އެކަން ދިވެހި މުޖުތަމައުގައި ތަކުރާރުވިޔަ ނުދިނުމަށްޓަކައި އެންމެންވެސް މަސައްކަތް ކުރަންޖެހޭ
ކުޑަކުދިންނަށް އަނިޔާދިނުން ހުއްޓާލައި ކުރިއަށްގެންދިޔަ އެއްވުމެއްގެ ތެރެއިން
ކުޑަކުދިންނަށް ޖިންސީ ގޯނާ ކުރާ މީހުން މުޖުތަމައުގައި އުޅުމަކީ މުޅި އިންސާނިއްޔަތަށްވެސް ކުރިމަތިވެފައިވާ ކާރިޘާއެއްކަމަށް މިއަދުގެ ހުކުރު ޚުތުބާގައި ބުނެފިއެވެ.
"ކުޑަކުދިންނަށް ޖިސްމާނީ އަނިޔާ ދިނުމާއި، ޖިންސީ ގޯނާ ކުރުމުގެ ނުބައިކަން" މި މައުޟޫގެ މައްޗަށް ބިނާކޮށްފައިވާ ޚުތުބާގައި ބުނީ، ކުޑަކުދިންނަށް ޖިންސީ ގޯނާ ކުރުމާއި، ޖިސްމާނީ އަނިޔާ ދިނުމަށް ޖެހިލުންނުވާ މީހުން އުޅުމަކީ މުޅި މުޖުތަމައަށްވެސް ކުރިމަތިވެފައިވާ ކާރިޘާއެއް ކަމަށާއި، އެކަން ދިވެހި މުޖުތަމައުގައި ތަކުރާރުވިޔަ ނުދިނުމަށްޓަކައި އެންމެންވެސް މަސައްކަތް ކުރަންޖެހޭ ކަމަށެވެ. އެގޮތުން ޒިންމާދާރު ހެޔޮލަފާ މުސްލިމެއްކަމުގައި ވުމާއި، މަރުވާނެ ކަން އަބަދުވެސް ހަނދާން ކުރުމަށް ޚުތުބާގައި ގޮވާލާފައިވެއެވެ.
ޚުތުބާގައި އިތުރަށް ބުނީ، މައުސޫމު ކުޑަކުދިންނާއި އެންމެ ގާތްކޮށް އުޅޭ މީހުންގެ ފަރާތުން އެކުދިންނަށް އަނިޔާ ލިބުމަކީ މުޅި އިންސާނިއްޔަތުވެސް ލަދުވެތިވާންޖެހޭ ފަދަ ކަމެއް ކަމަށެވެ. އަދި އެއީ ޤައުމަށް ބޮޑު މުސީބާތެއް ފާވެގެން ދިއުމުގެ އަލާމާތަކަށް ވެދާނެ ކަމެއް ކަމަށްވެސް ޚުތުބާގައި ބުނެފައިވެއެވެ.
ޚުތުބާގައި އިތުރަށް ބުނީ، ކުޑަކުދިންނަކީ ކޮންމެ ޤައުމެއްގެވެސް މުސްތަޤްބަލު ކަމަށާއި، ކުޑަކުދިންނާމެދު އިހުމާލުވުމަކީ މުޅި ޤައުމުގެ މުސްތަޤުބަލާމެދު އިހުމާލުވުން ކަމަށެވެ. ޚުތުބާގައި އެހެން ބުނެފައިވާއިރު، ދާދި ފަހުން ރާއްޖޭގެ ރަށެއްގައި ކުޑަ ކުއްޖަކަށް ޖިންސީ ގޯނާ ކުރުމުގެ މައްސަލަތަކެއް ފެންމަތިވެގެން ދިއުމާއެކު، އެފަދަ އެތައް މައްސަލަތަކެއް ދަނީ ދުލުފުލުން ފެންމަތިވަމުންނެވެ.
