އިންޓަރ އޮފީސް ހޭންޑްބޯޅަ މުބާރާތުގެ ކުޅުން ފަށައިފި

ފަސްވަނަ ހިޓާޗީ އިންޓަރ އޮފީސް އަދި ކުންފުނިތަކުގެ ހޭންޑްބޯޅަ މުބާރާތުގެ ކުޅުން ފަށައިފި އެވެ.

މިއަހަރުގެ މުބާރާތްވެސް ދެ ޑިވިޝަނަކަށް ބަހާލާފައިވާއިރު، ހޮނިހިރު ދުވަހު ފަށާފައިވަނީ ދެވަނަ ޑިވިޝަނުގެ ކުޅުމެވެ.

މުބާރާތުގެ ފިރިހެން ދެވަނަ ޑިވިޝަނުގައި 14 ޓީމެއް ވާދަކުރާއިރު، މި ބައިގެ ކުޅުން ކުރިއަށްދަނީ 3 ގްރޫޕަކަށް ބަހާލައިގެންނެވެ. މުބާރާތުގެ ކުޅުން ހޮނިހިރު ދުވަހު ފެށިއިރު، ހޮނިހިރު ދުވަހު ކުޅެފައިވަނީ ފިރިހެން ދެވަނަ ޑިވިޝަނުގެ ހަތަރު މެޗެވެ.

ގައުމީ ހޭންޑްބޯޅަ ދަނޑުގައި ކުރިއަށްދާ މި މުބާރާތުގައި ހޮނިހިރު ދުވަހު ހަވީރު ކުޅުނު ދެ މެޗަށް ބަލާލާއިރު، ފުރަތަމަ މެޗުގައި ބައްދަލުކުރީ ހަބީބް ބޭންކް ލިމިޓެޑާއި މިނިސްޓްރީ އޮފް ފައިނޭންސް އެވެ. މި މެޗު 5-2 އިން ކާމިޔާބުކުރީ މިނިސްޓްރީ އޮފް ފައިނޭންސްއިންނެވެ. އަދި ދެވަނަ މެޗުން ކޮމަރޝަލް ބޭންކް އޮފް މޯލްޑިވްސް އަތުން މޯލްޑިވްސް މަނިޓަރީ އޮތޯރިޓީ (އެމްއެމްއޭ) ވަނީ ފަސޭހަކަމާއެކު 21-6 އިން މޮޅުވެފައެވެ.

މިއަހަރުގެ މުބާރާތުގެ އަންހެން ދެވަނަ ޑިވިޝަނުގެ ކުޅުން އާދީއްތަ ދުވަހުގެރޭ ފަށާއިރު، މިބައިގައި 25 ޓީމެއް ވަނީ ބައިވެރިވެފައެވެ. އަންހެން ދެވަނަ ޑިވިޝަނުގެ ކުޅުން ކުރިއަށްދާނީ 6 ގްރޫޕަކަށް ބަހާލައިގެންނެވެ.

މީގެ އިތުރަށް ފިރިހެން އެއްވަނަ ޑިވިޝަނުގައި ހަތަރު ޓީމެއް ވާދަކުރާ ގޮތަށް ކުރިން އޮތް ނަމަވެސް، ގުރުނެގުމަށްފަހު މިނިސްޓްރީ އޮފް ޓޫރިޒަމްއިން ވަނީ މުބާރާތުގައި ބައިވެރި ނުވާން ނިންމައިފައެވެ. އެހެން ކަމުން މި ބައިގައި ބައިވެރިވާނީ ތިން ޓީމެވެ. އެއީ މޯލްޑިވްސް ނެޝަނަލް ޑިފެންސް ފޯރސް (އެމްއެންޑީއެފް)، މޯލްޑިވްސް ޕޮލިސް ސަރވިސް އަދި މޯލްޑިވްސް ޕޯޓްސް ލިމިޓެޑެވެ. ފިރިހެން އެއްވަނަ ޑިވިޝަނުގެ ކުޅުން ފަށާނީ މި މަހުގެ ނުވަވަނަ ދުވަހު އެވެ.