އިންޑިޔާގެ ޖުމްހޫރީ ދުވަހާއި ދިމާކޮށް އެމެރިކާގައި ދިރިއުޅޭ އިންޑިޔާ ރައްޔިތުން އެމެރިކާގެ އެކި ސިޓީތަކުގައި އިންޑިޔާގެ ޤާނޫނު ހަދާ މަޖިލީހުން ފާސްކޮށްފައިވާ ސިޓިޒެންޝިޕް ޤާނޫނާ ދެކޮޅަށް މުޒާހަރާކޮށްފި އެވެ.

އިންޑިޔާގެ ބޮޑުވަޒީރު ނަރެންދްރަ މޯދީ ގެންގުޅުއްވާ ސިޔާސަތުތަކާއި ދެކޮޅަށް އެތައް ބަޔަކު ވަނީ އެމެރިކާގައި ނުުރުހުން ފާޅުކޮށް އަޑު އުފުލާފައެވެ. ނިއުޔޯކްގައި ހުންނަ އެމެރިކާގެ އެމްބަސީ ކުރި މަތީގައި މިމީހުން މުޒާހަރާކޮށްފައިވާއިރު މުޒާހަރާތަކުގައި އިސްކޮށް ހުރީ މުހައްމަދު މުސްތަޤީމެވެ. އޭނާގެ އަށް އަހަރުގެ ދަރިފުޅާއެކު އެތައް ހާސްބަޔަކާއެކު ނިކުމު މި ޤާނޫނާއި ދެކޮޅަށް އަޑުއުފުލާފައިވާއިރު މި ޤާނޫނާއި ދެކޮޅަށް އެތައް މުޒާހަރާތަކެއް އިންޑިޔާގައި އަންނަނީ ކުރަމުންނެވެ.

މުސްތަޤީމް ބުނީ މިދިޔަ މަހު ނިއު ދިއްލީގައި ހުންނަ ޖާމިއާ އިސްލާމިކް ޔުނިވަރސިޓީއަށް ފުލުހުން ވަދެ އެތާތެރޭ ތިބި ކިޔަވާ ކުދިންތަކަކަށް އަނިކުރި ހާދިސާގައި އޭނާގެ ކޮއްކޮ މުހައްމަދު އިރްފާނަށްވެސް އަނިޔާވެފައިވާކަމަށެވެ. މި ޤާނޫނު އައުމާއެކު އައްސާމް ސްޓޭޓުގެ 2 މިލިއަން މީހުން އަތުން އިންޑިޔާގެ ރަށްވެހިކަން ގެއްލިގެންދާނެ ކަމުގެ ބިރު ވަނީ ހީވަފައެވެ. މުޒާހަރާތައް އެންމެ ބޮޑަށް ފުރަތަމަ ކޮށްފައިވަނީވެސް އައްސާމްގައެވެ.

ނިއުދިއްލީގައި ހުންނަ ޖާމިއާ އިސްލާމިކް ޔުނިވަރސިޓީއަށް ފުލުހުން ވަދެފައިވަނީ ކިޔަވާކުދިން އެ ޤާނޫނާއި ދެކޮޅަށް އަޑުއުފުލަމުން ގެންދިޔުމުންނެވެ. މުސްތަޤީމް ބުނީ ފުލުހުން އެޔުނިވަރސިޓީއަށް ވަދެ އެތާނގައި ތިބި ކުދިންނަށް އަނިޔާކުރުމުގެ ތެރޭގައި އޭނާގެ ކޮއްކޮގެ ވާތު ފަޔާއި ކަނާތު އަތުގައި ރެނދުލާފައިވާކަމަށެވެ. މުސްތަޤީމް ބުނީ އޭނާ ޤަބޫލުކުރާ ގޮތުގައި އިންޑިޔާގެ ސިޓިޒެންޝިޕް ޤާނޫނަކީ އިންޑިޔާގެ ބޮޑުވަޒީރު މޯދީ މުސްލިމުންނާ ދެކޮޅަށް ހަނގުރާމައެއް ފެއްޓެވުމަށް ކުރެއްވިކަމެއް ކަމަށެވެ.

ނިއުޔޯކުގައި ކުރިޔަށް ގެންދިޔަ މުޒާހަރާ އަކީ އިންޑިޔާގައި ކުރިޔަށްގެންދިޔަ މުޒާހަރާތަކުގެ ބައެއްގެ ގޮތުގައި ކުރިޔަށްގެންދިޔަ މުޒާހަރާއެކެވެ. މިމުޒާހަރާގެ ތެރޭގައި އިންޑިޔާގެ ސިޓިޒެންޝިޕް ޤާނޫނަށް މިގެނެވުނު އިޞްލާޙަށް ޢަމަލުނުކުރުމަށް ގޮވާލާފަ އެވެ.