މަޝްހޫރު ބާސްކެޓް ކުޅުންތެރިޔާ ކޯބީ ބްރަޔަންޓް މަރުވެއްޖެ

އެމެރިކާގެ ކުރީގެ މަޝްހޫރު ބާސްކެޓް ބޯޅަ ކުޅުންތެރިޔާ ކޯބީ ބްރަޔަންޓް މަރުވެއްޖެއެވެ.

މީޑިއާ ރިޕޯޓްތައް ބުނާ ގޮތުން އޭނާ މަރުވީ ދަތުރުކުރަމުންދިޔަ ޕްރައިވެޓް ހެލިކޮޕްޓަރު ވެއްޓި ހިނގި އެކްސިޑެންޓްގައެވެ. މި ހާދިސާގައި ބްރަޔަންޓް އިތުރުން އޭނާއާއި އެކު ހެލިކޮޕްޓަރުން ދަތުރުކުރި ނުވަ މީހުން ވެސް ވަނީ މަރުވެފައެވެ. މަރުވި މީހުންގެ ތެރޭގައި ބްރަޔަންޓްގެ އަންހެން ދަރިފުޅުވެސް ހިމެނެއެވެ.

މީޑިއާ ރިޕޯޓްތައް ބުނާ ގޮތުން ބްރަޔަންޓް ދަތުރުކުރަމުން ދިޔައީ އޭނާ ދިރިއުޅޭ އޮރޭންޖް ކައުންޓީންގައި އޭނާ ހިންގާ ޔޫތު ބާސްކެޓްބޯޅަ އެކަޑަމީ އަށެވެ. އޭނާގެ ބޭނުމަކީ އެތަނުގައި ކުރިޔަށްދާ މުބާރާތުގައި ދަރިފުޅު ކުޅެމުންދާ ޓީމަށް ކޯޗުކަން ކޮށްދިނުމެވެ.

ބްރަޔަންޓް މަޝްހޫރު ވެގެންދިޔައީ ލޮސް އެންޖަލަސް ލޭކަރސް އަށް ކުޅުނު ދުވަސްވަރުގައެވެ. ބާސްކެޓް ބޯޅަ ކުޅުމުން ރިޓަޔަރ ވުމުގެ ކުރިން އޭނާވަނީ އެންބީއޭގެ 18 އޯލް ސްޓާރ ގޭމް ކުޅެފައެވެ. މީގެއިތުރުން އެންބީއޭ ޗެމްޕިއަންޝިޕް ފަސް ފަހަރު އޭނާވަނީ ކާމިޔާބުކޮށްފައެވެ. ބާސްކެޓްކުޅުން އޭނާ ހުއްޓައިލައިފައިވަނީ 2016 ވަނަ އަހަރުގައެވެ.

ބްރަޔަންޓްގެ ސީނިއަރ ކެރިޔަރ ފަށައިފައިވަނީ 1996 ވަނަ އަހަރުއެވެ. އޭނާގެ މުޅި ކެރިޔަރގައި ކުޅެފައިވަނީ އެންމެ ކްލަބަކަށެވެ.

ބްރަޔަންޓް މަރާއި ގުޅިގެން އެންބީއޭގެ ކޮމިޝަނާ އެޑަމް ސިލްވާ ވިދާޅުވީ ގެއްލިގެން މިދިޔައީ އެންބީއޭގެ ތާރީހުދުއް އެންމެ މޮޅު ބާސްކެޓް ކުޅުންތެރިންގެ ތެރޭގައި ހިމެނިފައިވާ ލެޖެންޑެއް ކަމަށާއި އަދި މި ފަހުގެ ތާރީހުގައި އޭނާ ހަދައިފައިވާ ރެކޯޑްތައް އެހެން ކުޅުންތެރިންނަށް މުގުރާލުމަށް އުނދަގޫ ވާނެ ކަމަށްވެސް ބުންޏެވެ. މީގެ އިތުރުން މަޝްހޫރު ގިނަ ކުޅުންތެރިން އަންނަނީ އޭނާގެ އާއިލާއަށް ތައުޒިޔާގެ މެސެޖްތައް ފޮނުވަމުންނެވެ. އޭގެ ތެރޭގައި ދުނިޔޭގައި އުފެދުނު އެންމެ މޮޅު ފުޓުބޯޅަ ކުޅުންތެރިންގެ ތެރޭގައި ހިމެނޭ ކްރިސްޓިއާނޯ ރޮނާލްޑޯ އާއި ލިއޮނަލް މެސީ ހިމެނެއެވެ. މީގެ އިތުރުން އެންބީއޭއާއި ދުނިޔޭގެ ބާސްކެޓް ކޮމިއުނިޓީއިން އަންނީ އޭނާގެ މަރުގެ ހިތާމައިގައި ބައިވެރިވަމުންނެވެ.