ދިރާގު ދިވެހި ޕްރިމިއާ ލީގުގައި ފޯކައިދޫ އަދި ދަ ގްރާންޑޭ ބައްދަލުކުރި މެޗު ގްރާންޑޭއިން ކާމިޔާބުކޮށްފިއެވެ.

ގައުމީ ފުޓުބޯޅަ ސްޓޭޑިއަމްގައި ކުޅުނު މި މެޗު ގްރާންޑޭއިން ކާމިޔާބުކުރީ 3-1 ގެ ނަތީޖާ އަކުންނެވެ.

މެޗު ފަށައިގެން ދެޓީމުގެ ފަރާތުން ހަމަހަމަ ކުޅުމެއް ފެނިގެންދިޔައިރު ގްރާންޑޭއިން ގެންދިޔައީ ފޯކައިދޫގެ ގޯލަށް ނުރައްކާ ކުރަމުންނެވެ. މެޗުގެ 37 ވަނަ މިނެޓުގައި ގްރާންޑޭއިން ވަނީ ލަނޑު ޖަހާ ލީޑު ނަގައިފައެވެ. މި ލަނޑު އެޓީމަށް ކާމިޔާބުކޮށްދިނީ އޮބައިދާއެވެ. އޭގެ ދެ މިނެޓުފަހުން ފޯކައިދޫއިން ވަނީ ލަނޑު ޖަހާ ނަތީޖާ ހަމަހަމަ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ހުސެއިން ފުއާދު އެވެ.

މެޗުގެ ފުރަތަމަ ހާފު ނިމިގެންދިޔައީ 1-1 ގެ ނަތީޖާއަކުންނެވެ.

މެޗުގެ ދެވަނަ ހާފު ފަށައިގެން ގްރާންޑޭއިން އެޓީމުގެ އެޓޭކްތައް އިތުރަށް ވަރުގަދަކުރިއިރު، މެޗުގެ 79 ވަނަ މިނެޓުގައި ގްރާންޑޭއިން ވަނީ ލަޑު ޖަހާ ދެވަނަ ފަހަރަށް ލީޑު ނަގައިފައެވެ. މި ލަނޑު ވެސް އެޓީމަށް ކާމިޔާބުކޮށްދިނީ އޮބައިދާ އެވެ. މި ލަނޑާއިއެކު ފޯކައިދޫއިން ކުރިޔަށް ޖެހިލާ އެޓީމުގެ އެޓޭކްތައް ވަރުގަދަކުރިއެވެ. ނަމަވެސް މެޗުގެ 87 ވަނަ މިނެޓުގައި އޮބައިދާވަނީ އިތުރު ލަނޑެއްޖަހާ އޭނާގެ ހެޓްރިކް ފުރިހަމަ ކޮށްފައެވެ. މި ލަނޑަށްފަހު ވެސް އޮބައިދާއަށް ވަނީ ލަނޑު ޖެހުމަށް ރަނުގެ ފުރުސަތެއްލިބި ބޭކާރުވެފައެވެ. އޭރިޔާ ތެރެއިން އޭނާ ފޮނުވައިލި ބާރު ހަމަލާ ގޯލާ އަމާޒުނުވެ ދިޔައީ ބޭރަށެވެ.

މެޗަށްފަހު ވާހަކަދައްކަމުން ފޯކައިދޫގެ ކޯޗު އަލީ ނިޝްތާރު މުހައްމަދު ބުނީ މެޗުގެ ކުޅުމާއިމެދު ހިތްހަމަ ޖެހޭ ކަމަށާއި މި މެޗުގައި ފޯކައިދޫއަށް ދިމާވި އެންމެ ބޮޑު ދަތިކަމަކީ އަނިޔާގެ ސަބަބުން ކުޅުންތެރިން ބަދަލުކުރަން ޖެހުން ކަމަށެވެ. އަދި ކުރިޔަށް އޮތް އެފްއޭ ކަޕަށް ޓީމު ވަރަށް ރަނގަޅަށް ތައްޔާރުވާނެ ކަމަށް އޭނާ ބުންޏެވެ.

ގްރާންޑޭގެ ކޯޗު އިސްމާއިލް މަހްފޫޒް (އިންމަ) ބުނީ މޮޅަކާއިއެކު ލީގު ނިންމާލެވުމުން ހިތްހަމަ ޖެހޭ ކަމަށާއި ޓީމުގެ މިހާރުން ފަށައިގެން އެފްއޭކަޕް އަށް ތައްޔާރުވާން ފަށާނެ ކަމަށެވެ.