ކައުންސިލް އިންތިހާބު ވޯޓާސް ލިސްޓަށް 300 އަށްވުރެ ގިނަ ޝަކުވާ ލިބިއްޖެ
1 ފެބުރުއަރީ 2020 | ހޮނިހިރު 13:25ޖުމްލަ 373 ޝަކުވާ ލިބިފައިވޭ
އިލެކްޝަން ކޮމިޝަންގެ މެމްބަރުން
ލޯކަލް ކައުންސިލް އިންތިހާބްގެ ވޯޓާސް ލިސްޓާ ގުޅޭގޮތުން 300 އަށްވުރެ ގިނަ ޝަކުވާ ހުށަހަޅައިފިއެވެ.
އިލެކްޝަން ކޮމިޝަން (އީސީ) އިން ބުނީ ވޯޓާސް ލިސްޓަށް ޝަކުވާ ހުށަހެޅުމުގެ މުއްދަތު ހަވަމަވިއިރު ޖުމްލަ 373 ޝަކުވާ ހުށަހަޅާފައިވާ ކަމަށެވެ. ކައުންސިލް އިންތިހާބުގެ ވޯޓާސް ލިސްޓަށް ޝަކުވާ ހުށަހެޅުމުގެ މުއްދަތު ހަމަވީ ޖެނުއަރީ 31 ވަނަ ދުވަހުގެ ނިޔަލަށެވެ.
އިލެކްޝަންސް ކޮމިޝަންގެ ނައިބު ރައީސް އަޙްމަދު އަކްރަމް ރާއްޖެއެމްވީއަށް ވިދާޅުވީ މިޝަކުވާތައް އިސްލާހުކުރުމަށްފަހު، ކުރިއަށް އޮތް ފަސް ދުވަހުގެ ތެރޭގައި ވޯޓާސް ލިސްޓު އަލުން އާންމުކުރާނެ ކަމަށެވެ. އަދި އަކްރަމް ވިދާޅުވީ މިޝަކުވާ ހުށަހެޅި ފަރާތްތަކަށް އެހުށަހެޅި ޝަކުވާ އިސްލާހުކޮށްފައިވޭތޯ ނުވަތަ ނުވޭތޯ ބެލުމަށްފަހު، ޝަކުވާ އިސްލާހުނުވާނަމަ އެފަރާތްތަކަށް ޝަކުވާ ހުށަހެޅުމުގެ ފުރުސަތު ލިބޭނެ ކަމަށެވެ.
މީގެ އިތުރުން އަކްރަމް ވިދާޅުވީ އަލުން ވޯޓާސް ލިސްޓަށް ޝަކުވާ ހުށަހެޅުމުގެ ފުރުސަތު އާންމުންނަށް ހުޅުވާނުލާނެ ކަމަށާއި، ޝަކުވާ ހުށަހެޅުމަށް އެކަށީގެންވާ މުއްދަތެއް ދެވިފައިވާ ގަބޫލުކުރާ ކަމަށެވެ. ވޯޓާޒް ލިސްޓުގައި ބުނާގޮތުން ކުރިއަށް އޮތް ލޯކަލް ކައުންސިލު އިންތިހާބުގައި 269،562 މީހުންނަށް ވޯޓުލުމުގެ ހައްގު ލިބެއެވެ.
މިފަހަރު ބާއްވާ ކައުންސިލް އިންތިޚާބަކީ ލާމަރުކަޒީ ޤާނޫނަށް މިފަހުން ގެނެވުނު ބޮޑެތި ބަދަލުތަކާއެކު ބާއްވާ ފުރަތަމަ އިންތިޚާބެވެ.
އެގޮތުން ކައުންސިލްތަކުގެ 33 އިންސައްތަ އަންހެނުންނަށް ހާއްސަކޮށްފައިވާއިރު، އާބާދީ 3،000 އަށް ވުރެ މަތީގެ ރަށްތަކަށް ހަތް ކައުންސިލަރުން ހޮވަން ޖެހެއެވެ. އިންތިޚާބުގައި 980 ކައުންސިލަރުން އިންތިޚާބުކުރާނެ އެވެ.
