ލިވަރޕޫލް ޖަނަވަރީ ޓްރާންސްފަރ މާކެޓްގައި "ބިޒީ" ވާންވީ ސަބަބެއް ނެތް

ލިވަރޕޫލް ޖަނަވަރީ ޓްރާންސްފަރ މާކެޓްގައި ބިޒީ ވާންވީ ސަބަބެއް ނެތް ކަމަށް ލިވަރޕޫލްގެ ކޯޗު ޔާގަން ކްލޮޕް ބުނެފިއެވެ.

ކްލޮޕް މިހެން ބުނީ ލިވަރޕޫލާއި ސައުތްހެމްޕްޓަން އާއި ދެކޮޅަށް ހޮނިހިރު ދުވަހުގެ ރޭގެ ކުރިން ކުޅުމަށް ހަމަޖެހިފައިވާ މެޗުގެ ކުރިން ބޭއްވުނު ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ.

ކްލޮޕް ބުނީ ސީޒަން ރަނގަޅުވާ ވަރަކަށް، ސްކޮޑް ރަނގަޅުވާ ވަރަކަށް އަދި ކުޅުންތެރިން ކުރާ މަސައްކަތް ރަނގަޅުވާ ވަރަކަށް ކުރަން ޖެހޭ މަސައްކަތް މަދުވާނެ ކަމަށާއި އަދި ލިވަރޕޫލް ކުޅުންތެރިން މިހާރު ކުރާ މަސައްކަތާއި މެދު ހިތްހަމަ ޖެހޭ ކަމަށެވެ.

ކްލޮޕް އިތުރަށް ބުނީ ޖޫން ޖުލައި ޓްރާންސްފަރ މާކެޓް ޕްލޭން އަކީ ޖަނަވަރީ ޓްރާންސްފަރ މާކެޓްގައި ބިޒީ ނުވުމަށް ހަދާ ޕްލޭން އެއް ކަމަށެވެ. ނަމަވެސް ކްލޮޕް ބުނީ ކުޅުންތެރިންނަށް އަނިޔާ ވެއްޖެ ނަމަ ޕްލޭން ބަދަލުވާނެ ކަމަށާއި، އެކަމަކު ލިވަރޕޫލުން އަނިޔާވި ގިނަ ކުޅުންތެރިންވަނީ މިހާރު އަނިޔާއިން ސަލާމަތްވެ އެނބުރި އައިސްފައި ކަމަށެވެ.

ލިވަރޕޫލުން ވަނީ ޖަނަވަރީ ޓްރާންސްފަރ މާކެޓްގައި ސަލްޒްބާގގެ ޖަޕާން ފޯވާޑް ޓަކުމީ މިނަމީނޯގެ ސޮއި ހޯދައިފައެވެ. ނަމަވެސް އެއަށްފަހު ލިވަރޕޫލުން ފެނިގެންދިޔައީ ޓްރާންސްފަރ މާކެޓްގައި ހަމަހިމޭނުން އޮތް ތަނެވެ.

ލިވަރޕޫލުން ހޮނިހިރު ދުވަހުގެރޭ ސައުތްހެމްޕްޓަން އާއި ދެކޮޅަށް ނިކުންނަ މެޗުގައި އެޓީމަށް އެއްވެސް ޕްރެޝާއެއް ނެތް ކަމަށް ކޯޗު ކްލޮޕް ވަނީ ބުނެފައެވެ. ލިވަރޕޫލުން މިވަގުތު އޮތީ ޕްރިމިއާ ލީގުގެ އެއް ވަނައިގައި 19 ޕޮއިންޓުގެ ލީޑަކާއިއެކުގައެވެ.