ޤައުމީ ކުތުބުޚާނާ ޑިޖިޓަލައިޒް ކުރުމުގެ މަސައްކަތް މި އަހަރު ތެރޭގައި ފެށޭނެ: މިނިސްޓަރ
ފާއިތުވި ދުވަސްތަކުގައި ގެނެވިފައިވާ ކުރިއެރުންތަކަށް އަލިއަޅުވާލެއްވި
މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މައުމޫން
ޤައުމީ ކުުތުބުޚާނާ ޑިޖިޓަލައިޒް ކުރުމަށްޓަކައި ކުރަންޖެހޭ މަސައްކަތްތައް ކުރަމުންދާ ކަމަށާއި، އެ މަސައްކަތް މި އަހަރުގެ ތެރޭގައި ފެށިގެންދާނެ ކަމަށް މިނިސްޓަރ އޮފް އަރޓްސް ކަލްޗަރ އެންޑް ހެރިޓޭޖް ޔުމްނާ މައުމޫން ވިދާޅުވެއްޖެއެވެ.
ޤައުމީ ކުުތުބުޚާނާއަށް 75 އަހަރުފުރުން ފާހަގަކުރުމުގެ ޙަރަކާތްތައް ރަސްމީކޮށް ފެއްޓުމަށް ހޯމަ ދުވަހުގެރޭ ބޭއްވި ރަސްމިއްޔާތެއްގައި ވާހަކަފުޅު ދައްކަވަމުން މިނިސްޓަރ ޔުމްނާ ވިދާޅުވީ، ޤައުމީ ކުތުބުޚާނާއިން ދޭ ޚިދުމަތްތައް އިތުރަށް ފުޅާކުރުމަށް ކަންކަން ރޭވިފައިވާ ކަމަށެވެ. އަދި މިއަހަރުގެ ތެރޭގައި ޤައުމީ ކުތުބުޚާނާ ޑިޖިޓަލައިޒްކޮށް އެ މަސައްކަތް ފެށިގެންދާނެ ކަމަށް މިނިސްޓަރ ވިދާޅުވިއެވެ.
އޭގެއިތުރުން، މިނިސްޓަރުގެ ވާހަކަފުޅުގައި ވަނީ ކުތުބުޚާނާގެ ކުރީގެ ޙާލަތާއި، ފާއިތުވި ދުވަސްތަކުގައި ގެނެވިފައިވާ ކުރިއެރުންތަކަށްވެސް އަލިއަޅުވާލައްވާފައެވެ. އެގޮތުން ކުޑަކުދިންގެ މަލްޓިމީޑިއާ ލައިބްރަރީއަށް މަސް ދުވަހު ބަންދުކޮށްފައި އޮތުމަށްފަހު ނިމިދިޔަ އަހަރުގެ ޖުލައި މަހު އަލުން ހުޅުވާފައިވާކަން މިނިސްޓަރ ވަނީ ފާހަގަކުރައްވާފައެވެ.
އޭގެ އިތުރުން، ކުޑަކުދިންގެ މަލްޓިމީޑިއާ ލައިބްރަރީ އޭރު އަލުން ހުޅުވާފައިވަނީވެސް އެކި ޚިދުމަތްތައް މެދުކެނޑެމުން، ބަންދުކުރަމުން ދާތާ ތިން އަހަރު ވެފައިވަނިކޮށެވެ.
ލައިބްރަރީ އަލުން ހުޅުވާފައިވާއިރު، އެތަނުގައި އެންމެ ތުއްތު ކުދިންނަށްވެސް ފޮތް ކިޔުމާއި ކުޅުން ފަދަ ޙަރަކާތްތަކުގައި ބައިވެރިވެވޭނެގޮތަށް ވަނީ "ކިޑްސް ކޯރނާ" ކިޔާ ކޯރނާއެއް ހުޅުވާފައެވެ. 2000 އަށްވުރެ ގިނަ ފޮތާއެކު އަލުން ހުޅުވިގެންދިޔަ ލައިބްރަރީގައި ތިބެ ފޮތް ކިޔާލެވޭނެ ފަދަ ސްޓަޑީ އޭރިއާއެއްގެ އިތުރުން ދިވެހި ލިޔުންތަކަށް ޚާއްޞަ ކޮށްގެން "ދިވެހި ކަލެކްޝަން" ގެ ނަމުގައި ވަކި ބައެއް ޤާއިމުކޮށްފައިވެއެވެ.
ޤައުމީ ކުތުބުޚާނާ ޑިޖިޓަލައިޒް ކުރުމުން ލިބޭނެ ފައިދާތަކާއި ގުޅޭގޮތުން މިނިސްޓަރ ވިދާޅުވީ، އެކަމުގެ ސަބަބުން ކުތުބުޚާނާގައި ހުރި ފޮތްތަކާއި މަޢުލޫމާތުތައް ރާއްޖޭގެ ކޮންމެ ހިސާބެއްގައި ހުރި ނަމަވެސް ލިބޭނެ ފުރުޞަތު ފަހިވެގެންދާނެ ކަމަށާއި، އޭގެ ސަބަބުން ތަޢުލީމީ ފަންނުގައި ޙަރަކާތްތެރިވާ ފަރާތްތަކަށްވެސް ފަސޭހަވެގެންދާނެ ކަމަށެވެ.
މިނިސްޓްރީން ބުނީ، ޤައުމީ ކުތުބުޚާނާއަށް 75 އަހަރުފުރުން ކުލަގަދަކޮށް ފާހަގަކުރުމަށް ގިނަ ޙަރަކާތްތަކެއް ރޭވިފައިވާ ކަމަށެވެ. އެގޮތުން ސްޓްރީޓް ލައިބްރަރީގެ ޚިދުމަތް ފެށުމާއި، ފޮތް ލިޔުމުގެ މުބާރާތުގެ އިތުރުން ކުއިޒް މުބާރާތްތައް ކުރިއަށް ގެންދިޔުމަށްވެސް ހަމަޖެހިފައިވާ ކަމަށް މިނިސްޓްރީން މަޢުލޫމާތުދެއެވެ.
