އެމެރިކާ އާއި ތާލިބާން ހަނގުރާމަވެރިންނާ ދެމެދު ކުރިޔަށްދާ ސުލްހައިގެ ވާހަކަތަކުގައި އެމެރިކާގެ ފަރާތުން އިސްކޮށްއުޅުއްވާ ޒަލްމޭ ޚާލިޒާދު އެވާހަކަތަކުގެ މައުލޫމާތު އަފްޣާނިސްތާންގެ ރައީސް އަޝްރަފް ޣަނީ އާ ހިއްސާކުރައްވައިފި އެވެ.

ޚާލިޒާދު ވިދާޅުވެފައިވަނީ މިހާތަނަށް އާއިރު މިވާހަކަތަކުން މުހިންމު ކުރިއެރުންތަކެއް ލިބިފައިނުވާ ކަމަށެވެ. ނަމަވެސް މިވާހަކަތަކަށް ކުރިއެރުން ލިބޭނެ ކަމަށް އުންމީދުކުރައްވާކަމަށް ޚާލިޒާދު ވަނީ ވިދާޅުވެފަ އެވެ. އަދި ހަމައެއާއެކު ހަމަލާބަދަލުކުރުން މަދުކުރުމާމެދު އެއްބަސްވުމަކާ ހަމައަށް އާދެވިފައިވީނަމަވެސް އެކަމަށް އެކުލަވާލަންޖެހޭ ޓައިމްފްރޭމް އެކުލަވާނުލާކަމަށްވެ އެވެ.

ޚާލިޒާދު އަފްޣާނިސްތާނުގެ ވެރިރަށް ކާބުލްއަށް މިވަޑައިގަތީ ދޯހާއާއި ބްރަސަލްސް އާއި އިސްލާމްއާބާދުގައި ވާހަކަތައް ކުރިޔަށް ގެންދިޔުމަށްފަހު ކަމުއެވެ.

ޚާލިޒާދާ ބައްދަލުކުރުމަށްފަހު ޣަނީގެ އޮފީހުން ނެރެފައިވާ ބަޔާނުގައި ބުނެފައިވަނީ މިހާރު ކުރިޔަށްދާ ވާހަކަތަކުން އަފްޣާނިސްތާނުގައި 18 އަހަރު ވަންދެން ކުރިޔަށްދާ ހަނގުރާމަ ނިމުމަކަށް އަތުވެދާނެކަމަށް ޚާލިޒާދު އުންމީދުކުރައްވާ ކަމަށެވެ.

އަފްޣާނިސްތާނުގެ ޗީފް އެގްޒެކެޓިވް އަބްދުﷲ އަބްދުﷲ ވިދާޅުވާ ސުލްހައިގެ ވާހަކަތައް ކުރިޔަށްދާއިރު ތާލިބާނުންނަށް ވަކި ޝަރުތުތަކެއް ކަނޑައެއްނޭޅޭނެ އެވެ. ނަމަވެސް ޣަނީ ތަކުރާރުކޮށް ވިދާޅުވަމުން ގެންދަވަނީ ހަމަލާދިނުން ތާލިބާނުން ހުއްޓާލަންޖެހޭނެ ކަމަށެވެ.

ހޮނިހިރު ދުވަހު ޕާކިސްތާނުގައި ހުންނަ އެމެރިކާގެ އެމްބަސީން ބުނެފައިވަނީ ޚާލިޒާދާ ޕާކިސްތާނާއެކު ވާހަކަތައް ކުރިޔަށްގެންދެވީ ސުލްހައިގެ ވާހަކަތަކަށް އަޅާ ފުރަތަމަ ފިޔަވަޅެއްގެ ގޮތުން ތާލިބާނުން ދެމުންގެންދާ ހަމަލާތައް މަދުކުރުމަށް ތާލިބާނަށް ބާރުއެޅުމުގެ ގޮތުންކަމަށެވެ. ޕާކިސްތާނުގެ ފޮރިން މިނިސްޓްރީން ބުނެފައިވަނީ ތާލިބާނާއެކު ސުލްހައިގެ ވާހަކަތައް ކުރިޔަށްގެންގޮސް ސުލްހަ ގާއިމުވެގެންދިޔުމަކީ ޕާކިސްތާނުން އެދޭގޮތްކަމަށެވެ.

ސުލްހައިގެ ވާހަކަތައް ކުރިޔަށްގެންދާއިރު އަފްޣާނިސްތާނުގެ ސަރުކާރާއި އެމެރިކާގެ ފައުޖުތަކުން ހަމަލާ ދެމުންގެންދާތީ ސުލްހައިގެ ވާހަކަތައް ރަނގަޅަށް ނިމޭނެކަމާމެދު ވަނީ މިހާރު ޝައްކު އުފެދިފަ އެވެ.