ކޮރޯނާވައިރަސްއަށް ދައުލަތުގެ ކަމާގުޅުންހުރި ހުރިހައި އިދާރާތައް ތައްޔާރު: އެޗްޕީއޭ

ހަލުވިކަމާއެކު ފެތުރެމުން އަންނަ ކޮރޯނާވައިރަސް އާއި ގުޅިގެން ރާއްޖޭގެ ކަމާބެހޭ އިދާރާތަށް އޮތީ ފުރިހަމައަށް ތައްޔާރުވެފައި ކަމަށާއި، މުއައްސަސާތަކުން ކުރަންޖެހޭ ކަންކަން ހަރުދަނާކުރެވިފައިވާ ކަމަށް ހެލްތު ޕްރޮޓެކްޝަން އެޖެންސީން ބުނެފިއެވެ.

ކޮރޯނާވައިރަސްއާއި ގުޅިގެން ރާއްޖޭގެ ކަމާބެހޭ އިދާރާތަކާއެކު ބޭއްވި އެކްސަސައިޒަށް ފަހު "ރާއްޖެ އެމްވީ" އަށް މަޢުލޫމާތު ދެއްވަމުން ހެލްތު ޕްރޮޓެކްޝަން އެޖެންސީގެ ޑެޕިއުޓީ ޑިރެކްޓަރ ޖެނެރަލް، އިބްރާހިމް ނިޝާން އަޙްމަދު ވިދާޅުވީ މި އެކްސައިސަޒަކީ ކޮރޯނާވައިރަސްއާއި ގުޅިގެން ކަމާ ގުޅުންހުރި އެޖެންސީތަކާ އެއްކޮށް ހެދިފައި ހުރި އޮޕަރޭޓިން ޕްރޮސީޖަރ ޕްލޭން (އެސްއޯޕީ) އާއި ގުޅޭގޮތުން މަޝްވަރާކުރުމަށް ބޭއްވި ބައްދަލުވުމެއް ކަމަށެވެ.

އަދި މި އެކްސަސައިޒުގައި ކޮރޯނާވައިރަސްއަށް ޝައްކުކުރާ ހިސާބުން، އެމީހަކު ގެންގޮސް ފަރުވާދިނުމާއި، އައިސޮލޭޝަންއާއި، އެއަރޕޯޓުގައި ކުރިއަށް ގެންދާނެ ޕްރޮސީޖާތައް ކަމާއި ގުޅުން ހުރި ފަރާތްތަކައް އިނގޭވަރު ދެެނެގަނެ، އަދި މިކަކަންކަން ކުރިޔަށްގެންދިއުމަށް ހުރި ހުރަސްތަކާއި ބެހޭގޮތުން މަޝްވަރާ ކުރެވިފައިވާ ކަމަށެވެ.

ނިޝާން ވިދާޅުވީ ވޭތުވެދިޔަ ދުވަސްތަކުގައި އިދާރާތަކާއި ވަރަށް ގާތުން މަސައްކަތް ކުރެވިފައިވާ ކަމަށާއި، އެއަރޕޯޓް، އިމިގްރޭޝަން ކަސްޓަމްސް، އަދި އޭވިއޭޝަން ކޮމާންޑުން ވެސް އެބައެއްގެ ދައުރާއިބެހޭގޮތުން ވޭތުވެދިޔަ 2 ހަފުތާ ތެރޭގައި މަޝްވަރާތަކެއް ކުރެވިފައިވާ ކަމަށެވެ. އަދި ގިނަ އެސްއޯޕީތައް ހެދިފައިވާ އިރު، އެ މުއައްސަސާތަކުގެ މުވައްޒަފުން ވެސް ހޭލުންތެރިކުރުމުގެ ޕްރޮގުރާމުތައް މުއައްސަސާތަކުން ކުރިއަށްގެންދާ ކަމަށް އޭނާ ވިދާޅުވިއެވެ.