ސަރުކާރުން ބޭނުންވާ ސްޕީޑްގައި ކަންކަން ނުހިންގެނީ އެމްޑީޕީ ތެރޭގައި ބައިބައިވުމުގެ ސަބަބުން: ޤާސިމް

ރައީސުލްޖުމްހޫރިއްޔާ ބޭނުންފުޅުވާ ސްޕީޑްގައި ރައްޔިތުންނަށް ޚިދުމަތްކޮށް ނުދެވިގެން އުޅެނީ އެމްޑީޕީގެ ތެރޭގައި އޮތް ބައިބައި ވުމުގެ ސަބަބުންކަމަށް ޖުމްހޫރީ ޕާޓީގެ ލީޑަރ ގާސިމް އިބްރާހީމް ވިދާޅުވެއްޖެ އެވެ.

ޖުމްހޫރީ ޕާޓީއަށް މެމްބަރުން ސޮއިކުރުމާއި އެޕާޓީގެ ނަމުގައި ޕްރައިމަރީގައި ބައިވެރިވާ ކެންޑިޑޭޓުންގެ ފޯމު ހަވާލުކުރުމަށް ބޭއްވި ރަސްމިއްޔާތުގައި ވާހަކަ ދައްކަވަމުން ގާސިމް ވިދާޅުވީ ރައީސުލްޖުމްހޫރިއްޔާ އިޚްލާސްތެރިކަމާއެކު މަޑުމައިތިރިކަމާއެކީގައި ޕާޓީގެ ތެރޭގައި ބޮޑެތި ހަމަނުޖެހުން ހިނގާއިރު ވެސް ސާބިތުކަމާއެކީގައި ކެތްތެރިކަމާއެކީގައި ކުރިޔަށް ގެންދަވާތީ އެކަމާ އުފާކުރައްވާ ކަމަށެވެ.

ޤާސިމް މިމޭރުމުން ވާހަކަ ދައްކަވާފައި މިވަނީ ކޯލިޝަންގެ ސަބަބުން ސަރުކާރު ހިންގުމުގެ ސްޕީޑް ލަސްވަމުންދާތީ ކަމަށް އެމްޑީޕީގެ ރައީސް، ރައީސް މުހައްމަދު ނަޝީދު ވާހަކަދައްކަވާފައި ވަނިކޮށެވެ.

ޤާސިމް ވިދާޅުވީ ރައީސް ވެވަޑައިގެންފައިވާ ވައުދުތަކާއި ޚިލާފުވެވަޑައި ނުގަންނަވާނެކަމަށް ޔަޤީން ކުރައްވާކަމަށެވެ. އަދި މީގެކުރިން ޕާޓީން ބޭއްވި ޖަލްސާއެއްގައި އެއަރޕޯޓްގެ މުވައްޒަފުންތަކެއް ކަނޑާލައިގެން އެކަމާ ވާހަކަދެއްކުނީ އެކަމުގެ ހަގީގަތް ބަލައިނުލާ ކަމަށާއި އެހެންކަމުން އެކަމާއި ރައީސްގެ އަރިހުން މަޢާފަށް އެދިވަޑައިގަންނަވާ ކަމަށެވެ.