ޗައިނާއިން ތުރުކީއަށް އަންނަ ފުލައިޓްތަކުގެ ފަސިންޖަރުން ސްކްރީންކުރަން ފަށަނީ

ޗައިނާގައި ފެތުރެމުންދާ ކްރޯނާ ވައިރަސްއާއި ގުޅިގެން، ތުރުކީއަށް އެގައުމުން އަންނަ ފުލައިޓްތަކުގެ ފަސިންޖަރުން ސްކްރީން ކުރަން ނިންމާފައިވާ ކަމަށް އެގައުމުން ހާމަކޮށްފިއެވެ.

ތުރުކީން ބުނީ ޗައިނާއިން އަންނަ ފުލައިޓްތަކުން ދަތުރުކުރާ ހުރިހާ ފަސިންޖަރުން ތަރމަލް ކެމެރާ ބޭނުންކޮށްގެން ސްކްރީން ކުރަމުންދާނެ ކަމަށެވެ. އަދި މިއީ ސަލާމަތާ ރައްކާތެރިކަމުގެ ގޮތުން ކުރަމުންދާ ކަމެއް ކަމަށް އެގައުމުން ވަނީ ބުނެފައެވެ.

ބައިނަލްއަގުވާމީ މީޑިއާތަކުން ރިޕޯޓްކޮށްފައިވާ ގޮތުން މިހާތަނަށް ޗައިނާއިން 850 މީހުންނަށް ކްރޯނާ ވައިރަސް ޖެހިފައިވެއެވެ. އަދި މިހާތަނަށް 26 މީހުން މި ބަލީގައި މަރުވެފައިވާ ކަމަށް ވެސް ޗައިނާއިން ވަނީ ހާމަކޮށްފައެވެ. މީގެ ތެރޭގައި ޗައިނާގައި މި ބަލި ފުރަތަމަ ފެނުނު ހޫބޭ ޕްރޮވިންސް އިން 12 މީހަކު މަރުވެފައިވާ އިރު އެހެނިހެން ސިޓީތަކުން 13 މީހަކު ވަނީ މަރުވެފައެވެ.

ޗައިނާގައި ކްރޯނާ ވައިރަސްގެ ނުރައްކާ ބޮޑުވެފައިވާ ހިސާބުތަކުގައ 40 މިލިއަނަށް ވުރެ ގިނަ މީހުން ދަނީ ދިރިއުޅެމުންނެވެ. އަދި މި ސަރަހައްދުތަކުގެ އާންމު ދަތުރުފަތުރު ހުއްޓުމަކަށް ގެނެސްފައިވާ އިރު، ޗައިނާގެ އައު އަހަރު ފާހަގަކުރުމަށް އެކި ތަންތަނަށް ދަތުރުކުރުމަށް ހަމަޖެހިފައިވާ ފަރާތްތަކުގެ ދަތުރުތަކަށް ވެސް ވަނީ ބުރޫ އަރާފައެވެ.

ޗައިނާގެ ނެޝަނަލް ހެލްތު ކޮމިޝަނުން ބުނީ ކްރޯނާ ވައިރަސް ޖެހިފައިވާ މީހުން އެ ގައުމުގެ 13 ޕްރޮވިންސަކުން މިހާރު ފެނިފައިވާ ކަމަށެވެ. ބަލި ކޮންޓްރޯލް ކުރުމަށް ޗައިނާއިން ގެންދަނީ ވަރުގަދަ ފިޔަވަޅުތަކެއް އަޅަމުންނެވެ.

މިހާތަނަށް ކްރޯނާ ވައިރަސް ބަލި ފެނިފައިވާ ގައުމުތަކުގެ ތެރޭގައި ޖަޕާން، ތައިލެންޑް، ސައުތު ކޮރެއާ، އެމެރިކާ، ފްރާންސް އަދި ނޭޕާލް ހިމެނެއެވެ.