ޕީއެފްއޭއިން ހޮވާ އެންމެ މޮޅު ކުޅުންތެރިޔާގެ މަގާމު ލިވަރޕޫލްގެ ވެން ޑައިކަށް

ޕްރޮފެޝަނަލް ފުޓްބޯލަރޒް އެސޯސިއޭޝަނުން ހޮވާ އެންމެ މޮޅު ކުޅުންތެރިޔާގެ އެވޯޑު ލިވަރޕޫލްގެ ކުޅަދާނަ ޑިފެންޑަރު ވަރޖިލް ވެން ޑައިކްއަށް ލިބިއްޖެއެވެ.

މިދިޔަ އަހަރުގެ ޖެނުއަރީ މަހުގެ ތެރޭގައި ލިވަރޕޫލާ 97 މިލިއަން ޑޮލަރުގެ ފީއަކަށް ގުޅުނު ވެން ޑައިކަކީ މި ސީޒަނުގައި ލިވަރޕޫލުން ދައްކަމުން އަންނަ މޮޅު ކުޅުމުގައި އެންމެ އިސް ރޯލެއް އަދާކުރަމުން އަންނަ އެކަކެވެ. މިދިޔަ އަހަރުގެ އެވޯޑު ވެސް ލިބުނީ ލިވަރޕޫލްގެ ކުޅުންތެރިޔެއް ކަމުގައިވާ މިސްރުގެ މުހައްމަދު ސަލާހަށެވެ.

އިނގިރޭސި ޕްރިމިއަރ ލީގާއި އެހެނިހެން ލީގުތަކަށް ކުޅޭ 92 ކްލަބުގެ ކުޅުންތެރިން މި އެވޯޑަށް ވޯޓުލާފައިވެއެވެ. އެވޯޑު ލިބުމަށް ފަހު ދިން އިންޓަވިއުއެއްގައި ވެން ޑައިކް ބުނީ އެވޯޑު ލިބުމުން ވަރަށް އުފާކުރާ ކަމަށެވެ. އަދި ފުޓުބޯޅަ ކުޅޭ ކުޅުންތެރިން ވޯޓުލައިގެން ލިބޭ އެވޯޑަކަށް ވުމާ އެކު އިތުރަށް އުފާފާޅު ކުރާ ކަމަށް ވެސް ވެން ޑައިކް ބުންޏެވެ.

ވެން ޑައިކަކީ މި އެވޯޑުގެ 27 އަހަރުގެ މާޒީގައި އެވޯޑު ކާމިޔާބު ކުރި ތިން ވަނަ ޑިފެންޑަރެވެ. މީގެ ކުރިން މި އެވޯޑު ހާސިލްކޮށްފައިވާ ކުޅުންތެރިންނަކީ ޗެލްސީއަށް ކުޅުނު ޖޯން ޓެރީއާ މެންޗެސްޓަރ ޔުނައިޓަޑާއި އެސްޓަން ވިލާއަށް ކުޅުނު ޕޯލް މެގްރާތެވެ.

މި އަހަރުގެ ޕީއެފްއޭ އެވޯޑްސްގައި ދިން އެހެން އެވޯޑްތަކަށް ބަލާއިރު، އަހަރުގެ އެންމެ މޮޅު ޒުވާން ކުޅުންތެރިއަކަށް ހޮވުނީ މެންޗެސްޓަރ ސިޓީގެ ހުނަރުވެރި ފޯވާޑް ރަހީމް ސްޓަރލިންއަށެވެ.

މީގެ އިތުރުން މި އަހަރުގެ ޕްރިމިއަރ ލީގުގެ އެންމެ މޮޅު ކުޅުންތެރިންގެ ޓީމަށް ބަލާއިރު އެ ޓީމުގައި އެންމެ ގިނަ އަދަދަކަށް ހިމެނިފައިވަނީ މެންޗެސްޓަރ ސިޓީއަށް ކުޅެމުން އަންނަ ކުޅުންތެރިންނެވެ. އެ ޓީމަށް ކުޅެމުން އަންނަ ހަ ކުޅުންތެރިޔަކު އަހަރުގެ ޓީމުގައި ހިމަނާފައިވާ އިރު، ދެން އެންމެ ގިނަ ކުޅުންތެރިން ނިސްބަތްވާ ލިވަރޕޫލުން ހިމެނުނީ ހަތަރު ކުޅުންތެރިންނެވެ. ދެން އެ ޓީމުގައި ހިމެނުނީ މެންޗެސްޓަރ ޔުނައިޓެޑަށް ކުޅެމުން އަންނަ ޕޮގްބާ އެކަންޏެވެ.

ޕްރިމިއަރ ލީގުގެ އަހަރުގެ ޓީމަކީ: އެޑަރސަން މޯރާއޭސް (މެންޗެސްޓަރ ސިޓީ)، އެންޑީ ރޮބަޓްސަން (ލިވަރޕޫލް)، އެމެރިކް ލަޕޯޓޭ (މެންޗެސްޓަރ ސިޓީ)، ވާރޖިލް ވެން ޑައިކް (ލިވަރޕޫލް)، ޓްރެންޓް އެލެކްޒެންޑަރ-އަރނޯލްޑް (ލިވަރޕޫލް)، ޕޯލް ޕޮގްބާ (މެންޗެސްޓަރ ޔުނައިޓެޑް) ފަރނާންޑީނިއޯ (މެންޗެސްޓަރ ސިޓީ)، ބަނާޑޯ ސިލްވާ (މެންޗެސްޓަރ ސިޓީ)، ސަދިއޯ މާނޭ (ލިވަރޕޫލް)، ސާޖިއޯ އަގުއޭރޯ (މެންޗެސްޓަރ ސިޓީ)، އަދި ރަހީމް ސްޓަރލިން (މެންޗެސްޓަރ ސިޓީ)، އެވެ.

ފާހަގަކޮށްލެވޭ ގޮތުގައި މި އަހަރުގެ ޕްރިމިއަރ ލީގުގެ އެންމެ މޮޅު ކުޅުންތެރިންގެ ޓީމުގައި މިދިޔަ އަހަރުގެ މޮޅު ކުޅުންތެރިޔާ މުހައްމަދު ސަލާހު ނުހިމެނެއެވެ.