ސްޕެނިޝް ކޮޕަ ޑެލްރޭގައި ރެއާލް ޒަރަގޯޒާ އަދި ރެއާލް މެޑްރިޑް ބައްދަލުކުރި މެޗު ފަސޭހަކަމާއިއެކު ރެއާލް މެޑްރިޑުން ކާމިޔާބުކޮށް ކުއާޓާ ފައިނަލަށް ދަތުރުކޮށްފިއެވެ.

ރެއާލް ޒަރަގޯޒާ ދަނޑުގައި ކުޅުނު މި މެޗު ރެއާލް މެޑްރިޑުން ކާމިޔާބުކުރީ 4-0 ގެ ނަތީޖާއަކުންނެވެ.

މެޗުގެ ވަރަށް ކުރީކޮޅު ރެއާލުން ވަނީ ލަނޑު ޖަހާ ލީޑު ނަގައިފައެވެ. މި ލަނޑު މެޗުގެ 6 ވަނަ މިނެޓުގައި އެޓީމަށް ކާމިޔާބުކޮށްދިނީ ޑިފެންޑަރ ރަފޭލް ވަރާންއެވެ. މި ލަނޑު އޭނާ ކަމިޔާބުކުރީ މިޑްފިލްޑަރ ޓޯނީ ކްރޫޒްގެ އެހީތެރިކަމާއިއެކުގައެވެ. މި ލަނޑަށްފަހު ވެސް ރެއާލުން ވަނީ ފުލުފުލުގައި ޒަރަގޯޒާގެ ގޯލަށް ނުރައްކާ ކޮށްފައެވެ. އެގޮތުން މެޗުގެ 32 ވަނަ މިނެޓުގައި ރެއާލުން ވަނީ އިތުރު ލަނޑެއް ޖަހާ ލީޑު ފުޅާ ކޮށްފައެވެ. މި ލަނޑު އެޓީމަށް ކާމިޔާބުކޮށްދިނީ ލޫކަސް ވަޒްކުއޭޒް އެވެ. މި ލަނޑު އޭނާ ކާމިޔާބު ކުރީ ޓޮނީ ކްރޫޒްއެވެ. މި ހާފުގައި ޒަރަގޯޒާ އަށް ލަނޑު ޖަހަން އެންމެ ހުސް ފުރުސަތެއް ލިބިގެންދިޔައީ ޒަރަގޯޒާގެ ފޯވާޑް ޖޭމްސްއަށެވެ. ނަމަވެސް އޭނާ ފޮނުވާލި ބޯޅަ ގޯލާ އަމާޒުނުވެ ދިޔައީ ބޭރަށެވެ.

މެޗުގެ ފުރަތަމަ ހާފު ނިމިގެންދިޔައީ 2-0 ގެ ނަތީޖާއަކުން ރެއާލް ކުރީގައި އޮވެގެންނެވެ.

ދެވަނަ ހާފު ފަށައިގެން ރެއާލުގެ ފަރާތުން މޮޅު އެޓޭކިންގ ގޭމެއް ފެނިގެންދިޔައިރު، މެޗުގެ 72 ވަނަ މިނެޓުގައި ރެއާލުން ވަނީ ލަނޑު ޖަހައިފައެވެ. މި ލަނޑު އެޓީމަށް ކާމިޔާބުކޮށްދިނީ ވިނީސަސް ޖޫނިއާރ އެވެ. މި ލަނޑު އޭނާ ކާމިޔާބު ކުރީ ހަމޭސް ރޮޑްރިގޭޒްގެ އެހީތެރިކަމާއިއެކުގައެވެ. މެޗުގައި ރެއާލުންޖެހި ފަހު ލަނޑު މެޗުގެ 79 ވަނަ މިނެޓުގައި އެޓީމަށް ކާމިޔާބުކޮށްދިނީ އިތުބާރު ފޯވާޑް ކަރިމް ބެންޒެމާ އެވެ.

ރެއާލް މެޑްރިޑުން ހޮނިހިރު ދުވަހު ސްޕެނިޝް ލީގުގައި ކުޅެންޖެހޭނީ ވާދަވެރި އެތްލެޓިކޯ މެޑްރިޑާއެވެ. ކޯޗު ޒިދާން ބުނީ މި މޮޅާއިއެކު ރެއާލުން އެތްލެޓިކޯ އާއި ދެކޮޅަށް ނުކުންނާނީ އިތުބާރާއިއެކުގައި ކަމަށެވެ.