒުކުރުމުގައި ސަރުކާރަށް އެހީތެރިވާނެ ކަމަށާއި އެ ސިޔާސަތުތައް ތަންފީޒު ކުރަމުންދާއިރު ވާގިވެރިކަމާއި އެކު ސަރުކާރަށް ފާރަވެރިވެސް ވާނެ ކަމަށެވެ.
