ބޭރު ދެކުޅުންތެރިން ގެނެސް އޭއެފްސީ ކަޕަށް މާޒިޔާ ވަރުގަދަ ކޮށްފި

ބިދޭސީ އިތުރު ދެ ކުޅުންތެރިން ގެނެސް އޭއެފްސީ ކަޕަށް މާޒިޔާއިން އެޓީމުގެ ސްކޮޑް އިތުރަށް ވަރުގަދަ ކޮށްފިއެވެ.

މާޒިޔާއާއި އަލަށް ގުޅުނީ ބިދޭސީ ދެ ޑިފެންޑަރުންނެވެ. އެގޮތުން ސާބިއާގެ ފުރަތަމަ ޑިވިޝަނަށް ކުޅެފައިވާ ޕީޓަރ ޕްލެނިޗްގެ އިތުރުން މާޒިޔާއާއި ދެން ގުޅުނީ އަފްޣާނިސްތާނުގެ ގައުމީ ޓީމަށް ކުޅެމުން އަންނަ މުޙައްމަދު ޝާރިފެވެ.

ސާބިއާގެ ޕްލެނިޗް އެންމެ ފަހުން ކުޅުނީ ބަންގާޅުގެ ޗިޓަގޮންގ އަބަހާނީ އަށެވެ. އޭނާ އެ ޓީމާއެކު ހަދާފައިވާ ކޮންޓްރެކްޓް އާނުކުރީ ބޭނުންވާ ވަރުގެ ހުށަހެޅުމެއް ނުލިބުމުންނެވެ.

ސާބިއާގެ ޑިފެންޑަރ އެންމެ ފުރަތަމަ ފެނިގެންދިޔަ އޭޝިއާގެ ކްލަބަކީ ލެބަނަންގެ ނެޖްމާއެވެ. އެކްލަބާއެކު 2017 ވަނަ އަހަރުގެ އޭއެފްސީ ކަޕް އޭނާ ކުޅުނެވެ. އޭގެ ފަހުން އިންޑޮނޭޝިއާގެ ސުޕަރ ލީގުން އޭނާ ފެނިގެންދިޔައިރު އޭނާ ކުޅުނީ ޕީއެސްއައިއެސް ސެމަރަން އަށެވެ. މާޒިޔާއިން ބުނީ ޕްލެނިޗް އަކީ ޑިފެންސިވް ހުރިހާ މަގާމަކަށް ވެސް ކުޅެވޭނެ ކުޅުންތެރިއެއް ކަމަށާއި އޭނާ ގެނައީ އެޓީމުގެ ޑިފެންސް ވަރުގަދަ ކުރުމުގެ ބޭނުމުގައި ކަމަށެވެ.

އަފްޣާނިސްތާނު ގައުމީ ޓީމަށް ކުޅެމުން އަންނަ މުޙައްމަދު ޝާރިފަކީ ވެސް ޑިފެންޑަރެކެވެ. އޭނާ އަކީ އަފްޣާން ގައުމީ ޓީމުގެ ޑިފެންސްލައިނުގައި މުހިންމު ދައުރެއް އަދާކުރާ ކުޅުންތެރިއެކެވެ. އޭނާ ވަނީ މީގެ ކުރިން ރަޝިޔާގެ މަޝްހޫރު ކްލަބެއް ކަމަށްވާ އަންޒީ މަކައްކަލަ އަށް ކުޅެދީފައެވެ.

މާޒިޔާއިން އެޓީމުގެ ސްކޮޑް ވަރުގަދަ ކުރަނީ އޭއެފްސީ ކަޕުގެ ކޮލިފައިން އަށް އަމާޒުކޮށްގެންނެވެ. އެގޮތުން މި ދެ ކުޅުންތެރިންގެ ސޮޔާއެކު މި ޓްރާންސްފަރ މާކެޓްގައި އެޓީމާއި ގުޅުނު ކުޅުންތެރިންގެ އަދަދު މި ވަނީ ހަތަރަކަށް އަރައިފައެވެ.

މިދިޔަ ސީޒަންގެ ދިވެހި ލީގުގެ ރަނަރަޕް މާޒިޔާއިން މި މުބާރާތުގެ ޕްރިމިނަލަރީ ބުރުގައި ވާދަކުރަން ޖެހެނީ ބަންގާޅު ޕްރިމިއަރ ލީގުގެ ރަނަރަޕް އަބަހާނީ ލިމިޓެޑް ޑާކާއާއެވެ.

މި މެޗު ކުޅުމަށް ހަމަޖެހިފައިވަނީ އަންނަ އަހަރުގެ ފެބްރުއަރީ މަހު 5 އަދި 12 ވަނަ ދުވަހު އެވެ. ފެބްރުއަރީ ފަސްވަނަ ދުވަހު ޑާކާގައި ކުޅެން ޖެހޭއިރު ފެބްރުއަރީ 12 ވަނަ ދުވަހު މާޒިޔާއިން ނިކުންނާނީ އަމިއްލަ ގައުމުގައެވެ. މި ދެލެގުން މާޒިޔާ އަށް ކުރި ލިބިއްޖެނަމަ މަޒިޔާއަށް މުބާރާތުގެ ޕްލޭއޮފްގެ ޖާގަ އެއް ލިބޭނެއެވެ.

އޭއެފްސީ ކަޕްގައި ރާއްޖޭގެ ޓީމުތަކުން ބައިވެރި މިވަނީ އަހަރެއްގެ މެދު ކެނޑުމަކަށް ފަހުގައެވެ.

އޭއެފްސީ ކަޕްގެ ގްރޫޕު ސްޓޭޖް ފަހަނައަޅާ ރާއްޖޭގެ ޓީމަކަށް ދެވިފައިވަނީ އެންމެ ދެ ފަހަރެވެ. އެއީ 2005 ވަނަ އަހަރުގައްއާއި 2013 ވަނަ އަހަރެވެ. މި ދެ އަހަރު އޭއެފްސީ ކަޕުގެ ގްރޫޕު ސްޓޭޖް ފަހަނައަޅާ ގޮސްފައިވަނީ ނިއުރޭޑިއަންޑް ސްޕޯޓްސް ކުލަބެވެ. އަދި 2005 ވަނަ އަހަރު ނިއުރޭޑިއަންޓުން ވަނީ މި މުބާރާތުގެ ތިންވަނަ ހޯދާފައެވެ. މި އާއެކު ނިއުރޭޑިއަންޓް ވެގެން ގޮސްފައިވަނީ މި މުބާރާތުގެ އެންމެ ކާމިޔާބު ޓީމަށެވެ.