ހުޅުމާލެއިން މާލެއަށް ދަތުރުކުރި ޓެކްސީއަކުން ބަނގުރާ ފުޅިތަކެއް އަތުލައިގަނެފި
27 ޖެނުއަރީ 2020 | ހޯމަ 16:14ޓެކްސީގެ ޑިކީގައި ހުރި ދަބަސް ތަކެއް ބަލާފާސްކުރިއިރު 20 ފުޅި ބަނގުރާ ފެނިފައިވޭ
ޓެކްސީ ތެރެއިން ފެނުނު ބަނގުރާ ފުޅިތައް
ހުޅުމާލެއިން މާލެއަށް ދަތުރުކުރަމުން ދިޔަ ޓެކްސީ އެއްގެ ތެރެއިން ބަނގުރާ ފުޅިތަކެއް އަތުލައިގަނެފިއެވެ.
ފުލުހުން ބުނީ އެކަމުގެ މަޢުލޫމާތު ފުލުހުންނަށް ލިބިފައިވަނީ ހޯމަ ދުވަހުގެ ހަވީރު 17:14 ހާއިރު ކަމަށެވެ. އަދި މިމަޢުލޫމާތު ލިބުމާއެކު ފުލުހުން އެޞަރަޙައްދަށް ގޮސް، އެ ޓެކްސީ ހުއްޓުވާ، ޓެކްސީގެ ޑިކީގައި ހުރި ދަބަސް ތަކެއް ބަލާފާސްކުރިއިރު، 20 ފުޅި ބަނގުރާ ފެނިފައިވާކަމަށެވެ. މިޓެކްސީ ދުއްވަން އިނީ ދިވެހި ފިރިހެނެއް ކަމަށާއި ޓެކްސީން ދަތުރުކުރަމުން ދިޔައީ ބިދޭސީ ދެ ފިރިހެނުންކަމަށް ފުލުހުން ވަނީ ބުނެފައެވެ. އަދި ޓެކްސީ އަށް އެރި ދެ މީހުންގެ އަތުން ބަނގުރާ ފުޅިތައް ފެނިފައިވާކަމަށް ފުލުހުން ބުނެއެވެ.
މިޓެކްސީގައި ތިބި ދެ ބިދޭސީންނަކީ 23 އަހަރާއި 24 އަހަރުގެ ބަންގްލަދޭޝް ބައެކެވެ. މިމީހުން މިހާރު ފުލުހުންގެ ބެލުމުގެ ދަށަށް ގެނެސްފައިވާކަމަށް ފުލުހުން ބުނެއެވެ.
އަދި މިމައްސަލަ އިތުރަށް ތަހްޤީޤުކުރަމުންދާ ކަމަށް ފުލުހުން ބުނެއެވެ.
