އެފްރިކާގެ އެންމެ މޮޅު ކުޅުންތެރިޔަކަށް ލިވަރޕޫލްގެ މާނޭ

އެފްރިކާ ބައްރުގެ 2019 ވަނަ އަހަރުގެ އެންމެ މޮޅު ކުޅުންތެރިޔާގެ އެވޯޑް، ލިވަރޕޫލްއަށް ކުޅެމުން އަންނަ ސެނެގާލްގެ ހުނަރުވެރި ފޯވާޑް ސަދިއޯ މާނޭ ކާމިޔާބުކޮށްފިއެވެ.

މާނޭ މި އެވޯޑް ކާމިޔާބުކުރީ އޭނާއާއިއެކީ އެއް ކްލަބަކަށް ކުޅެމުން އަންނަ މިސްރުގެ މުހައްމަދު ސަލާހު އާއި މެންޗެސްޓަރ ސިޓީއަށް ކުޅެމުން އަންނަ އަލްޖީރިޔާގެ ރިޔާދް މަހްރޭޒް ފަހަތަށް ޖައްސާލުމަށް ފަހުގައެވެ. މިއީ އެފްރިކާގެ މޮޅު ކުޅުންތެރިޔާގެ އެވޯޑް މާނޭ ކާމިޔާބުކުރި ފުރަތަމަ ފަހަރެވެ.

ފާއިތުވި ދިޔަ ތިން އެވޯޑުގައިވެސް އެންމެ މޮޅު ތިން ކުޅުންތެރިންގެ ލިސްޓުގައި ހިމެނުނު މާނޭ ވަނީ އެވޯޑް ލިބުމުން ވަރަށް ފަހުރުވެރުވާ ކަމަށާއި ވަރަށް އުފާވެއްޖެ ކަމަށް ބުނެފައެވެ. އަދި މި އެވޯޑު ހާއްސަކުރަނީ އޭނާގެ އާއިލާއަށާއި، ކްލަބަށާއި، މެނޭޖަރު ޔަރގެން ކްލޮޕްއަށް ކަމަށް އޭނާ ބުނެފައިވެއެވެ. އޭނާ ވަނީ އެވޯޑް ހަފުލާ ބޭއްވުނު މިސްރުގެ ހުރިހާ ފަރާތްތަކަށާއި އޭނީ ނިސްބަތްވާ ސެނެގާލްގެ ރައްޔިތުންނަށްވެސް ހާއްސަ ޝުކުރެއް އަދާކޮށްފައެވެ.

މިދިޔަ ސީޒަނުގެ ޕްރިމިއަރ ލީގުގެ ގޯލްޑަން ބޫޓު ކާމިޔާބު ކުރި މާނޭ ވަނީ، މިދިޔަ ސީޒަނުގެ ޗެމްޕިއަންސް ލީގު ކާމިޔާބުކޮށްފައެވެ. އަދި ސީޒަނުގެ މިހާތަނަށް އައިއިރު، ލިވަރޕޫލުން ދެ ތަށި ކާމިޔާބުކޮށްފައިވާއިރު، އޭނާއަކީ ލިވަރޕޫލަށް ވަރަށް މުހިންމު ކުޅުންތެރިޔެކެވެ. ސީޒަނުގެ މިހާތަނަށް އައިއިރު ލިވަރޕޫލަށް ކުޅުނު 28 މެޗުގައި އޭނާ ވަނީ 15 ލަނޑު ޖަހާފައެވެ.