ލުބުނާނުގެ ހިޒްބުﷲ ޖަމާޢަތަކީ ޓެރަރިސްޓް ޖަމާޢަތެއްގެ ގޮތުގައި ހޮންޑޫރަސް އިން ކަނޑައަޅައިފި އެވެ.

ހޯމަ ދުވަހު އެޤައުމުން އެކަން ނިންމާފައިވާއިރު އެޤައުމުގެ ސެކިޔުރިޓީ މިނިސްޓަރ ލުއިސް ސުއެޒޯ ވިދާޅުވީ ހިޒްބުﷲ އަކީ ޓެރަރިސްޓް ޖަމާޢަތެއްގެ ގޮތުގައި ކަނޑައަޅާކަމަށާއި އަދި އެޖަމާޢަތުގައި ރަޖިސްޓްރީވެފައިވާ މީހަކާއި ގުޅުންހުރި ތަންތަން އަދި ފައިނޭންސް ކުރުންވެސް އެއީ ޓެރަރިޒަމްގެ ޢަމަލުގެ ގޮތުގައި ހިމެނޭ ކަމަށެވެ.

އެމެރިކާއިންވެސް ޓެރަރިސްޓް ޖަމާޢަތެއްގެ ގޮތުގައި ކަނޑައަޅާފައިވާ ހިޒްބުﷲ އަކީ ޓެރަރިސްޓް ޖަމާޢަތެއްކަމަށް ކަނޑައަޅުއްވާނެ ކަމުގެ އިޝާރާތެއް މިދިޔަ ހަފުތާގައި ގުއަޓަމެލާގެ އާ ރައީސް ވަނީ ދެއްވާފަ އެވެ. ގުއަޓަމެލާ އިން އަންނަނީ އެޤައުމުގެ އެމްބަސީއެއް އިސްރާޢީލްގައި ޤާއިމުކުރުމަށް ތައްޔާރުވަމުންނެވެ.

ހޮންޑޫރަސް އިން ނިންމި މިނިންމުމާއި ގުޅިގެން އިސްރާޢީލްގެ ފޮރިން މިނިސްޓަރ އިސްރާއިލް ކެޓްޒް ވަނީ މިއީ ހޮންޑޫރަސް އިން ނިންމި ވަރަށް މުހިންމު ނިންމުމެއް ކަމަށް ވިދާޅުވެފަ އެވެ.

ހިޒްބުﷲ އަކީ ޓެރަރިސްޓް ޖަމާޢަތެއް ކަމަށް ކަނޑައަޅާފައިވާ އިނގިރޭސި ވިލާތުން މިމަހުގެ 17 ވަނަ ދުވަހު ބުނެފައިވަނީ ހިޒްބުﷲ ޖަމާޢަތުގެ އެސެޓްތައް ފްރީޒްކުރުމުގެ ކަންކަން ކުރިޔަށްވުރެ ފުޅާކޮށްފައިވާ ކަމަށެވެ. މީގެއިތުރުން މިދިޔަ އަހަރު އާޖެންޓީނާއަށް ދިން ދެ ހަމަލާ ދީފައިވަނީ ހިޒްބުﷲއިން ކަމަށް ބުނެ އެގައުމުންވެސް ވަނީ ހިޒްބުﷲ އަކީ ޓެރަރިސްޓް ޖަމާޢަތެއްކަމަށް ނިންމާ އެޤައުމުގައި ހުރި އެޖަމާޢަތުގެ އެސެޓްތައް ފްރީޒްކޮށްފަ އެވެ.

ހިޒްބުﷲ އަކީ ޓެރަރިސްޓް ޖަމާޢަތެއްކަމަށް ކަނޑައަޅާފައިވާ އެހެން ޤައުމުތަކުގެ ތެރޭގައި ހިމެނެނީ ކެނެޑާ، އޮސްޓްރޭލިއާ، ނިއު ޒިލެންޑް އަދި ޔޫރަޕިއަން ޔޫނިއަން އާއި އިސްރާޢީލެވެ. ހިޒްބުﷲ އަންނަނީ މެދުއިރުމަތީގައި އިސްރާޢީލާ ދެކޮޅަށް ހަނގުރާމަ ކުރަމުންނެވެ.